Daniele 4 - Setswana 1970

Toro ya bobedi ya kgosi

¹ “Nna kgosi Nebukatenesare ke kwalela batho botlhe, e bong merafe le ditšhaba le ba dipuo ba ba agileng mo lefatsheng lotlhe ka re: A kagiso ya lona e nne e kgolo!

² Ke kgatlhwa ke go bolela ditshupo le dikgakgamatso tse Modimo o o godimodimo o di ntiretseng.

³ “Ditshupo tsa ona di kana kang! Dikgakgamatso tsa ona di dikgolo jang! Bogosi jwa ona ke jo bo sa khutleng; puso ya ona ke ya ditshika tsotlhe.

⁴ “Nna Nebukatenesare, e rile ke iketlile mo ntlong ya me, ke le mo kagisong mo ntlong ya me ya borena,

⁵ ka lora toro, mme ya mpoifisa; dikakanyo mo bolaong jwa me le dipono tsa tlhogo ya me tsa ntshosa.

⁶ Ka laola gore batlhalefi botlhe ba Babele ba tlisiwe fa pele ga me, ba tle go nkitsise tlhaloso ya toro.

⁷ Ke fa batlhalefi le baitseanape le Bakalatea le balepi ba dinaledi ba tla; ka ba bolelela toro, mme ba palelwa ke go mpolelela tlhaloso ya yona.

⁸ La bofelo ga ema Daniele fa pele ga me, yo leina la gagwe e leng Beletšhatsare ka fa leineng la modimo wa me, yo mowa wa medimo e e boitshepo o leng mo go ene; ka mmolelela toro.

⁹ Ka re: ‘Wena Beletšhatsare, mookamedi wa batlhalefi, yo ke itseng fa mowa wa medimo e e boitshepo o le mo go wena, yo o sa palelweng ke sephiri sepe. Utlwa toro ya me e ke e lorileng, o bolele tlhaloso ya yona!

¹⁰ “ ‘Dipono tsa tlhogo ya me tse ke di bonyeng ke le mo bolaong jwa me ke tse: Ke lorile, ke bona setlhare se le mo gare ga lefatshe, se goletse kwa godimo thata.

¹¹ Setlhare seo sa nna segolo thata; ntlha ya sona ya fitlha kwa legodimong, sa bonwa kwa dikhutlong tsotlhe tsa lefatshe.

¹² Matlhare a sona a ne a le mantle, maungo a sona a le mantsi, dijo tsa botlhe di le mo go sona. Diphologolo tsa naga tsa se nna moriti; dinonyane tsa loapi tsa aga mo dikaleng tsa sona; tsotlhe tse di phelang tsa ja mo go sona.

¹³ “ ‘Ka leba mo diponong tsa tlhogo ya me ke le mo bolaong jwa me, ka bona moengele yo o boitshepo a fologa kwa legodimong,

¹⁴ a kua thata, a bua jaana a re: Remang setlhare seo, kgaolang dikala tsa sona, tlhotlhorang matlhare a sona, lo phatlalatse maungo a sona! A diphologolo di tshabe di tloge fa tlase ga sona, le dinonyane mo dikaleng tsa sona!

¹⁵ Fela lo tlogele thito mo fatsheng, e na le medi ya yona, e bofilwe ka keetane ya tshipi le kgotlho mo bojannye jo botala jwa naga. “ ‘A e kolobediwe ke monyo wa legodimo, e tlhakanele merogo ya lefatshe le diphologolo.

¹⁶ A pelo ya gagwe ya setho e fetoge, mme a fiwe pelo ya sephologolo, a ba a fetwe ke dipaka tse supa.

¹⁷ Go laotswe jalo ka katlholo ya baengele; ke mafoko a baitshepi a a lopang jalo gore ba ba phelang ba tle ba itse, fa Mogodimodimo a na le thata mo bogosing jwa motho, a kgona go bo neela yo a ratang go bo mo neela; le go ka dira kgosi yo e leng motho fela.’

¹⁸ “Ke yona pono e ke e bonyeng mo torong, nna kgosi Nebukatenesare, mme wena Beletšhatsare, bolela tlhaloso ya yona; gonne batlhalefi botlhe ba ba mo pusong ya me ba paletswe ke go mpolelela tlhaloso, mme wena o nonofile, ka gore mowa wa medimo e e boitshepo o mo go wena.”

Daniele o tlhalosa toro

¹⁹ Ke fa Daniele yo leina la gagwe e leng Beletšhatsare a tlhoka puo sebaka; megopolo ya gagwe ya mo rera. Kgosi ya bua, ya raya Beletšhatsare ya re: “A toro le tlhaloso ya yona di se ka tsa go tshosa.” Beletšhatsare a fetola a re: “Morena wa me, a toro eo e dirafalele ba ba go tlhoileng, le tlhaloso ya yona e dirafalele baba ba gago!

