Ditiro 13 - Setswana 1970

Baranaba le Paulo ba a rongwa. Tiro ya bone mo Kipero

¹ Go ne go le baporofeti le baruti mo Antiogia mo phuthegong ya teng, e bong Baranaba le Simeone yo o bidiwang Nigere, le Lukio wa Kirene, le Manaene yo o godisitsweng mmogo le kgosi Herote, le Saule.

² Ya re ba ntse ba direla Morena, mme ba itima dijo, Mowa o o Boitshepo wa re: “Nntshetsang Baranaba le Saule gore ba ye tirong e ke ba bileditseng yona.”

³ Jaanong ya re ba sena go itima dijo le go rapela le go ba baya diatla, ba ba naya tsela.

⁴ Jaanong bone, ka ba romilwe ke Mowa o o Boitshepo, ba ya kwa Seloikia, ba be ba tswa teng, ba tshelela kwa Kipero ka mokoro.

⁵ Ya re ba sena go fitlha kwa Salami, ba bolela Lefoko la Modimo mo disenagogeng tsa Bajuta, ba na le Johane e le mothusi.

⁶ Ya re ba sena go ralala setlhakatlhake sotlhe go fitlha mo Phafo, ba fitlhela monna mongwe wa moitseanape teng, moporofeti wa maaka, wa Mojuta yo leina la gagwe e leng Barejesu;

⁷ o ne a nna le molaodi Seregio Paulo, monna wa tlhaloganyo. Ene a bitsa Baranaba le Saule, a eletsa go utlwa Lefoko la Modimo.

⁸ Mme Elemase wa moitseanape – leina la gagwe le fetolwa jalo – a ganetsanya nabo, a leka go faposa molaodi mo tumelong.

⁹ Jaanong Saule yo o bidiwang Paulo, a tlhoma matlho mo go ene, a tletse Mowa o o Boitshepo, a mo raya a re:

¹⁰ “Wena yo o tletseng boferefere le bolotsana jotlhe, wena wa ga Diabolo, mmaba wa tshiamo yotlhe, a ga o nke o bakela go sokamisa ditsela tse di siameng tsa Morena?

¹¹ Jaanong bona, letsogo la Morena le mo go wena, mme o tla nna sefofu, o sa bone letsatsi sebaka.” Ga ba ga wela leoto le lefifi mo go ene ka bonako; a nna a dikologa, a batla ba ba ka mo gogang ka letsogo.

¹² Ya re molaodi a bona se se dirilweng, a dumela, a gakgamaletse thuto ya Morena.

Baranaba le Paulo kwa Antiogia wa Pisidia

¹³ Jaanong Paulo le ba a nang nabo ba tloga mo Phafo ka mokoro, ba fitlha kwa Perege wa Pamefilia. Teng foo Johane a ba tlogela, a boela kwa Jerusalema.

¹⁴ Mme bone ba ralala lefatshe go tloga kwa Perege, ba fitlha kwa Antiogia wa Pisidia. Ba tsena mo senagogeng ka letsatsi la Sabata, ba nna fa fatshe.

¹⁵ Ya re go sena go buisiwa molao le baporofeti, bagogi ba senagoge ba roma kwa go bone ba re: “Banna, bakaulengwe, a e re fa lo na le lefoko lengwe la go kgothatsa batho, lo bue.”

¹⁶ Ke fa Paulo a nanoga, a boka ka letsogo a re: “Banna ba Iseraele, le lona ba lo boifang Modimo, reetsang!

¹⁷ Modimo wa morafe o wa Iseraele o itlhaoletse borraetsho, wa godisa morafe o le kwa majakong mo lefatsheng la Egepeto, wa ba ntsha teng ka letsogo le le tsholetsegileng.

¹⁸ Wa ba wa itshokela mekgwa ya bone mo sekakeng, e ka nna sebaka sa dinyaga di le 40.

¹⁹ Mme e rile o sena go senya ditšhaba tse di supang mo lefatsheng la Kanana, wa ba naya lefatshe la tsona go nna boswa.

²⁰ Morago ga dilo tseo dinyageng tse e ka nnang di le 450 wa ba naya baatlhodi go tla go fitlha mo go Samuele moporofeti.

²¹ “Go tloga foo ba kopa kgosi. Modimo wa ba naya Saule, morwa Khiše, monna wa lotso lwa ga Benyamene, dinyaga di le 40.

²² Ya re o sena go mo tlosa, wa tlhoma Dafita gore a nne kgosi ya bone, wa supa ka ga gagwe wa re: ‘Ke bonye Dafita, morwa Isai, monna ka fa pelong ya me, yo o tla dirang thato ya me yotlhe.’

²³ Ke ene yo Modimo o ntshitseng Mopholosi wa Iseraele mo losikeng lwa gagwe ka fa tsholofetsong, e bong Jesu,

²⁴ Johane a sena go rerela batho botlhe ba Iseraele kolobetso ya tlhabologo, pele Jesu a ise a simolole tiro.

