Amose 3 - Setswana 1970

¹ Utlwang lefoko le, le Morena a le buileng ka ga lona Baiseraele; ka ga losika lotlhe lo a lo ntshitseng kwa lefatsheng la Egepeto, a re:

² “Ke lona lo le losi ke lo itsileng mo ditshikeng tsotlhe tsa lefatshe; ka ntlha ya moo ke tla lo beletsa maleo otlhe a lona.”

Tiro ya moporofeti

³ A ba le babedi ba ka tsamaya mmogo, ba ise ba utlwane?

⁴ A tau e ka rora mo sekgweng e se na thopo? A tawana e tla utlwatsa modumo wa yona mo kutleng ya yona e sa tshwara sepe?

⁵ A nonyane e ka wela mo serung fa fatshe, e sa thaisiwa? A mutlwane o ka tsipoga fela, o sa tshware sepe?

⁶ Gongwe a go ka lediwa lonaka fela mo motseng, batho ba sa tshoge? A kotsi e ka dirafalela motse e Morena a sa e dirafatsang?

⁷ Gonne Morena Modimo ga a ke a dira sepe a ise a senolele baporofeti, batlhanka ba gagwe, sephiri sa gagwe.

⁸ Tau e dumile, ke mang yo o sa boifeng? Morena Modimo o buile, ke mang yo o sa boleleng Lefoko la Modimo?

Tatlhego ya Samaria

⁹ Tlhabang mokgosi, lo o tlhabele matlo a borena a kwa Asiria le matlo a borena a kwa lefatsheng la Egepeto lo re: “Phuthegelang kwa dithabeng tsa Samaria, lo bone dikhuduego tse dikgolo tsa teng le dikgatelelo tse di leng gona.”

¹⁰ Morena a re: “Ga ba itse go dira tse di siameng; tshiamololo le tshenyo ba di phuthela mo matlong a borena a bone.”

¹¹ Ke ka moo Morena Modimo o buang jaana o re: “Mmaba ke yo, o mo tikologong ya lefatshe! O tla fedisa thata ya gago; matlo a borena a gago a tla thukhuthwa dilo.”

¹² Morena o bua jaana a re: “Baiseraele ba ba agileng mo Samaria, ba ba ntseng mo ditulong tsa malao le mo diphateng tsa masela a Damaseko, ba tla pholosiwa jaaka modisa a tle a swapole memomo e le mebedi gongwe ntlha ya tsebe mo leganong la tau fela.

¹³ Utlwang, lo tle lo nne basupi mo ntlong ya ga Jakobe,” go bua Morena, Modimo, Modimo wa masomosomo.

¹⁴ “Ka letsatsi le ke beletsang Baiseraele ditlolo tsa bone ka lone, ke tla be ke senye dialetare tse di kwa Bethele gore dinaka tsa aletare di kgaolwe, di wele fa fatshe.

¹⁵ Ke tla thubaka ntlo ya mariga mmogo le ya selemo; mme matlo a dinaka tsa ditlou a tla nyelela, matlo a mantsi a senyega,” go bua Morena.