Basiamisi 5 - Setswana 1970

Leboko la phenyo la ga Debora le Barake

¹ Ka letsatsi leo Debora le Barake morwa Abinoame ba boka ba re:

² “E re ka bagogi ba ne ba etelela Baiseraele pele, le morafe o utlwa ka bopelotshweu, bokang Morena!

³ Utlwang lona dikgosi! Sekegang ditsebe lona dikgosana! Nna ke tla opelela Morena, ke leletsa Morena Modimo wa Iseraele.

⁴ Morena, e rile fa o tswa kwa Seire, ya re o gata o tlhaga nageng ya Etomo lefatshe la roroma, magodimo a rotha, maru a rotha metsi.

⁵ Dithaba tsa reketla fa pele ga Morena, thaba eo ya Sinai fa pele ga Morena, Modimo wa Iseraele.

⁶ Mo malatsing a ga Samegare morwa Anathe, mo malatsing a ga Jaele ditsela di ne di le senya; baeti ba tsamaya mo ditselaneng tse di kwa thoko tse di metsopodia.

⁷ Go ne go tlhokafala babusi mo Iseraeleng, ba tlhokafala ga tsamaya ka tsoga, nna Debora, ka tsoga ke le Mma-Iseraele.

⁸ E rile ba ineela medimo e mešwa, ga nna tlhabano mo dikgorong; thebe le lerumo tsa bo di sa bonale mo diketeng tse di 40 tsa Iseraele.

⁹ Pelo ya me e goga le balaodi ba Iseraele ba ba ineetseng ka bopelotshweu mo gare ga morafe. Bakang Morena!

¹⁰ Ba lo palameng diesele tse ditshwaana, ba lo dutseng mo diphateng tse di logilweng, ba lo sepelang mo tseleng: Akanyang!

¹¹ Ka ntlha ya mantswe a ba ba binang mo gare ga digopo, ba boka teng ditiro tse di siameng tsa Morena, ditiro tsa pholoso tsa puso ya gagwe mo Iseraeleng. Ke fa morafe wa Morena o fologela kwa dikgorong.

¹² Tsoga! Tsoga, Debora! Tsoga, tsoga, o tlhabe sefela! Nanoga, Barake, o ise batshwarwi ba gago mo botshwarong, wena morwa Abinoame.

¹³ Ke fa masalela a batlotlegi ba morafe a fologa; Morena a fologa go nthusa a le mo gare ga bagale.

¹⁴ Ba tswa kwa Eferaime ba ba agileng mo nageng ya Amaleke; Babenyamene ba go latela mo gare ga batlhabani ba gago; balaodi ba fologa kwa Magire; ba ba bololang ba latetse thobane ya molaodi wa batlhabani, ba tswa kwa Sebulone.

¹⁵ Balaodi ba Isašare ba tla le Debora; Barake a tla jaaka Isašare. Ba romelwa mogorogorong, ba mo setse morago. Kwa dinageng tsa ga Rubene ga bo go le maikgogomoso a magolo a dipelo fela.

¹⁶ Ke ka ntlha ya eng, fa o ne o itulela kwa merakeng go utlwelela melodi kwa matsomaneng? Kwa dinageng tsa ga Rubene ga bo go le dikakanyo tse dikgolo tsa dipelo fela.

¹⁷ Gileate o ne a itulela kwa moseja ga Joretane. Ke eng fa Dane a le mo mekorong? Asere a itunna fa losing lwa lewatle, a nna kwa matsibogong a lone.

¹⁸ Basebulone ke batho ba ba neelang maphelo a bone mo losong; le Banafetale ba ntse jalo mo dithoteng tsa naga.

¹⁹ Ga tla dikgosi, tsa tlhabana; foo ga tlhabana dikgosi tsa Kanana kwa Thaenage fa metsing a Megito – di sa bone thopo ya selefera.

²⁰ Dinaledi tsa tlhabana di tswa kwa legodimong; tsa tlhabana le Sisera di tswa mo ditseleng tsa tsona.

²¹ Nokana ya Kisone ya ba tsaya. Ke nokana ya ditlhabano, nokana ya Kisone! Jaa moepelane, mowa wa me!

²² Foo ditlhako tsa dipitse tsa tiba ka go patakanya, go patakanya ga dipitse tse di lebelo tsa gagwe.

²³ Hutsang motse wa Merose, go bua Moengele wa Morena; hutsang lo hutse baagi ba ona, ka ba se ka ba tla go thusa Morena, go thusa Morena mo gare ga bagale.

²⁴ A go tshegofadiwe Jaele bogolo go basadi botlhe, ene mosadi wa ga Hebere wa Mokeni! A a tshegofadiwe mo lapeng bogolo go basadi botlhe!

²⁵ Sisera a kopa metsi; Jaele a mo naya mašwi, a tlisa madila ka mogopo wa batlotlegi.

²⁶ A isa letsogo kwa lomapong, le le jang kwa notong ya badiri; a rutha Sisera, a pšhwetlakanya tlhogo ya gagwe, a e silakanya; a mo phololetsa letlhwana.

²⁷ A idibala, a wela fa fatshe, a namalala fa gare ga dinao tsa gagwe; a idibala, a wela fa fatshe fa gare ga dinao tsa gagwe. Fa a neng a idibala teng, a namalala a bolailwe.

²⁸ Mmaagwe Sisera a okomela ka fenstere, a kua fa phatlheng ya phefo a re: ‘Ke eng fa koloi ya gagwe e diega go tla? Ke eng fa medumo ya dipitse tsa gagwe e sa akofe?’

²⁹ Ba ba botlhale ba bahumagadi ba gagwe ba mo fetola; le ene ka esi a fetola mafoko a gagwe a re:

³⁰ ‘Kooteng ba bonye thopo, ba e abelana gore monna mongwe le mongwe a bone mosetsana, gongwe basetsana ba le babedi; thopo ya diaparo tse di marabata tsa ga Sisera; thopo ya diaparo tse di marabata, lesela le le marabata, masela a a marabata a le mabedi ke thopo ya molala wa me.’

³¹ A baba botlhe ba gago, Morena, ba latlhege jalo! Mme ba ba go ratang ba tshwana le letsatsi, fa le tlhaba ka kgalalelo ya lone.” Jaanong lefatshe la nna mo kagisong dinyaga di le 40.