Bagalatia 5 - Setswana 1970

Moapostolo o kgothatsa Bagalatia go itshwarelela ka kgololesego ya bokeresete

¹ Keresete o re gololetse kgololesego; tlhomamang he mo go yona, mme lo se ka lwa golegwa gape ka joko ya botlhanka.

² Reetsang, nna Paulo ke lo raya ke re: Fa lo ka rupa, Keresete o tla bo a sa lo thuse sepe.

³ Ke bolelela gape motho mongwe le mongwe yo o rupang ke le mosupi gore o tshwanetse go dirafatsa molao otlhe.

⁴ Lona ba lo ratang go siamisiwa ka molao, lo kgaoganye le Keresete, lo ole mo boitshwarelong.

⁵ Gonne rona re lebeletse se se solofelwang sa go siamisiwa ka Mowa le ka tumelo.

⁶ Kana mo go Keresete Jesu go rupa le go sa rupeng ga go thuse, go thusa tumelo fela e e itshupang ka lorato.

⁷ Lo kile lwa siana sentle. Ke mang yo o lo kgoreleditseng gore lo se utlwe boammaaruri?

⁸ Tlhotlheletso eo ga e tswe mo go ene yo o lo bitsang.

⁹ Letlhabego le lennye le bedisa modubo otlhe.

¹⁰ Nna ke lo ikanya mo Moreneng gore ga lo nke lo nna le maikutlo a sele; mme motho yo o lo huduang o tla boga petso ya molato wa gagwe, le fa e ka nna mang.

¹¹ Mme nna, bakaulengwe, fa ba re, ke sa ntse ke rera thupiso, ke sa ntse ke bogisediwang? Kana kgopiso ya sefapaano e tla bo e tlositswe.

¹² E kete ba ba lo huduang ba ka bo ba ikgaola bonna ka bosi!

Kgothatso ya gore ba se senye kgololesego. Ditiro tsa nama; maungo a Mowa

¹³ Lona, bakaulengwe, lo bileditswe kgololesegong; fela a e se nne kgololesego ya nama e e nayang boleo taolo, mme lo direlane ka lorato.

¹⁴ Gonne molao otlhe o dirafadiwa ka lefoko le le lengwe fela le le reng: “Rata mongwe-ka-wena jaaka o ithata.”

¹⁵ Mme fa lo lomana, lo metsana, itiseng gore lo se fetsanye.

¹⁶ Mme ka re: Tsamayang ka fa Moweng, foo ga lo ne lo dirafatsa dikeletso tsa nama;

¹⁷ gonne nama e eletsa tse di tlhabanang le mowa, le mowa o eletsa tse di tlhabanang le nama; dilo tse, di emelelanye gore lo se ka lwa dira tse lo di ratang.

¹⁸ Mme fa lo gogwa ke mowa, ga lo fa tlase ga molao.

¹⁹ Ditiro tsa nama di a bonatsega, e bong tlhalo le boaka le se se maswe le boitaolo

²⁰ le tirelo-medimo e sele le tiriso ya mereo le tlhoano le komano le lefufa le dikgakalo le dikganetsanyo le diphapaano le dikgaogano tsa maitirelo

²¹ le tsa bopelotshetlha le dipolao le tsa botagwa le mediro ya tlhapelo le tse di ntseng jalo, tse ke di lo bolelelang jaaka nkile ka bua pele ka re: Ba ba dirang dilo tse di ntseng jalo ga ba nke ba rua boswa jwa puso ya Modimo.

²² Mme leungo la Mowa lone ke lorato le boitumelo le kagiso le bopelotelele le bopelontle le molemo le boikanyego

²³ le bonolo le boitshwaro le bophepa; dilo tse dintseng jalo, molao ga o ganetsanye natso.

²⁴ Kana ba e leng ba ga Keresete Jesu ba bapotse nama le dikgotelo le dikeletso.

²⁵ Fa re phela ka Mowa, a re tsamaeng ka Mowa le gona.

²⁶ A re se ka ra batla tlotlo ya boithamako, ra rumolana, ra fufegelana.