1 Yohane 1 - Setswana 1970

Lefoko le bonetse mo nameng

¹ Re lo anegela se se neng se le teng go tloga tshimologong, se re se utlwileng, se re se bonyeng ka matlho a rona, se re se lebileng, se diatla tsa rona di se fophotseng, e bong sa Lefoko la botshelo –

² mme botshelo bo bonetse, re bile re bo bonye; re a supa, re lo begela botshelo jo bo sa khutleng, jo bo neng bo le fa go Rara, mme bo re bonatsegetse. –

³ Se re se bonyeng, ra se utlwa, le lona re a se lo rerela gore le lona lo nne le kopano le rona; mme kana kabelano ya rona ke ya go kopana le Rara le Jesu Keresete Morwawe.

⁴ Dilo tse re di lo kwalela gore boitumelo jwa lona e nne jo bo tletseng.

Modimo ke lesedi. Ba ba sa tsamaeng mo leseding ga ba na kopano nao

⁵ Molaetsa o re o utlwileng mo go ene, o e bileng re o lo begela ke wa go re: Modimo ke lesedi, mme ga go na lefifi lepe mo go ona.

⁶ Fa re re, re na le kopano le ona, mme re tsamaya mo lefifing, re a aka, ga re dire boammaaruri.

⁷ Mme fa re tsamaya mo leseding jaaka ona o le mo leseding, re na le kopano mongwe le yo mongwe, e bile madi a ga Jesu Keresete, Morwaa-ona, a re itshekisa boleo jotlhe.

Ka ga boipobolo jwa maleo le boitshwarelo jwa Morena

⁸ Fa re re, ga re na boleo, re a itsietsa, mme boammaaruri ga bo yo mo go rona,

⁹ mme fa re ipobola maleo a rona, ona o boikanyo le tshiamo go re itshwarela maleo le go re itshekisa tshiamololo yotlhe.

¹⁰ Fa re re, ga re a leofa, re o dira moaki, mme Lefoko la ona ga le yo mo go rona.