Yoele 2 - BAEBELE e e Boitshepo

Tlhaselo ya tsie e le sesupo sa letsatsi la Morena la katlholo

¹ Letsang lonaka mo Sione, lo openg mokgosi wa tshoso mo thabeng ya me e e boitshepo; a banni botlhe ba lefatshe ba rorome; gonne motlha wa ga Jehofa o etla, gonne o fa gaufi.

² Motlha wa lefifi le letobo, motlha wa maru le lefifi le le kwenneng, jaaka bosa fa bo sela le dithaba; batho ba ba tšhaba e kgolo e e thata, ga go ise go ke go nne e e tshwanang nabo, le gone ga go ketla go tlhola go nna epe morago ga bone, go ya fela dinyageng tsa dikokomana di le dintsi.

³ Molelo o laila fa pele ga bone; fa morago ga bone kgabo e a tuka; lefatshe le ntse jaaka tshimo ya Etene fa pele ga bone, mme morago ga bone ke naga e e swafetseng fela. Ee, ga go na sepe se se falotseng mo go bone.

⁴ Ponalo ya bone e ntse jaaka ponalo ya dipitse; ba bile ba taboga jaaka bapalami ba dipitse.

⁵ Go tlola ga bone go ntse jaaka modumo wa dikara, mo godimo ga dithaba go ntse jaaka modumo wa kgabo ya molelo fa e ja dirite, jaaka batho ba ba thata fa ba abetswe go tlhabana.

⁶ Ditšhaba di mo tlalelong e e mahehe ka ntlha ya bone; difatlhogo tsotlhe di khwatile.

⁷ Ba taboga jaaka batho ba ba nonofileng; ba palama lorako jaaka batlhabani; ba tsamaela gongwe botlhe mo ditseleng tsa bone, ga ba fapaane mo thulaganong ya bone.

⁸ Le gone mongwe ga a kgorometse yo mongwe; ba tsamaela gongwe, mongwe le mongwe mo tseleng ya gagwe, ba sotlhomele mo dibolaong fela ka thata, ga ba kgaogane mo go sepeleng ga bone.

⁹ Ba tlolele mo motseng; ba taboge mo godimo ga lorako; ba palamele mo matlong; ba tsene ka fa diponeng jaaka legodu.

¹⁰ Lefatshe le reketle fa pele ga bone; magodimo a rorome, letsatsi le fifale le kgwedi, le dinaledi di gonyetse phatsimo ya tsone.

¹¹ Jehofa o ntsha lentswe la gagwe fa pele ga ntwa ya gagwe; gonne ntwa ya gagwe e e tlhaolelang e kgolo thata; gonne go thata yo o dirafatsang lefoko la gagwe. Gonne motlha wa ga Jehofa o mogolo, o boitshega thata; mme e mang yo o ka o itshokelang?

Batho ba bilediwa mo boikwatlhaong

¹² “Le gompieno,” go bua Jehofa, “retologelang mo go nna ka pelo yotlhe, le ka go ikitsa go ja, le ka go lela, le ka go hutsafala.”

¹³ Lo ikgagole dipelo, e seng diaparo, lo retologele mo go Jehofa Modimo wa lona, gonne o pelontle, o tletse bopelotlhomogi, o bonya go galefa, o letlotlo la boutlwelobotlhoko, mme o tle a ikwatlhaele bosula.

¹⁴ Go itse mang bo ga a ketla a retologa a ikwatlhaya, mme a tlogela tshegofatso, e bong tshupelo ya boupe, le tshupelo e e nowang ya ga Jehofa Modimo wa lona?

¹⁵ Letsang lonaka mo Sione lo itshepise go ikitsa go ja, kuang phuthego e e masisi;

¹⁶ phuthang batho, itshepiseng phuthego, phuthang banna bagolo, phuthang banyana, le ba ba anyang mabele. A monyadi a tswe mo ntlwaneng ya gagwe, le monyadwi mo borobalong jwa gagwe.

