1 Likhosi 6 - Setswana 1970

Salomo o aga Tempele

¹ Ka ngwaga wa 480 Baiseraele ba sena go huduga kwa lefatsheng la Egepeto, ka ngwaga wa bone wa puso ya ga Salomo mo Iseraeleng, ka kgwedi ya Siwe, e bong kgwedi ya bobedi a simolola go agela Morena Ntlo.

² Ntlo e kgosi Salomo o neng a e agela Morena boleele jwa yona e ne e le mabogo a le 60, bophara jwa yona e le mabogo a le 20, bogodimo jwa yona e le mabogo a le 30.

³ Mathudi a a neng a le mo ntlheng ya botlhabatsatsi ya Felo-ga-Boitshepo ga Ntlo ya Morena boleele jwa ona e ne e le mabogo a le 20, bo tsamaya le bophara jwa Ntlo ya Morena, bophara jwa ona e le mabogo a le some, jone bo leelefatsa Tempele jalo.

⁴ A direla Ntlo ya Morena difenstere tse di tswetsweng ka letloa la dithupa.

⁵ Ka fa ntle ga lobota lwa Ntlo ya Morena a aga kago ya koketso, mo tikologong ya dipota tsa Ntlo ya Morena, mo tikologong ya Felo-ga-Boitshepo le ya Felo fa go kwa Tengteng a dira matlwana a a tlhatlaganyeng mo tikologong.

⁶ Matlwana a a kwa tlase bophara jwa ona e ne e le mabogo a le matlhano; a a fa gare bophara jwa ona e le mabogo a le marataro; a boraro bophara jwa ona e le mabogo a supa. Gonne o ne a diretse Ntlo ya Morena dipota tsa koketso ka fa ntle mo tikologong gore matlwana ao a se ka a itshwarelela ka dipota tsa Ntlo ya Morena.

⁷ E rile Ntlo ya Morena e agiwa, ya bopelwa ka majwe a a betletsweng ruri kwa a epiwang teng; ga se ka ga utlwala noto le selepe le e seng sediri sepe sa tshipi kwa Ntlong ya Morena fa e agiwa.

⁸ Mojako wa matlwana a a kwa tlase o ne o le mo lotlhakoreng lwa borwa lwa Ntlo ya Morena, mme ka mapalamo a a tshophegileng go ne go tlhatlogelwa kwa go a a fa gare, mme go tswa kwa go a a fa gare go tlhatlogelwa kwa go a boraro.

⁹ Ya re a sena go fetsa lebotana la Ntlo ya Morena, a e tlhomesa, a e rulela ka dipati tsa mesetere tse di kgabisitsweng.

¹⁰ Kago ya koketso a e aga ka go e dikolosa le Ntlo ya Morena yotlhe; bogodimo jwa matlwana e le mabogo a le matlhano; a itshwarelela mo Ntlong ya Morena ka mephakarego ya mesetere.

¹¹ Mme Lefoko la Morena la tla kwa go Salomo la re:

¹² “Ka ga Ntlo ya Morena e e o e agang, itse gore fa o sepela ka fa melaong ya me, o dirafatsa tse di nkgatlhang, o tshegetsa ditaolo tsa me tsotlhe ka go sepela mo go tsona, ke gona ke tla dirafatsang Lefoko la me mo go wena le ke le buileng le Dafita rrago.

¹³ Foo ke tla nna mo gare ga Baiseraele, ke sa tlogele Iseraele morafe wa me.”

Kago ya Tempele

¹⁴ E rile Salomo a sena go aga Ntlo ya Morena le go e fetsa,

¹⁵ dipota tsa yona ka fa teng a di manega dipati tsa mesetere; go tloga fa fatshe go fitlha kwa ditlhomesong. Ntlo ya Morena ka fa teng a e manega dikgong; mme bodilo jwa Ntlo ya Morena a bo ala dipati tsa mesiperese.

¹⁶ A ba a aga lobota ka mo teng lo lo katoganyeng mabogo a le 20 le lobota lwa motsheo wa Ntlo ya Morena ka dipati tsa mesetere go tloga bodilong go fitlha kwa ditlhomesong; felo foo a go aga mo teng ga Ntlo ya Morena go nna Felo fa go kwa Tengteng, e bong ga Boitshepo-jwa-Maitshepo.

¹⁷ Mme boleele jwa Felo-ga-Boitshepo e ne e le mabogo a le 40; gona go le mo ntlheng ya botlhabatsatsi.

