Daniele 1 - Setswana 1970

Daniele le balekane ba gagwe ba mo lapeng la kgosi ya Babele

¹ Ka ngwaga wa boraro wa puso ya ga Joyakime, kgosi ya Juta, ga tla Nebukatenesare, kgosi ya Babele, kwa motseng wa Jerusalema, a o dikanyetsa ka ntwa.

² Morena a neela Joyakime, kgosi ya Juta, le bontlhanngwe jwa dithoto tsa Ntlo ya Modimo mo diatleng tsa ga Nebukatenesare, mme ene a di isa kwa lefatsheng la Sineare mo ntlong ya modimo wa gagwe, dithoto tsona a di tsenya mo ntlong ya mahumo ya modimo wa gagwe.

³ Jaanong kgosi ya laela Ašephenase, mookamedi wa badiredi ba yona gore a tlhaole bangwe ba Baiseraele ba e leng ba losika lwa kgosi le lwa batlotlegi,

⁴ e bong makau a a itekanetseng, a a bopegileng sentle, a e leng ditswerere mo botlhaleng jotlhe, a a seleng tlhogo, a a tlhogo-di-boleta, a a nonofileng go ka direla mo lapeng la kgosi; ona ao a a rute mokwalo wa Bakalatea le puo ya bone.

⁵ Kgosi ya laela gore a fiwe kabelo ya letsatsi lengwe le lengwe ya dijo tsa kgosi le ya weine e e e nwang ka yosi, gore a godisiwe jalo dinyaga di le tharo, mme fa di sena go feta, a itse go direla kgosi.

⁶ Mo go ona ao go ne go le Daniele le Hananya le Mišaele le Asaria, ba e leng ba lotso lwa Juta.

⁷ Jaanong mookamedi wa badiredi a ba taya maina a sele, a bitsa Daniele Beletšhatsare le Hananya Šaterage le Mišaele Mešage le Asaria Abetenego.

⁸ Mme Daniele a ikaelela mo pelong ya gagwe gore a se ka a itshekologa ka dijo tsa kgosi le ka weine e e e nwang; a kopa mookamedi wa badiredi gore a se ka a itshekologa.

⁹ Modimo wa naya Daniele go bona bopelonomi le bopelotlhomogi mo mookameding wa badiredi.

¹⁰ Mookamedi wa badiredi a fetola Daniele a re: “Ke boifa kgosi, morena wa me, yo o laetseng tse lo tshwanetseng go di ja le go di nwa, e se re gongwe ya bona difatlhego tsa lona di tlhontse di tshwanologa le tsa makau a mangwe a e leng a mophato wa lona, lwa tloga lwa nthwesa molato fa pele ga kgosi.”

¹¹ Ke fa Daniele a raya modiredi yo mookamedi wa badiredi a mo laodisitseng Daniele le Hananya le Mišaele le Asaria a re:

¹² “A ko o leke batlhanka ba gago malatsi a le some! Re ke re fiwe merogo go e ja le metsi go a nwa!

¹³ A foo go bonwe tebego ya rona le tebego ya makau a a jang dijo tsa kgosi fa pele ga gago; jaanong foo o ka direla batlhanka ba gago ka fa o bonang ka teng.”

¹⁴ Lefoko leo la bone a le utlwa, a ba leka malatsi a le some.

¹⁵ Ya re malatsi a le some a sena go feta, ga fitlhelwa difatlhego tsa bone di le dintle, e bile ba akotse bogolo go makau a a jang dijo tsa kgosi.

¹⁶ Go tloga foo mookamedi a tlosa dijo tsa kgosi le weine e ba neng ba laotswe go e nwa, a ba jesa merogo.

¹⁷ Mme makau ao Modimo wa a naya kitso le temogo ya dikwalo tsotlhe le botlhale ka bone jwa ona; Daniele ene o ne a ba feta ka go tlhaloganya dipono tsa mefutafuta le ditoro.

¹⁸ Jaanong e rile malatsi a sena go feta a kgosi e a beileng gore ba tsenngwe tirong morago ga ona, mookamedi wa badiredi a ba isa mo teng fa pele ga Nebukatenesare.

¹⁹ Kgosi ya bua nabo. Mme ga bo go sa bonwe ope mo go bone botlhe yo o tshwanang le Daniele le Hananya le Mišaele le Asaria. Ke fa ba simolola go direla kgosi.

²⁰ Mo mafokong otlhe a botlhale le kitso a kgosi e neng e a ba botsa, ya fitlhela ba gaisa batlhalefi botlhe le baitseanape ba ba mo pusong yotlhe ya yona gasome.

²¹ Daniele a nna teng go fitlhelela ngwageng wa ntlha wa kgosi Korese.