²⁰ Setlhare seo o se bonyeng, se se godileng thata, se ntlha ya sona e fitlhileng kwa legodimong, se bonwa kwa dikhutlong tsa lefatshe lotlhe;

²¹ se matlhare a sona e neng a le mantle, maungo a sona a le mantsi, dijo tsa dilo tsotlhe di le mo go sona; diphologolo tsa naga di se nna moriti; dinonyane tsa loapi di aga dintlhaga mo dikaleng tsa sona:

²² “Setlhare seo ke wena kgosi; o mogolo, o thata; bogolo jwa gago bo goletse kwa godimo, bo ama legodimo, le puso ya gago e fitlha kwa dikhutlong tsa lefatshe.

²³ Jaanong fa e le moengele yo o boitshepo yo kgosi e mmonyeng a fologa kwa legodimong, a laola a re: ‘Remang setlhare seo, lo se senye; fela lo sadise thito mo mmung, e na le medi ya yona, e bofilwe ka keetane ya tshipi le kgotlho mo bojannye jo botala jwa naga, mme a e kolobediwe ke monyo wa legodimo, e phele le diphologolo tsa naga, go fitlhelela e fetwe ke dipaka tse supa.’

²⁴ “Tlhaloso ya teng ke e – mme se se tla dirafalelang kgosi, morena wa me, se laotswe ke Mogodimodimo:

²⁵ Wena o tla lelekwa mo bathong, o nna le diphologolo tsa naga, o fudisiwa bojang jaaka dikgomo, o kolobediwa ke monyo wa legodimo, o fetwa ke dipaka tse supa go fitlhelela o itse, fa Mogodimodimo a na le thata mo bogosing jwa motho, a bo neela yo a ratang go bo mo neela.

²⁶ Jaanong fa go laotswe gore go sadisiwe thito ya setlhare e e nang le medi, ke go re: Bogosi jwa gago o tla boela mo go jona, o sena go lemoga gore puso ke ya legodimo.

²⁷ Ka moo, kgosi, a kgakololo ya me e go kgatlhe fa ke re: Tlosa maleo a gago ka ditiro tse di siameng, le melato ya gago ka go tlhomogela babogisegi pelo! E ka re gongwe o a phela o iketlile ka boleele.”

²⁸ Tsotlhe tseo di dirafaletse kgosi Nebukatenesare.

²⁹ E rile dikgwedi di le 12 di sena go feta, kgosi ya bo e itsamaela mo godimo ga ntlo ya borena kwa Babele,

³⁰ ya bua ya re: “A se ga se ona motse o mogolo wa Babele o ke o agileng ka thata e kgolo ya me go nna mošate, e le go galaletsa borena jwa me?”

³¹ Ya re kgosi e sa ntse e bua jalo, ga utlwala lentswe le tswa kwa legodimong le re: “Kgosi Nebukatenesare, o a bolelelwa gore bogosi bo tlosiwa mo go wena.

³² O tla lelekwa mo bathong, o nna le diphologolo tsa naga, o fudisiwa bojang jaaka dikgomo, o fetwa ke dipaka tse supa go fitlhelela o lemoga gore, Mogodimodimo o na le thata mo bogosing jwa motho, o bo neela yo a ratang go bo mo neela.”

³³ Lefoko leo la akofa la dirafalela Nebukatenesare ka nako eo. A lelekwa mo bathong, a fula bojang jaaka dikgomo; mmele wa gagwe wa kolobediwa ke monyo wa legodimo, ga tsamaya moriri wa gagwe wa leelefala jaaka diphuka tsa manong, le dinala tsa gagwe jaaka tsa dinonyane.

Kgosi e baka Modimo

³⁴ “E rile malatsi ao a sena go feta, nna Nebukatenesare ka tsholeletsa matlho kwa legodimong, ka boelwa ke tlhaloganyo ya me, ka baka Mogodimodimo, ka tumisa yo o phelang ka bosakhutleng, ka mo tlotla. “Thata ya gagwe ke thata e e sa khutleng; bogosi jwa gagwe ke jwa ditshika tsotlhe.

³⁵ Baagi botlhe ba lefatshe ga ba kaiwe sepe. O direla mophato wa legodimo le baagi ba lefatshe ka fa a ratang ka teng. Ga go na ope yo o ka thibelang letsogo la gagwe, gongwe yo o ka mo arabisang a re: ‘O dirang?’

³⁶ “Ka yona nako eo tlhaloganyo ya me ya boela mo go nna, le tlotlego ya me le kgalalelo ya me tsa boela mo go nna e le go tumisa bogosi jwa me; ditona tsa me le dikgosana tsa me tsa mpatla, ka busediwa gape mo bogosing jwa me, ka fiwa bogolo jo bo fetang jwa pele.

³⁷ “Jaanong nna Nebukatenesare ke tumisa Kgosi ya legodimo, ke a e godisa, ke a e tlotla ka re: Tiro tsotlhe tsa yona ke tsa mannete, ditsela tsa yona di siame; ba ba sepelang ka boikgodiso, o itse go ba kokobetsa.”