2 Timoteo 4 - Setswana 1970

¹ Ke go ikanisa fa pele ga Modimo le fa pele ga Keresete Jesu yo o tla atlholang baphedi le baswi, le ka ponatshego ya gagwe le ka puso ya gagwe, ke re:

² Rera Lefoko o nne yo o ipaakantseng ka nako e e leng yona le e e seng yona; supa molato, o kgalemele, o laye ka bopelotelele jotlhe le ka thuto;

³ gonne go tla tla sebaka se ba tla ganang thuto e e itekanetseng ka sona; mme ba tla ikgobokanyetsa baruti ka fa dikgatlhegong tsa bona ba ba ba tlakisang ditsebe.

⁴ Ba tla iphaposa ditsebe mo boammaaruring, ba fapogela dinaaneng.

⁵ Mme wena, o nne tekano mo dilong tsotlhe, o itshokele dipogiso, o dire tiro ya moreri wa Efangele, o fetse tirelo ya gago ka botlalo.

Paulo o leba bokhutlo jwa gagwe. O ipiletsa Timotheo. Kitsiso ka ga batho ba bangwe

⁶ Nna ke setse ke tla dirwa setlhabelo, nako ya me ya go swa e fitlhile.

⁷ Ke tlhabanye tlhabano e e molemo, ke weditse tshiano, ke bolokile tumelo.

⁸ Jaanong ke setse ke beetswe serwalo sa tshiamo se Morena Moatlhodi yo o siameng o tla se nnayang ka letsatsi leo, mme e seng nna ke le nosi, le bona botlhe ba ba ratang ponatshego ya gagwe.

⁹ Itlhaganele go tla kwano go nna ka bonako;

¹⁰ gonne Demase o ntlogetse, ka a ratile lefatshe leno, o ile kwa Thesalonika. Keresekese o ile kwa Galatia, Tito o ile kwa Dalematia.

¹¹ Ke Luka fela yo ke nang nae. Tsaya Mareko, o be o tle nae; gonne o tla nthusa thata mo tirelong.

¹² Tigiko ene ke mo rometse kwa Efeso.

¹³ Kobo e ke e tlogetseng mo go Karepo kwa Teroase, e re o tla, o e ntlele, le dikwalo, bogolo tsa matlalo.

¹⁴ Aleksantere wa mothudi o ntiretse bosula jo bogolo; Morena o tla mmusetsa ka fa ditirong tsa gagwe.

¹⁵ Le wena, o itise mo go ene; gonne o ganeditse mafoko a rona thata.

¹⁶ Mo boikarabelong jwa ntlha jwa me ga go a ka ga ema ope le nna, ba ntshabetse botlhe; a ba se ka ba bonwa molato ka ntlha ya moo.

¹⁷ Mme Morena ene o ne a ema le nna, a nthatafatsa gore ke tle ke rere Efangele go ya bokhutlong, mme baheitane botlhe ba utlwe; ka ba ka gololwa mo leganong la tau.

¹⁸ Morena o tla nkgolola mo tirong nngwe le nngwe e e bosula, a mpholosa, a nkisa mo pusong ya gagwe ya legodimo. A kgalalelo e nne ya gagwe go ya bosakhutleng! Amen.

Tumediso

¹⁹ Dumedisa Periseka le Akwila le ba lapa la ga Onesiforo.

²⁰ Eraseto o setse kwa Korinthe, Terofimo ke mo tlogetse kwa Mileto a lwala.

²¹ Itlhaganele go tla, mariga a ise a tsene. Eubulo a re, o dumele; le Putese le Leno le Kelaudia le bakaulengwe botlhe ba a go dumedisa.

²² A Morena Jesu Keresete a nne le mowa wa gago; a bopelotlhomogi bo nne le lona!