²⁵ E rile Johane a wetsa tiro ya gagwe, a re: ‘Se lo nkayang sona ga ke sona. Mme bonang, o e tla morago ga me yo ditlhako tsa dinao tsa gagwe ke sa tshwanelang go di funolola.’

²⁶ “Banna ba ga etsho, bomorwa lotso lwa ga Aborahame le ba ba boifang Modimo mo go lona, lefoko la pholoso e, le rometswe rona;

²⁷ gonne ba ba agileng mo Jerusalema le balaodi ba bone, ka ba ne ba sa mo itse, ba mo atlhola, ba dirafatsa mantswe a baporofeti jalo a a buisiwang ka Sabata mongwe le mongwe.

²⁸ Mme le fa ba se ka ba fitlhela molato ope o o tshwanetseng loso mo go ene, ba kopa Pilato gore a bolawe.

²⁹ E rile ba sena go swetsa tsotlhe tse di kwadilweng ka ga gagwe, ba mo pagolola mo logonnye, ba mo tsenya mo lebitleng.

³⁰ Mme Modimo wa mo tsosa mo baswing,

³¹ a bonwa ka malatsi a mantsi ke ba ba duleng nae kwa Galelea, ba ya kwa Jerusalema, ba jaanong e leng basupi ba gagwe mo bathong.

³² Le rona re lo rerela mafoko a boitumelo a tsholofetso e e diretsweng borraetsho,

³³ ka Modimo o e dirafaditse mo go rona, ba re leng bana ba bone, ka go tsosa Jesu, jaaka go kwadilwe mo Pesalomeng ya bobedi ga twe: “ ‘O morwaake, ke go tsetse kajeno.’

³⁴ “O mo tsositse mo baswing gore a se ka a tlhola a boela mo go boleng; o sa le o bua jalo o re: “ ‘Ke tla lo naya tse di boitshepo tse di tlhomameng tsa ga Dafita.’

³⁵ “Ke gona ka moo o buang le mo go e nngwe wa re: “ ‘Ga o nke o lesa Moitshepi wa gago a bona go bola.’

³⁶ “Gonne Dafita, e rile a sena go direla thato ya Modimo mo motlheng wa gagwe, a robala, a fitlhwa fa go borraagwe, a ba a bona go bola.

³⁷ Mme ene yo Modimo o mo tsositseng ga a a ka a bona go bola.

³⁸ Jaanong itseng he, lona banna ba ga etsho: Lo rerelwa boitshwarelo jwa dibe ka ene yo.

³⁹ Mongwe le mongwe yo o dumelang o siamisiwa ke ene mo dilong tsotlhe tse lo ne lo sa ka ke lwa di itshwarelwa ka molao wa ga Moše.

⁴⁰ Jaanong itiseng, e se re gongwe lwa dirafalelwa ke se se builweng ke baporofeti se re:

⁴¹ “ ‘Bonang, banyatsi ke lona, lo gakgamale, lo nyelele; gonne ke tla dira tiro mo malatsing a lona e lo ka bong lo sa e dumela ka gope, le fa mongwe a e lo bolelela.’ ”

⁴² Ya re Bajuta ba tswa mo senagogeng, baheitane ba kopa gore ba bolelelwe mafoko ao le ka Sabata yo o tlang.

⁴³ Ya re phuthego e phatlalala, Bajuta ba bantsi le batlhabologi ba ba boifang Modimo ba sala Paulo le Baranaba morago. Bao ba ba kgothatsa, ba ba tlhotlheletsa gore ba nnele ruri mo boitshwarelong jwa Modimo.

⁴⁴ Ya re ka Sabata yo o latelang ga batla go phuthega motse otlhe go utlwa Lefoko la Modimo.

⁴⁵ Ya re Bajuta ba bona bontsintsi, ba tlala lefufa, ba ganetsa tse di builweng ke Paulo, ba kgala.

⁴⁶ Mme Paulo le Baranaba ba bua ka bopelokgale ba re: “Go ne go tshwanetse gore Lefoko la Modimo le bolelelwe lona pele. Mme e re ka lo le gana, lo ikatlhola gore ga lo a tshwanelwa ke botshelo jo bo sa khutleng, bonang, jaanong re ya kwa baheitaneng.

⁴⁷ Gonne Morena o re laetse jalo a re: “ ‘Ke go dirile lesedi la baheitane gore o nne pholoso go fitlha kwa dikhutlong tsa lefatshe.’ ”

⁴⁸ Ya re baheitane ba utlwa, ba itumela, ba galaletsa Lefoko la Morena. Botlhe ba ba tlhaoletsweng botshelo jo bo sa khutleng ba dumela.

⁴⁹ Lefoko la Modimo la ba la anamisiwa mo lefatsheng leo lotlhe.

⁵⁰ Bajuta bone ba tlhotlheletsa basadi ba ba boifang Modimo ba ba tlotlegang le ditlhogo tsa motse, ba tsosetsa Paulo le Baranaba pogiso, ba ba leleka mo nageng ya bone.

⁵¹ Ke fa bone ba ba tlhotlhorela lorole lwa dinao, ba fetela kwa Ikonio.

⁵² Mme barutwa ba tlala boitumelo le Mowa o o Boitshepo.