1 Bakorinta 16 - Setswana 1970

Dikatso tse di direlwang baitshepi

¹ Fa e le dikatso tse di ntshediwang baitshepi, le lona lo dire jaaka ke laetse diphuthego tsa kwa Galatia.

² A ka gale ka letsatsi la ntlha la tshipi mongwe le mongwe wa lona a beele sengwe fa thoko, a kgobokanye ka fa a tlhogonolofaditsweng ka teng, e se ka ya re gongwe fa ke tla, ka fitlhela e le gona go phuthwang.

³ Mme e tla re fa ke sena go goroga, bone ba lo ba tlhaotseng ke ba rome ka dikwalo go isa dikatso tsa lona kwa Jerusalema.

⁴ Mme fa di lekanye go isiwa ke nna, ba tla tsamaya le nna.

Maikaelelo a ga Paulo a go eta, le ditumediso

⁵ Ke tla tla koo go lona ke raletse Maketonia; gonne Maketonia ke tla mo ralala fela,

⁶ mme mo go lona motlhamongwe ke tla diega, gongwe ke be ke feletse mariga teng, gore lo tle lo mphelegeletse kwa ke tla yang teng.

⁷ Gonne ga ke rate go lo bona jaanong ka go feta fela; mme ke solofela gore ke tla tlhola le lona sebakanyana, fa Morena a ka letlelela jalo.

⁸ Kwa Efeso gona ke tla nna teng go fitlha Pentekoste;

⁹ gonne ke buletswe mojako o mogolo teng wa tiro e e nang le lesego, e bile baganetsi ba le bantsi ba teng.

¹⁰ E re fa Timotheo a goroga, lo dire gore a nne mo go lona a se na poifo; gonne o dira tiro ya Morena fela jaaka nna.

¹¹ Jaanong a go se nne ope yo o mo nyatsang, mme mmulediseng ka kagiso gore a tle go nna; gonne nna le bakaulengwe re mo lebeletse.

¹² Fa e le Apolo, mokaulengwe, ene ke mo rapetse thata gore a ye koo go lona mmogo le bakaulengwe. Mme o ne a sa rate ka gope go ya koo jaanong; o tla tla ka sebaka se se mo lebanyeng.

¹³ Itiseng lo tlhomame mo tumelong, itsholeng senna lo tie!

¹⁴ A tsotlhe tsa lona di dirwe ka lorato!

¹⁵ Bakaulengwe, ke a lo rapela – Lo itse ba ntlo ya ga Setefane gore ke bone badumedi ba ntlha ba Agaya, mme ba ineetse mo tirelong ya go direla baitshepi –

¹⁶ ka re: Le lona lo ikokobeletse ba ba ntseng jalo le mongwe le mongwe yo o itapisang ka go dira le rona.

¹⁷ Ke itumeletse go tla ga Setefane le Fortunato le Agaiko; gonne ba emetse lona ba lo seng teng.

¹⁸ Gonne ba lapolositse mowa wa me le mewa ya lona. Tlotlang ba ba ntseng jalo!

¹⁹ Diphuthego tsa Asia di a lo dumedisa. Akwila le Perisila ba lo dumedisa thata mo Moreneng, le phuthego e e mo ntlong ya bone.

²⁰ Bakaulengwe botlhe ba a lo dumedisa. Dumedisanyang ka katlo e e boitshepo.

²¹ Nna Paulo ke lo kwalela tumediso ka letsogo la ka.

²² Fa mongwe a sa rate Morena, a a hutsege! Marana tha!

²³ A bopelotlhomogi jwa ga Jesu Keresete Morena bo nne le lona!

²⁴ Lorato lwa me lo mo go lona lotlhe ka Keresete Jesu. Amen.