¹⁸ Ka mo teng ga Ntlo ya Morena go ne go le dikgong tsa mesetere fela; mo go tsona go setilwe diphare le dithunya tse di fololetsweng. Tsotlhe tseo e ne e le tsa mesetere go sa bonale lebotana.

¹⁹ A ba a baakanya Felo fa go kwa Tengteng mo teng ga Ntlo ya Morena go baya Letlole la Kgolagano ya Morena teng.

²⁰ Felo fa go kwa Tengteng boleele jwa gona e ne e le mabogo a le 20, bophara e le mabogo a le 20, le bogodimo e le mabogo a le 20. A go manega gouta e e sa pekwang; le gona a dira aletare ka dikgong tsa mesetere.

²¹ Salomo a manega Ntlo ya Morena ka mo teng gouta e e sa pekwang; a ba a kgaola ka dikeetane tsa gouta fa pele ga Felo fa go kwa Tengteng fa a go manegileng gouta.

²² Ntlo ya Morena yotlhe a e manega gouta, ga tsamaya a ba a fetsa Ntlo ya Morena yotlhe; le aletare yotlhe e e leng ya Felo fa go kwa Tengteng a e manega gouta.

²³ Le gona a dira boKerubime ba le babedi mo Felong fa go kwa Tengteng ka dikgong tsa olefa; boleele jwa bone e le mabogo a le 10.

²⁴ Lefuka lengwe la Kerubime le ne le le mabogo a le matlhano, le lengwe le lone le le mabogo a le matlhano; go tloga ntlheng ya lefuka leno go fitlha ntheng ya lefuka lele, e le mabogo a le some.

²⁵ Le Kerubime wa bobedi a na le bophara jwa diphuka jwa mabogo a le some; boKerubime boo babedi ba tshwana fela ka selekanyo le popego.

²⁶ Boleele jwa Kerubime yo mongwe e ne e le mabogo a le some le wa bobedi jalo.

²⁷ Mme a baya boKerubime bao fa gare ga Felo fa go kwa Tengteng, ba tsharolotse diphuka tsa bone. Lefuka la yo mongwe le ama lobota lo longwe, mme lefuka la Kerubime wa bobedi le ama lobota lo longwe. Mme diphuka tsa bone tse di fa gare ga Ntlo ya Morena di amana.

²⁸ Le boKerubime a ba manega gouta.

²⁹ Mo dipoteng tsotlhe tsa Ntlo ya Morena, mo Felong-ga-Boitshepo-jwa-Maitshepo le mo Felong-ga-Boitshepo, tikologong a seta ditshwantsho tsa boKerubime le tsa mekolane le tsa dithunya tse di fololetsweng.

³⁰ Le bodilo jwa Ntlo ya Morena mo Felong-ga-Boitshepo-jwa-Maitshepo le mo Felong-ga-Boitshepo a bo manega gouta.

³¹ Mojako wa Felo fa go kwa Tengteng a o direla ditswalo tsa dikgong tsa olefa. Mophakarego le maotwana a tsona tsa bo di na le dikhutlo tse tlhano.

³² Ditswalo tse pedi e ne e le tsa dikgong tsa olefa; a seta ditshwantsho tsa boKerubime le tsa mekolane le tsa dithunya tse di fololetsweng mo go tsona, a di manega gouta; gouta a e iteela ka noto mo go boKerubime le mo mekolaneng gore e di senole.

³³ Le mojako wa Felo-ga-Boitshepo a o direla maotwana a ditswalo ka dikgong tsa olefa fela jalo, mme e le wa dikhutlo tse nne;

³⁴ le ditswalo tse pedi tsa dikgong tsa mesiperese. Mhama o mongwe wa setswalo wa bo o na le dipati tse pedi tse di bulegelang ka ntlha tsotlhe; mhama o mongwe le ona o na le dipati tse pedi tse di bulegelang ka ntlha tsotlhe.

³⁵ A seta boKerubime le mekolane le dithunya tse di fololetsweng mo go tsona, a di manega gouta, ya iteelwa mo masetong gore e di senole.

³⁶ A aga lelapa la ka fa teng ka majwe a a betlilweng, lebota la lone a le dira mela e meraro; a le kona ka mepako ya mesetere.

³⁷ Motheo wa Ntlo ya Morena o ne o theilwe ka ngwaga wa bone wa puso ya ga Salomo ka kgwedi ya Siwe.

³⁸ Ka ngwaga wa lesome le motso, ka kgwedi ya Bule – ke kgwedi ya robedi – ga fediwa Ntlo ya Morena le dilo tsotlhe tsa yona le ditshwanelo tsotlhe tsa yona. Ya agiwa dinyaga tse di supang.