Bagalatia 1 - Setswana 1970

Tumediso

¹ Nna Paulo moapostolo – yo ke sa rongwang ke batho le e seng ka motho, mme e le ka Jesu Keresete le Modimo Rara yo o mo tsositseng mo baswing –

² le bakaulengwe botlhe ba ba nang le nna, re kwalela diphuthego tsa Galatia:

³ A bopelotlhomogi bo nne le lona le kagiso tse di tswang mo go Modimo Rraarona le mo go Morena Jesu Keresete

⁴ yo o ineetseng losong ka ntlha ya dibe tsa rona gore a re falodise mo lefatsheng leno le le bosula ka fa go rateng ga Modimo Rraarona

⁵ yo kgalalelo e leng ya gagwe ka bosenabokhutlo. Amen.

Moapostolo o gakgamalela tlhanogo ya Bagalatia, ka ba ineetse ba thuto e sele ka bonako

⁶ Ke gakgametse ka gore ene yo o lo biditseng ka bopelothomogi jwa ga Keresete, lo mo hularetse ka bonako, lwa ineela Efangele e sele,

⁷ etswe go se e sele, e le fela ka gore go na le bangwe ba ba lo huduang, ba rata go fetola Efangele ya ga Keresete.

⁸ Mme le fa rona gongwe moengele yo o tswang kwa legodimong a ka lo rerela Efangele e sele e e ganetsanyang le e re e lo reretseng, a a hutsege!

⁹ Le jaanong ke bua gape jaaka ke buile pele ka re: Fa mongwe a ka lo rerela Efangele e sele e e ganetsanyang le e lo e amogetseng, a a hutsege!

¹⁰ Fa ke re jalo, a ke batla lorato lwa batho gongwe lwa Modimo? A kampo ke batla go kgatlha batho? Kana fa nka bo ke sa ntse ke kgatlha batho, nka bo ke se motlhanka wa ga Keresete.

Paulo ga a ka a rutwa ke batho, o rutilwe ke Morena

¹¹ Bakaulengwe, ke lo itsise gore Efangele e e rerilweng ke nna ga se ya motho.

¹² E bile ga ke a e amogela mo mothong, le e seng go e rutwa ke ope, mme ke ka go e senolelwa ke Jesu Keresete.

¹³ Kana lo utlwile ka ga tsamao ya me ya pele mo thutong ya Bajuta gore ke ne ke bogisa phuthego ya Modimo gagolo thata thata, ke e senya;

¹⁴ ka ba ka tswelela pele mo Sejuteng go feta balekane ba le bantsi ba morafe wa ga etsho, ka go re thuto e re e neetsweng ke borraetsho ke ne ke e tlhoafaletse mo go fetisang.

¹⁵ Mme e rile go kgatlha Modimo o o ntlhaotseng go tswa mmeleng wa ga mmê, wa mpitsa ka bopelotlhomogi jwa ona;

¹⁶ ya re go o kgatlha go ntshenolela Morwaa-ona gore ke tle ke rere Efangele ya gagwe mo baheitaneng, ka akofa, ka se ka ka gakololana le nama le madi;

¹⁷ le gona ka se ka ka ya kwa Jerusalema kwa go bone ba e neng e le baapostolo pele ga me, mme ka ya kwa Arabia, ka ba ka boela kwa Damaseko.

¹⁸ Morago ga moo, ya re go sena go feta dingwaga di le tharo, ka ya kwa Jerusalema go itsanye le Kefa, ka ba ka tlhola nae malatsi a le 15.

¹⁹ Mme ga ke a ka ka bona baapostolo ba bangwe, fa e se Jakobo, monnaa Morena fela.

²⁰ Mme tse ke di lo kwalelang, reetsang, ke supa fa pele ga Modimo gore ga ke ake!

²¹ Morago ga moo ka ya kwa mefameng ya Siria le Kilekia.

²² Ke ne ke sa itsege ka sefatlhego mo diphuthegong tsa Jutea tse di mo go Keresete.

²³ Ba ne ba utlwile fela go twe: “Yo e rileng pele a bo a re bogisa, kajeno o rera tumelo e pele o neng a e senya.”

²⁴ Mme ba galaletsa Modimo ka ntlha ya me.