Ditiro 24 - Setswana 1970

Paulo o sekisiwa fa pele ga Felekise

¹ E rile morago ga malatsi a le matlhano Anania, moperesiti yo mogolo, a tla le bagolo ba morafe bangwe le mmueledi mongwe, e bong Teretulo, ba begela molaodi yo mogolo Paulo.

² Ya re Paulo a sena go bidiwa, Teretulo a simolola go mo latofatsa a re: “E re ka re bona kagiso e kgolo ka wena, le ka morafe ono o direlwa ditlhabololo ka tlamelo ya gago

³ ka mekgwa yotlhe le mo ntlheng tsotlhe, re amogela gona ka tebogo yotlhe, wena Felekise yo o tlotlegang segolo.

⁴ Mme fela, ka ke sa rate go go dia, ke go rapela gore o re reetse go se kae ka bopelonomi jwa gago.

⁵ Re fitlhetse monna yo a le botlhole, a feretlha mo Bajuteng botlhe mo lefatsheng lotlhe; e bile ke moeteledi pele wa setlhopha sa maitirelo sa Banasaretha.

⁶ O bile o lekile go itshepolola Tempele; mme ra mo tshwara, ra rata go mo atlhola ka fa molaong wa rona.

⁷ Mme Lisia, molaodi-wa-sekete, a tla, a mo ubula ka thata e kgolo mo diatleng tsa rona,

⁸ a laela balatofatsi ba gagwe gore ba tle fa pele ga gago. O tla kgona go tlhaloganya dilo tsotlhe tse re mmayang molato ka tsona, fa o ka mmotsolotsa ka wesi.”

⁹ Bajuta le bone ba mo tlatsa, ba tlhomamisa gore go ntse jalo.

Boikarabelo jwa ga Paulo

¹⁰ Ya re molaodi yo mogolo a sena go mo gwetlha gore a bue, Paulo a araba a re: “E re ka ke itse gore e setse e le dinyaga tse dintsi o ntse o le moatlhodi wa morafe o, ke ikarabela ka phuthologo ntlheng ya tse di ntebanyeng;

¹¹ o ka lemoga gore fa ke sena go ya kwa Jerusalema go obamela, ga go ise go fete malatsi a le 12;

¹² mme ga ba ise ba mphitlhele ke ganetsanya le ope mo Tempeleng, gongwe ke dira khuduego mo bontsing le e seng mo disenagogeng gongwe mo motseng.

¹³ Le gona ga ba ka ke ba go tlhomamisetsa sepe ka ga dilo tse ba ntatofatsang ka tsona jaanong.

¹⁴ “Mme ke go ipobolela gore ka nnete ke direla Modimo wa borraetsho ka fa Tseleng e ba reng ke ya setlhopha sa maitirelo, ke ntse ke dumela tsotlhe tse di utlwanang le molao le tse di kwadilweng mo baporofeting,

¹⁵ ke na le tsholofelo mo Modimong ya se le bone ba se lebelelang gore go tla nna tsogo ya basiami le ya basiamolodi.

¹⁶ Ke bile ke ntse ke itlwaetsa go nna le segakolodi se se se nang molato ka gale mo Modimong le mo bathong.

¹⁷ “Mme morago ga dinyaga di se kae ka tla go tsisetsa morafe wa ga etsho dikatso le go isa ditshupelo.

¹⁸ Ya re ke di isa, Bajuta bangwe ba kwa Asia ba mphitlhela mo Tempeleng ke itshekisitswe, go se na bontsi jwa batho le e seng modumo;

¹⁹ ke bone ba ba ka bong ba le fano fa pele ga gago ba supa molato, fa ba o bona mo go nna.

²⁰ Gongwe a bone ba ka bosi ba bolele tshiamololo e ba e bonyeng mo go nna, fa ke ne ka ema fa pele ga lekgotla le legolo la bone.

²¹ Kampo ba mpona molato ka ntlha ya lefoko le le lengwe lele le ke le kuileng ke eme mo gare ga bone ka re: ‘Ke sekisiwa kajeno ke lona ka ntlha ya tsogo ya baswi.’ ”

Paulo fa pele ga Felekise le Durusila

²² Mme Felekise, e re ka a ne a itse tse dintsi tsa Tsela ya bokeresete, a busetsa kgang kwa morago a re: “E tla re Lisia, molaodi-wa-sekete, a sena go tla, ke atlhole kgang ya lona.”

²³ Jaanong a laela molaodi-wa-lekgolo gore a mo dise, mme a se ka a tshwenngwa; go se thibelwe ope wa ba ga gabo go mo direla gongwe go mo etela.

²⁴ E rile morago ga malatsi mangwe Felekise a tla le Durusila, mohumagadi wa gagwe wa Mojuta; a bitsa Paulo, a mo reetsa, a bolela ka ga tumelo ya go dumela mo go Keresete Jesu.

²⁵ Mme ya re a ntse a bua ka ga tshiamo le ka ga boitshwaro le ka ga katlholo e e tlang, Felekise a tshoga, a ba a mo araba a re: “Gompieno o ka tsamaya; e tla re ke sena go bona nako, ke go bitse.”

²⁶ E bile o ne a solofetse gore o tla newa madi ke Paulo gore a mo golole; ke ka moo a mmiditseng gangwe le gape, a buisanya nae.

²⁷ E rile dinyaga tse pedi di sena go feta, Porekio Feseto a tsena mo boemong jwa ga Felekise; mme ya re ka Felekise a ne a rata go kgatlha Bajuta, a tsamaya, a sa golola Paulo.