1 Samuele 2 - Setswana 1970

Thapelo ya ga Hana

¹ Ke fa Hana a rapela a re: “Pelo ya me e dudueletsa Morena. Lonaka lwa me lo thatafaditswe ke Morena. Molomo wa me o bulegetse baba ba me. Gonne ke itumelela pholoso ya gago.

² Ga go na ope yo o boitshepo jaaka Morena; gonne ga go na ope kwa ntle ga gago; ga go na lefika le le tshwanang le Modimo wa rona.

³ Se bueng tsa maikgantsho a magolo ka gale; a tsa matepe di se ka tsa tswa mo melomong ya lona. Gonne Morena ke Modimo o o itseng tsotlhe; ditiro di tlhatlhojwa ke ene.

⁴ Mara a dinatla a robegile; mme ba ba theekelang ba itlamile ka thata.

⁵ Ba ba neng ba kgora ba ile go jaka dijo; ba ba neng ba bolawa ke tlala ba a kgora. Moopa le ene o belege ba supa; mmabontsi o swabile.

⁶ Morena o a bolaya, e bile o a phedisa; o folosetsa kwa felong ga baswi, e bile o tlhatlosa teng.

⁷ Morena o a humanegisa, e bile o a humisa; o a kokobetsa, le gona o a godisa.

⁸ O tsosa ba ba fokolang mo leroleng, o tsholetsa bahumanegi mo thotobolong go ba nnisa le batlotlegi; o ba ruisa sedulo sa bogosi sa kgalalelo. Gonne maotwana a lefatshe ke a Morena, o beile lefatshe mo go ona.

⁹ O tla sireletsa dinao tsa baitshepi ba gagwe, mme baikepi ba tla swela mo lefifing; gonne motho ga a kgone sepe ka thata ya gagwe.

¹⁰ Ba ba lwang le Morena ba tla phatlakanngwa; o tla ba dumisetsa maru kwa legodimong. Morena o tla atlhola dikhutlo tsa lefatshe, a naya kgosi ya gagwe thata, a natlafatsa lonaka lwa motlodiwa wa gagwe.”

¹¹ Jaanong Elekana a boela kwa lapeng la gagwe kwa Rama. Ngwana ene a sala, a direla Morena fa pele ga moperesiti Eli.

Boikepo jwa bomorwa Eli

¹² Mme bomorwa Eli ba ne ba le bosula, ba sa re sepe ka Morena.

¹³ Ba tlhokomologa tse di laoletsweng baperesiti mo morafeng. E ne ya re fa motho a tlhaba setlhabelo, go tle motlhanka wa moperesiti, nama e ntse e apewa, a tshotse seroophata;

¹⁴ a tlhabe mo pitseng gongwe mo pitsaneng gongwe mo paneng gongwe mo sejaneng. Sengwe le sengwe se seroophata se se ntshang moperesiti a se itseele. Ba ne ba direla Baiseraele botlhe jalo ba ba tlang gona kwa Silo.

¹⁵ Le gona e ne ya re ba ise ba tshube mafura, go tle motlhanka wa moperesiti, a ree monna yo o tlhabang setlhabelo a re: “Ntsha nama e e besediwang moperesiti. Gonne ga a ka ke a amogela nama e e apeilweng mo go wena fa e se e tala fela.”

¹⁶ Mme e ne ya re fa motho a mo raya a re: “Mafura a tshwanetse go tshubiwa pele, morago ga moo o itseele ka fa o ratang ka teng!” ene a fetole a re: “Nnyaya! E mphe jaanong. Go seng jalo, ke tla e tsaya ka thata.”

¹⁷ Boleo jwa makau ao bo ne bo le bogolo thata fa pele ga Morena, ka a ne a nyatsa tshupelo ya Morena.

Samuele o nna kwa Silo

¹⁸ Mme Samuele o ne a ntse a direla fa pele ga Morena, e le mosimane yo o apereng khiba ya letseta.

¹⁹ Le gona mmaagwe o ne a tle a mo direle kojwana, a mo tlele nayo ka ngwaga le ngwaga, fa a tlhatlogela teng le monna wa gagwe go tlhaba setlhabelo sa ngwaga.

²⁰ Foo Eli a tshegofatse Elekana le mosadi wa gagwe a re: “A Morena a go nee bana ka mosadi yo boemong jwa ngwana yo a mo kopileng, a mo tsalela Morena.” Jaanong ba ye kwa gae.