¹⁷ A baperesiti, badiredi ba ga Jehofa, ba lele fa gare ga maribela le sebeso, mme a ba re: “Jehofa, rekegela batho ba gago, o se ka wa neela boswa jwa gago kgobong, gore merafe e ba laole; ana ba tlaa bo ba buelang mo ditšhabeng ba re: ‘Modimo wa bone o kae?’ ”

¹⁸ Foo Jehofa a hufanela lefatshe la gagwe, a tlhomogela batho ba gagwe pelo.

¹⁹ Jehofa a fetola, a raya batho ba gagwe, a re: “Bonang, ke tlaa lo leretse mabele, le bojalwa jwa mofine, le lookwane, mme lo tlaa di kgora; ga nketla ke tlhola ke lo dira kgobo mo merafeng;

²⁰ ke tlaa tlosetsa ntwa ya botsheka kgakala le lona, ke tlaa e lelekela kwa lefatsheng le le sekaka le le le swafetseng, tlhogo ya yone e le mo lewatleng la botlhabatsatsi, le mogatla wa yone o le mo lewatleng la bophirimatsatsi; mme go nkga ga yone go tlaa tlhatloga, le moutlwalo wa yone o o bosula o tlaa tlhatloga, ka ba dirile dilo tse dikgolo.”

²¹ O se ka wa boifa, wena lefatshe, ipele o itumele; gonne Jehofa o dirile dilo tse dikgolo.

²² Lo se ka lwa boifa lona diphologolo tsa naga; gonne mafulo a naga a a tlhoga, gonne setlhare se a ungwa, ditlhare tsa mofeige le tsa mafine di ntsha thata ya tsone.

²³ Ke gone, ipeleng lona bana ba Sione, lo itumele mo go Jehofa Modimo wa lona; gonne o lo naya pula ya sephai ka selekanyo se se siameng, o lo nesetsa pula, pula ya sephai le pula ya kgogolammoko ka kgwedi ya ntlha.

²⁴ Dibopi di tlaa tlala mabele, le didibeletso di tlaa penologa bojalwa jwa mofine le lookwane.

²⁵ “Ke tlaa lo rebolela tsa dinyaga tse tsie e di jeleng, le boijane, le seboko, le mogokong, ntwa ya me e kgolo e nkileng ka e roma mo go lona.

²⁶ Lo tlaa jela mo letlotlong lo kgora, lo tlaa baka leina la ga Jehofa Modimo wa lona, yo o lo diretseng ka kgakgamatso; mme batho ba me ga ba ketla ba tlhajwa ke ditlhong gope.

²⁷ Lo tlaa itse fa ke le mo gare ga Iseraele, le go re ke Jehofa Modimo wa lona, mme go bo go se na ope o sele. Mme batho ba me ga ba ketla ba tlhajwa ke ditlhong gope.”

Letsatsi la Mowa wa Morena

²⁸ “Go tlaa dirala morago ga mo, go re ke thele mowa wa me mo bathong botlhe; bana ba lona ba basimane le ba basetsana ba tlaa perofesa, banna bagolo ba lona ba tlaa lora ditoro, makau a lona a tlaa bona diponatshegelo.

²⁹ Le mo batlhankeng le mo malateng ke tlaa thela mowa wa me mo metlheng eo.

³⁰ Ke tlaa bonatsa dikgakgamatso mo magodimong le mo lefatsheng, madi le molelo, le dithogomosi tsa mosi.

³¹ Letsatsi le tlaa fetolwa lefifi le kgwedi madi, pele motlha o mogolo le o o boitshegang wa ga Jehofa o ise o tle.

³² Go tlaa dirala go re, le fa e le mang yo o tlaa bitsang leina la ga Jehofa o tlaa gololwa; gonne mo thabeng ya Sione le mo Jerusalema go tlaa nna ba ba falolang, jaaka Jehofa a buile, le mo masaleleng go tlaa nna bone ba Jehofa o ba bitsang.”