Bahebera 3 - Setswana 1970

Keresete o feta Moše. Tlhagiso ka ga go sa dumeleng le go sa utlweng

¹ Ka ntlha ya moo, lona ba ga etsho, ba lo itshepileng, ba lo leng baabelwi ba pitso ya legodimo, elang Jesu tlhoko, Morongwi le Moperesiti yo mogolo wa maipolelo a rona,

² yo o neng a le boikanyo mo go ona o o mo dirileng, jaaka le ene Moše a ne a le boikanyo mo ntlong yotlhe ya ona.

³ Gonne yoo o kailwe a tshwanetswe ke kgalalelo e kgolo go feta Moše, fela jaaka ene yo o agileng ntlo a na le tlotlo e kgolo go feta ntlo.

⁴ Gonne ntlo nngwe le nngwe e agiwa ke motho, mme yo o agileng dilo tsotlhe ke Modimo.

⁵ Le gale Moše o ne a le boikanyo mo ntlong yotlhe ya ona jaaka modiredi, gore a supe ka ga dilo tse di tla bolelwang,

⁶ mme Keresete o boikanyo jaaka Morwa yo o okametseng ntlo ya ona o ntlo ya ona e leng rona, fa e le gore re tshegeditse phuthologo ya maikutlo le poko ya tsholofelo ka tlhomamo go ya bokhutlong.

⁷ Ka moo utlwang ka fa Mowa o o Boitshepo o buang ka teng o re: “Kajeno, fa lo utlwa lentswe la ona,

⁸ se thatafatseng dipelo tsa lona jaaka mo kgakatsegong ka letsatsi la thaelo kwa sekakeng,

⁹ kwa borraeno ba nthaetseng teng mo tekong, ba ntse ba bonye ditiro tsa me dinyaga di le 40.

¹⁰ Ke ka moo ke neng ka galefela losika loo ka re: ‘Ba timela ka gale ka dipelo; mme ga ba a ka ba lemoga ditsela tsa me,’

¹¹ mo ke bileng ka ikana ka bogale jwa me ka re: ‘Ga ba nke ba tsena mo boikhutsong jwa me!’ ”

¹² Bakaulengwe, tlhokomelang gore go se nne ope wa lona yo o pelo e bosula e e sa dumeleng ka go tenegela o o tshelang.

¹³ Mme kgothatsanyang ka letsatsi lengwe le lengwe, go sa ntse go twe: “kajeno!” gore go se nne ope wa lona yo o thatafadiwang ka tsietso ya boleo.

¹⁴ Gonne re diregile ba ba nang le seabe mo go Keresete, fa re tshegeditse boikanyo jwa ntlha ka tlhomamo go ya bokhutlong.

¹⁵ Fa go twe: “Kajeno, fa lo utlwa lentswe la ona, se thatafatseng dipelo tsa lona jaaka mo kgakatsegong!”

¹⁶ Kana ke bomang ba ba neng ba utlwa, ba be ba gakatsa Modimo? A ga se botlhe ba ba neng ba huduga kwa Egepeto ka Moše?

¹⁷ Mme ke bafe ba o ba galefetseng dinyaga di le 40? A ga se ba ba neng ba leofile, ba direpa tsa bona di neng tsa namalala kwa sekakeng?

¹⁸ Mme ba o ba ikanetseng gore ga ba nke ba tsena mo boikhutsong jwa ona ke bafe, fa e se ba ba neng ba gana go utlwa?

¹⁹ Mme re bona, fa ba paletswe ke go tsena ka ntlha ya go sa dumeleng.