²¹ Mme Morena a direla Hana molemo; a ithwala, a tshola gape bana ba basimane ba le bararo le ba basetsana ba le babedi. Mosimane Samuele ene a golela kwa Moreneng.

Eli le bomorwawe

²² Eli o ne a tsofetse thata. Fela e ne e tle e re fa a utlwa tsotlhe tse bomorwawe ba neng ba di direla Baiseraele botlhe le ka fa ba lalang ka teng le basadi ba ba direlang fa mojakong wa Tempelana ya Boipontsho,

²³ a ba ree a re: “Ke ka ntlha ya eng fa lo dira dilo tse di bosula jalo, tse ke di utlwang mo morafeng otlhe o?

²⁴ Nnyaya, bomorwaaka! Tumedi e ke e utlwang ga e molemo. Lo leofisa morafe wa Morena.

²⁵ Fa motho a leofela motho, moatlhodi o ka mo atlholela. Mme fa motho a leofela Morena, ke mang yo o ka mo emelang?” Mme ba se ka ba utlwa lentswe la ga rraabo; gonne Morena o ne a ikaeletse go ba bolaya.

²⁶ Mme mosimane Samuele a nna a gola, a ratwa ke Morena le batho.

Polelelopele ka ga tatlhego ya lelapa la ga Eli

²⁷ Letsatsi le lengwe monna wa Modimo a tla kwa go Eli, a mo raya a re: “Morena o bua jaana a re: ‘A ga ke re, ke iponaditse sentle mo go ba ga eno, fa ba sa le kwa Egepeto mo taolong ya ga Farao?

²⁸ Ka ba itlhophela mo ditsong tsotlhe tsa Iseraele go nna baperesiti gore ba palame mo aletareng ya me go fisa maswalo le go apara khiba ya boperesiti fa pele ga me; ka naya ba ga eno ditlhabelo tsotlhe tse di dirwang ka molelo tsa Baiseraele.

²⁹ Ke ka ntlha ya eng fa lo nyatsa setlhabelo sa me le tshupelo ya me tse ke di laotseng go nna tsa moago wa me; ke eng fa o tlotla bomorwao bogolo go nna, lo inontsha ka tse di tlhaotsweng mo ditshupelong tsotlhe tsa Iseraele morafe wa me?’

³⁰ Ke ka moo Morena Modimo wa Iseraele o buang a re: ‘Ka nnete ke ne ke rile: Ba lapa la gago le ba lapa la ga rraago ba tla sepela fa pele ga me ka bosakhutleng. Mme jaanong go kgakala le nna! Ke tla tlotla ba ba ntlotlang; mme ba ba nnyatsang ba tla nyatsega.’ Morena a re jalo.

³¹ ‘Bona, malatsi a e tla a ke tla kgaolang letsogo la gago le letsogo la lelapa la ga rraago ka ona gore go se ka ga nna monna wa motsofe mo lapeng la gago.

³² Mme tsotlhe tse di molemo tse Morena o di direlang Baiseraele o tla di leba ka khutsafalo. Ga o kitla o nna le motsofe mo lapeng la gago ka metlha yotlhe.

³³ Ke a le mongwe fela wa ga eno yo ke se neng ke mo nyeletsa, ke mo tlosa mo aletareng ya me, e se re gongwe ka ledisa matlho a gago le go tlhokofatsa pelo ya gago, mme botlhe ba ba tla tsalwang mo lapeng la gago ba tla swa ba ise ba tsofale.

³⁴ Sesupo mo go wena se se tla dirafalelang bomorwao ba babedi Hofeni le Phinehase ke sa go re: Ba tla swa ka letsatsi le le lengwe ka bobedi jwa bone.

³⁵ Mme ke tla itlhomela moperesiti yo o ikanyegang; o tla dira tse di mo pelong ya me le mo moweng wa me. Ke tla mo naya losika lo lo tlhomameng; o tla sepela fa pele ga motlodiwa wa me ka metlha yotlhe.

³⁶ Mongwe le mongwe wa masalela a lelapa la gago o tla tla, a mo ikôbêla go kopa ledi la selefera le kgolokwe ya senkgwe a re: A ko o ntsenye mo tirong ya boperesiti, ke tle ke je thathana ya senkgwe.’ ”