2 Samuele 22 - Setswana 1970

Dafita o lebogela diphenyo tsa gagwe ka sefela

¹ Dafita o ne a tumisa Morena ka mafoko a sefela se ka letsatsi le Morena o neng a mo pholositse ka lone mo diatleng tsa baba botlhe ba gagwe le tsa ga Saule

² a re: Morena ke lefika la me le kago ya phemelo ya me le mopholosi wa me.

³ Modimo wa me ke lefika la phemelo ya me, ke tla tshabela kwa go ona; ke thebe ya me le lonaka lwa pholoso ya me le kago ya phemelo ya me le botshabelo jwa me le mothusi wa me, o nkgolola mo kgatelelong.

⁴ E ne ya e re fa ke bitsa Morena yo o bakwang, ke gololwe mo babeng ba me.

⁵ Gonne merwalela ya loso e ne e ntikanyeditse; dinoka tsa tatlhego tsa ntshosa.

⁶ Megala ya felo ga baswi e ne e ntsentse gare; diru tsa loso tsa nkwela.

⁷ Ya re ke le tlalelong, ka bitsa Morena, ka ba ka tlhaeleletsa Modimong wa me; mme wa utlwa lentswe la me o le mo Tempeleng ya ona; tlhaeletso ya me ya tsena mo ditsebeng tsa ona.

⁸ Ga reketla, ga roroma lefatshe; metheo ya legodimo ya tetesela ya reketla, ka o ne o tuka bogale.

⁹ Dinko tsa ona tsa kua musi, molelo o o jang wa tswa mo molomong wa ona; magala a a tukang a tswa mo go ona.

¹⁰ Wa sekamisa legodimo wa fologa; bontsho bo le fa tlase ga dinao tsa ona.

¹¹ O ne o palame Kerubime, o fofa; o kala o le mo diphukeng tsa phefo.

¹² Wa itikanyetsa ka lefifi go nna maobo a ona; e ne e le bontsho jwa maru a a kwenneng.

¹³ Magala a molelo a tuka, a tswa phatsimong e e fa pele ga ona.

¹⁴ Morena a dumisa maru a le kwa legodimong; Mogodimodimo a utlwatsa lentswe la gagwe;

¹⁵ a thuntsha metsu, a phatlalatsa baba; a rathisa tladi, a ba tshosa.

¹⁶ Ke fa mateng a lewatle a bonala le metheo ya lefatshe e senolwa ka go kgalemela ga Morena le ka pudulo ya mowa wa nko ya gagwe.

¹⁷ A ntsha letsogo a le kwa godimo, a ntshwara; a nkinola mo metsing a magolo.

¹⁸ A mpholosa mo babeng ba me ba ba thata; mo go ba ba ntlhoileng, gonne ba ne ba le thata bogolo go nna.

¹⁹ Ba ne ba nkwela ka letsatsi la tatlhego ya me, mme Morena a nna seitsetsepelo sa me.

²⁰ A nntshetsa kwa go atlhameng, a nkgolola, ka gonne ke a mo kgatlha.

²¹ Morena a ntuela ka fa tshiamong ya me, a mpusetsa ka fa boitshekong jwa diatla tsa me.

²² Gonne ke tshegeditse ditsela tsa Morena, mme ga ke a ka ka ikepa mo Modimong wa me.

²³ Gonne tsotlhe tse di siameng fa pele ga ona ke ntse ke di tlhokomela; le ditaolo tsa ona ga ke a fapoga mo go tsona.

²⁴ Ka bo ke siame fa pele ga ona, ka itisa gore ke se nne molato.

²⁵ Ke ka moo Morena a mpuseditseng ka fa tshiamong ya me le ka fa boitshekong jwa me fa pele ga matlho a gagwe.

²⁶ O itshupa o le bopelotlhomogi mo go yo o tlhomogang pelo; o itshupa o le tlhamalalo mo monneng yo o tlhamaletseng.

²⁷ O itshupa o le phepa mo go yo o phepa, mme mo molotsaneng o itshupa o le kgopo.

²⁸ O thusa batho ba ba gateletsweng, mme matlho a gago a galefela ba ba ikgodisang; o a ba kokobetsa.

²⁹ Gonne wena o lobone lwa me, Morena; mme Morena o sedimosa lefifi la me.

³⁰ Gonne ke tlhasela lesomo la baba ka wena; ke tlola lobota ka Modimo wa me.

³¹ Tsela ya Modimo oo e itekanetse; lefoko la Morena le itshekile. Ke ene thebe ya botlhe ba ba tshabelang kwa go ene.

³² Gonne ke mang yo e leng Modimo kwa ntle ga Morena? Gape ke mang yo e leng lefika kwa ntle ga Modimo wa rona?

³³ Modimo oo ke kago ya phemelo e e thata ya me; o tsamaisa yo o itekanetseng mo tseleng ya ona.

³⁴ Ke ona o o dirang dinao tsa me jaaka tsa phele; o nkemisa mo mafelong a a godimo.

³⁵ Ke ona o o rutang diatla tsa me go tlhabana le mabogo a me go gagamatsa bora jwa kgotlho.

³⁶ O bile o nneile thebe ya pholoso ya gago; go ikinamisa ga gago go ntira mogolo.

³⁷ O atlhamolositse kgato ya me fa tlase ga me; mangenana a me ga a ka a temeka.

³⁸ Ke lateletse baba ba me, ka ba fetsa; ka se ka ka boa ke ise ke ba nyeletse.

³⁹ Ruri, ka ba nyeletsa, ka ba remaganya, mo ba se kang ba tlhola ba tsoga, mme ba wela fa tlase ga dinao tsa me.

⁴⁰ O ntlamile ka thata go ka tlhabana; wa khubamisa ba ba ntsogetseng fa tlase ga me.

⁴¹ O tshabisitse baba ba me gore ba nkhularele; ba ba ntlhoileng ka ba nyeletsa.

⁴² Ba šebašeba go batla thuso, mme go se na mothusi; ba tlhaeleletsa kwa Moreneng, mme a se ka a ba araba.

⁴³ Ka ba gatlampola jaaka lerole la lefatshe, ka ba phatlakanya jaaka seretse sa mebila, ka ba gataka.

⁴⁴ O mpholositse mo dintweng tsa morafe wa me, wa mpoloka go nna tlhogo ya merafe; batho ba ke neng ke sa ba itse ba ntirela.

⁴⁵ Bomorwa ditšhaba ba inneela ka go mpoifa; fela fa ba nkutlwela, ba tle go inkobela.

⁴⁶ Bomorwa ditšhaba ba a koafala; ba tswa mo maiphitlhong a bone, ba tetesela.

⁴⁷ Morena o a phela. A go bakwe ene lefika la me! A go godisiwe Modimo o e leng lefika la pholoso ya me;

⁴⁸ ona Modimo o o nnayang pusoloso, o o digelang merafe kwa tlase ga me

⁴⁹ o o nntshang mo babeng ba me. Wena o nkgodisetsa ba ba ntsogelang; o nkgolola mo monneng yo o setlhogo.

⁵⁰ Ka moo ke tla go baka, Morena, mo merafeng, ke opelela leina la gago;

⁵¹ wena yo o nayang kgosi e o e tlhomileng pholoso e kgolo, o direla motlodiwa wa gago ka bopelotlhomogi, e bong Dafita le losika lwa gagwe ka bosakhutleng.