Yobe 39 - BAEBELE e e Boitshepo

¹ “A o itse motlha o mafele a mafika a tsalang ka one? Kgotsa a o ka supa lobaka lwa phala go bona ngwana?

² A o ka bala dikgwedi tsa tsone tsa bonemeru, kgotsa a o itse motlha o di tsalang ka one?

³ Di khubame, di tsale bana ba tsone, di latlhele mahutsana a tsone kwa ntle.

⁴ Bana ba tsone ba anye fela, ba thugugele mo nageng e e lobala fela; ba tsamaye, mme ba sa tlhole ba boa.

⁵ E mang yo o lesitseng esela ya naga ya tsamaya fela, kgotsa mang yo o hunolotseng dikgole tsa pitse e tilotsana,

⁶ e ntlo ya yone ke e dirileng, e bong naga, le lefatshe la dimpu e nne felo kwa e nnang gone?

⁷ E sotla tlhapeo wa motse, le gone ga e utlwe kgalemo ya mokgweetsi.

⁸ Namalalo ya dithaba ke mahulo a yone, mme e batle sengwe le sengwe se setala.

⁹ A nare e tlaa itumela go go direla? Kgotsa a e ka nna fa bojelong jwa gago?

¹⁰ A o ka golega nare ka kgole ya yone mo temong, kgotsa a e tlaa kokola mekgatšha e go setse morago?

¹¹ A o tlaa e ikanya, ka gobo thata ya yone e le kgolo, kgotsa a o tlaa e tlogelela tiro ya gago?

¹² A o tlaa e dumela gore e tlaa rora peo ya gago, e ba e kokoanya mabele a sebopi sa gago?

¹³ Lofuka lwa ntšhe lo a ebela; mme a diphafa tsa gagwe di na le bopelonomi, le fa e le bobowa jwa gagwe?

¹⁴ Gonne o tlogela mae a gagwe fa fatshe, o a thuthafatse mo loroleng.

¹⁵ A lebale fa lonao lo ka tla lwa a thuba, kgotsa fa sebatana se ka a gataka.

¹⁶ O direla bana ba gagwe ka peloethata, jaaka ekete ga se ba gagwe; le fa tiro ya gagwe e le lefela, ga a na poifo;

¹⁷ gonne Modimo o mo timile botlhale, le gone ga o a ka wa mo abela tlhaloganyo.

¹⁸ Mogang o itsholeletsang godimo, o tle a sotle pitse le mopalami wa yone.

¹⁹ A o neile pitse nonofo ya yone; a o apesitse thamo ya yone moetse o o fokafokang?

²⁰ A ke wena yo o e dirileng gore e tlolatlole jaaka tsie? Go koma ga pudulo ya yone go a boitshega.

²¹ E tle e reme ka tlhako mo molapong, e itumele mo thateng ya yone: e tswe e ye go kgatlhantsha batho ba ba tlhometseng.

²² E tshege poifo, ga e tlakasele; le gone ga e neye tšhaka sekotla.

²³ Mokotlopo o tlharakanye mo go yone, le lerumo le le šadiang matlho le putlela.

²⁴ E kometse mmu ka bogale le tšararego; le gone e se ke e dumele fa e le kodu ya lonaka.

²⁵ Gongwe le gongwe fa lonaka lo lela e re: ‘Ahe,’ mme e dupelele tlhabano kgakala, le modumo wa balaodi le lošalaba.

²⁶ A segodi se fofa ka botlhale jwa gago, se tsharololela diphuka tsa sone kwa borwa?

²⁷ A ntswi yo motona o fofela kwa godimo ka taolo ya gago, mme a dire setlhaga sa gagwe kwa godimo?

²⁸ O aga mo lefikeng, mme o na le boago jwa gagwe gone, mo tlhoreng ya lefika, le mo felong fa go thata.

²⁹ A le foo a kwaye phologolo; matlho a gagwe a e bonele kgakala.

³⁰ Mamphorwana a gagwe le one a nwe madi, mme kwa go nang le ba ba bolailweng, le ene o gone.”