Bahebera 1 - Setswana 1970

Keresete o feta baengele kgakala

¹ E rile Modimo o sena go bua gantsi le ka mekgwa e mentsi le borraetsho ka baporofeti mo metlheng ya bogologolo,

² wa bua le rona mo bofelong jwa malatsi ano ka Morwaa-ona yo o mmeileng morua-boswa wa dilo tsotlhe, yo e bileng o dirile mafatshe ka ene.

³ Ke ene marang a kgalalelo ya ona le setshwano sa bodimo jwa ona, o tshegeditse dilo tsotlhe ka lefoko la thata ya gagwe; ya re a sena go dira phepafatso ya dibe, a nna ka fa letsogong le le jang la Borena kwa magodimong,

⁴ a nna mogolo go feta baengele, jaaka a filwe boswa jwa leina le legolo bogolo go maina a bone.

⁵ Gonne ke ofe wa baengele yo o kileng wa mo raya wa re: “O Morwaake, ke go tsetse kajeno”? Wa ba wa re: “Ke tla nna rraagwe, mme ene o tla nna Morwaake”?

⁶ Mme e tla re o tsisa Motsalwapele gape mo lefatsheng, o laele o re: “Baengele botlhe ba Modimo ba tshwanetse go mo obamela.”

⁷ Fa e le ka ga baengele, o buile wa re: “O dira baengele ba ona diphefo le badiredi ba ona dikgabo tsa molelo.”

⁸ Mme o raya Morwa o a re: “Modimo, sedulo sa bogosi sa gago ke sa bosakhutleng; thobane ya bogosi jwa gago ke thobane ya tshiamo.

⁹ O ne o rata tshiamo, mme o tlhoa tshiamololo; ke gona ka moo, Modimo, Modimo wa gago o go tloditseng lookwane lwa boitumelo go gaisa balekane ba gago.”

¹⁰ Gape wa re: “Wena Morena, o theile lefatshe mo tshimologong, magodimo ke ditiro tsa diatla tsa gago.

¹¹ Tseo di tla nyelela, mme wena o nnetse ruri, mme tsona tsotlhe di tla onala jaaka seaparo.

¹² O tla di mena jaaka kobo, jaaka seaparo, di tla fetolwa, mme wena o ntse o le yo o leng ene; dinyaga tsa gago ga di nke di khutla.”

¹³ Mme ke ofe wa baengele yo o kileng wa mo raya wa re: “Dula ka fa letsogong la me le le jang, ke tle ke tsamae ke dire baba ba gago sebeo sa dinao tsa gago”?

¹⁴ Bone botlhe a ga se mewa e e direlang, e e romelwang tirelong ka ntlha ya ba ba tla ruang pholoso boswa?