1 Litihalo 4 - Setswana 1970

Lotso lwa ga Juta

¹ Bomorwa Juta ke Pherese le Heserone le Karemi le Hure le Sobale.

² Mme Reaya morwa Sobale a tsala Jahathe, Jahathe a tsala Ahumai le Lahate; ke tsona ditshika tsa ba Sorea.

³ Etame le Iserele le Isema le Itebase – leina la kgaitsadia-bone e le Haseleleponi –

⁴ le Phenuele rraagwe Ketore le Esere rraagwe Huša e ne e le bomorwa Hure morwa Eferatha wa ntlha Rra-Betleheme.

⁵ Mme Asehure Rra-Thekoa o ne a na le basadi ba le babedi Helea le Naara.

⁶ Naara a tshola nae Ahusame le Hefere le Themeni le Baahasethari. Ke bone bomorwa Naara.

⁷ Mme bomorwa Helea e ne e le Serethe le Isehare le Ethenane le Kose.

⁸ Kose a tsala Anube le Hasobeba le Jabese le ditshika tsa ga Aharehele morwa Harume.

⁹ Mme Jabese o ne a tlotlega bogolo go bomorwa-rraagwe. Mmaagwe o ne a mo teile leina la Jabese a re: “Kana ke mmelege ka botlhoko.”

¹⁰ Jabese o ne a rapela Modimo wa Iseraele a re: “E kete o ka bo o ntshegofatsa thata wa atlhamolosa naga ya me, mme seatla sa gago sa nna le nna, wa thibela bosula gore bo se ka jwa ntlhokofatsa!” Mme Modimo wa mo direla jaaka a kopile.

Ba ditso tse dingwe

¹¹ Mme Kelobe morwa-rraagwe Suha a tsala Mehire; ke ene rraagwe Esethone.

¹² Esethone a tsala Betherafa le Phasea le Thehina Rra-motse wa Nahase. Ke bone banna ba Rega.

¹³ Bomorwa Kenase ke Otheniele le Seraya. Bomorwa Otheniele ke Hathathe le Meonothai.

¹⁴ Meonothai a tsala Ofera; Seraya a tsala Joabe Rra-molapo wa ditswerere; gonne e ne e le ditswerere.

¹⁵ Bomorwa Kalebe morwa Jefune ke Iru le Ela le Naame; morwa Ela ke Kenase.

¹⁶ Bomorwa Jehalelele ke Sife le Sifa le Thireya le Asarele.

¹⁷ Bomorwa Esera ke Jethere le Merete le Efere le Jalone. Bomorwa Bithia morwadia Farao yo Merete o neng a mo nyetse, ba ene o ba belegeng ke Miriame le Samai le Iseba rraagwe Ešethemoa.

¹⁸ Mme mosadi wa gagwe wa Mojuta a belega Jerete rraagwe Ketore le Hebere rraagwe Sogo le Jehuthiele rraagwe Sanoa.

¹⁹ Bomorwa mosadi wa ga Hodiya kgaitsadia Nahame ke rraagwe Kehila wa kwa Karemi le Ešethemoa wa kwa Maaga.

²⁰ Bomorwa Simone ke Amenone le Rina le Benehanane le Thilone; bomorwa Isei ke Sohethe le Benesohethe.

Lotso lwa ga Sela

²¹ Bomorwa Sela morwa Juta ke Ere rraagwe Lega le Laeta rraagwe Mareša le ditshika tsa balogi ba letseta ba kwa Asebea;

²² le Jokime le banna ba Koseba le Joase le Sarafe ba ba neng ba busa Moabe, le Jasubileheme. Kana ke dikgang tsa bogologolo.

²³ Bone e ne e le babopi ba dinkgwana, ba agile kwa Netaime le kwa Ketera; ba agile fa kgosing ba le mo tirong ya yona.

Lotso lwa ga Simeone

²⁴ Bomorwa Simeone ke Nemuele le Jamine le Jaribe le Sera le Saule;

²⁵ morwawe e le Sadume, morwawe e le Mibesame, morwawe e le Mišema.

²⁶ Morwa Mišema e ne e le Hamuele, morwawe e le Sakhure, morwawe e le Simei.

²⁷ Simei o ne a na le bomorwa ba le 16 le bomorwadi ba le barataro, mme bomorwa-rraagwe ba se na bomorwa ba bantsi. Mme losika lotlhe lwa bone lwa se ka lwa ata jaaka bomorwa Juta.

²⁸ Ba ne ba agile kwa Bereseba le Molata le Hasare-Šuale

²⁹ le kwa Bileha le Eseme le Tholate

³⁰ le kwa Bethuele le Horema le Sitlage

³¹ le kwa Bethe-Marekabothe le kwa Hasare-Susime le kwa Bethe-Biri le kwa Saaraime. Eo e ne e le metse ya bone go fitlha pusong ya ga Dafita.

³² Metsana ya bone e ne e le Etame le Aine le Rimone le Thogene le Ašane, metse e metlhano,

³³ le metsana yotlhe e e neng e le mo tikologong ya metse eo go fitlha kwa Baale. Ke one mafelo a bone. Ba bile ba ikwalela tlhomagano ya ditshika tsa bone.

³⁴ Basimeone ba bangwe ke Mesobabe le Jamelege le Josa morwa Amasia

³⁵ le Joele le Jehu morwa Josibja morwa Seraya morwa Asiele

³⁶ le Eleyoenai le Jaakoba le Jesohaya le Asaya le Adiele le Jesimiele le Benaya

³⁷ le Sisa morwa Sifei morwa Alone morwa Jetaya morwa Simeri morwa Semaya:

³⁸ Bao ba ba umakilweng ka maina e ne e le ditlhogo mo ditshikeng tsa bone, mme malapa a bone a ata, ba nna bantsi.

³⁹ Mme ba ya kwa botsenong jwa Ketore go fitlha ntlheng ya botlhabatsatsi ya molapo, go batlela matsomane a bone mafulo.

⁴⁰ Ba fitlhela mafulo a sefuti a a siameng, mme lefatshe la teng le ne le atlhame mo ntlheng tsotlhe, le iketlile le sa tshwenye ka sepe. Kana baagi ba teng ba pele e ne e le Bahame.

⁴¹ Mme bao ba ba kwadilweng fa ka maina ba ya teng mo malatsing a ga Hesekia kgosi ya Juta, ba senya ditente tsa bale mmogo le tsa Bameuni ba ba neng ba fitlhelwa teng, ba dirafatsa khutso ya Modimo mo go bone, ga se ka ga sadisiwa ope go fitlha letsatsing leno, mme ba aga teng mo boemong jwa bale; gonne go ne go na le mafulo a difutshane tsa bone teng.

⁴² Banna ba le 500 ba Basimeone ba kile ba ya kwa thabeng ya Seire, bagogi ba bone e le Phelatya le Nearia le Refaya le Usiele bomorwa Isei.

⁴³ Ba bolaya masalela a Baamaleke a a neng a falotse, ba nna teng go fitlha letsatsing leno.