Yone 2 - BAEBELE e e Boitshepo

Thapelo ya ga Jona

¹ Foo Jona a rapela Jehofa Modimo wa gagwe, a le mo mpeng ya leruarua.

² A re: “Ka ntlha ya pitlagano ya me ka biletsa kwa go Jehofa, mme a nkaraba, ka goa ke le mo mpeng ya Bobipo, mme wa utlwa lentswe la me.

³ Gonne o ne wa ntatlhela mo botenyeng, mo pelong ya mawatle, mme morwalela o ne o ntsentse gare; dintelo tsotlhe tsa gago, le makhubu a gago a metsi a ne a ntlolela godimo.

⁴ Mme ka re: ‘Ke latlhegetse koo kwa ntle fa pele ga matlho a gago; le fa go ntse jalo ke tlaa ba ke leba kwa tempeleng ya gago e e boitshepo.’

⁵ Metsi a ne a mpharafere, go ya go fitlha le kwa moweng; boteng bo ne bo le tikologong ya me; malele a ne a ntharile tlhogo.

⁶ Ka fologela kwa metheong ya dithaba; lefatshe ka mephakalego ya lone la ntswalegela ka bosakhutleng; le fa go ntse jalo o ntshitse botshelo jwa me mo moleteng, wena Jehofa Modimo wa me.

⁷ E rile mowa wa me o idibala mo teng ga me, ka gakologelwa Jehofa; morapelo wa me wa ya go tsena kwa go wena, mo tempeleng ya gago e e boitshepo.

⁸ Ba ba tlhokomelang maithamako a maaka ba tlogela boutlwelobotlhoko jwa bone ka bosi.

⁹ Mme nna ke tlaa go isetsa setlhabelo ka lentswe la tebogo; ke tlaa lefa se ke se ikanneng. Poloka ke ya ga Jehofa.”

¹⁰ Mme Jehofa a bua le leruarua, mme la tlhatsetsa Jona mo lefatsheng la komelelo.