Basiamisi 12 - Setswana 1970

Ifetha le Baeferaime

¹ Jaanong banna ba Eferaime ba kuiwa, ba ya kwa bokone, ba feta ba raya Ifetha ba re: “Ke ka ntlha ya eng fa e rile o bolola go tlhabana le Baamone, wa se ka wa re bitsa go ya nao? Re tla go tshubela mo ntlong ya gago ka molelo.”

² Mme Ifetha a ba fetola a re: “Nna le morafe wa me re ne re le mo ntweng e kgolo thata le Baamone, ka lo kua, mme lwa gana go tla go mpholosa mo diatleng tsa bone.

³ Jaanong ya re ke bona lo sa nthuse, ka tsenya bophelo jwa me mo kotsing, ka bololela Baamone, mme Morena a ba neela mo diatleng tsa me. Ke ka ntlha ya eng fa lo mpololetse kajeno go tlhabana le nna?”

⁴ Ke fa Ifetha a kgobokanya banna botlhe ba Gileate, a tlhabana le Baeferaime, mme ba bolaya Baeferaime; ka gonne Baeferaime ba ne ba buile ba re: “Lo bafalodi ba Eferaime fela;” Gileate o fa gare ga Eferaime le Manase.

⁵ Mme ba Gileate ba tseela Baeferaime matsibogo a Joretane. Jaanong e ne ya re fa motshabi wa Baeferaime a re: “Nteng ke tshele!” banna ba Gileate ba mmotse ba re: “A o Moeferaime?” Fa a re: “Nnyaya!”

⁶ ba mmuise ba re: “E re Šibolethe!” Mme fa a re Sibolethe, a sa ele tlhoko go bua ka tshwanelo, ba mo tshware ba mmolae fa matsibogong a Joretane. Ka sebaka seo ga bolawa Baeferaime ba le 42 000.

⁷ Ifetha e ne e le tlhogo ya Baiseraele dinyaga tse thataro. Ifetha wa kwa Gileate a ba a swa, a fitlhwa mo motseng wa gagwe kwa Gileate.

Baatlhodi Ibesane le Elone le Abetone

⁸ Sehularong sa gagwe Baiseraele ba okamelwa ke Ibesane wa kwa Betleheme.

⁹ Ene o ne a na le bomorwa ba le 30, a nyadisa bomorwadie ba ba 30 ba tswa lapeng la gagwe, a ba a nyadisa bomorwawe basadi ba le 30 ba tswa kwa gongwe. A atlhola Iseraele dinyaga di supa.

¹⁰ Ibesane a ba a swa, a fitlhwa mo Betleheme.

¹¹ Sehularong sa gagwe Baiseraele ba busiwa ke Elone wa Mosebulone; a etelela Iseraele pele dinyaga di le some.

¹² Elone wa Mosebulone a ba a swa, a fitlhwa kwa Ayalone, mo nageng ya Sebulone.

¹³ Sehularong sa gagwe Baiseraele ba siamisediwa ke Abetone morwa Hilele wa kwa Phirathone.

¹⁴ A na le bomorwa ba le 40 le bana ba bana ba le 30 ba ba palameng diesele di le 70. A siamisetsa Baiseraele dinyaga di le 8.

¹⁵ Abetone morwa Hilele wa kwa Phirathone a ba a swa, a fitlhwa kwa Phirathone mo nageng ya Eferaime mo thabeng ya Amaleke.