Yobe 3 - BAEBELE e e Boitshepo

Jobe o ngongoregela Modimo

¹ Morago ga moo Jobe a tswa molomo, a hutsa letsatsi la gagwe.

² Jobe a bua a re:

³ “A letsatsi le ke belegweng ka lone le nyelele, le bosigo jo bo buileng jwa re: ‘Go ithwelwe ngwana wa mosimane.’

⁴ A letsatsi leo e nne lefifi, a Modimo o se le tlhokomele o le godimong, le gone a lesedi le se le phatsimele.

⁵ A lefifi le moriti wa loso le le gape le le rue, a leru le le nne godimo; a gotlhe mo go ntshofatsang motshegare go le reregise.

⁶ Ka ga bosigo joo, a lefifi le lentsho le bo tshware; a bo se itumele mo malatsing a ngwaga; a bo se tsene mo palong ya dikgwedi.

⁷ Bonang, a bosigo joo bo nne lolea fela, a go se tle lentswe la boitumelo mo go lone.

⁸ A ba ba hutsang motshegare ba bo hutse, ba ba digonya go tsosa kgogela.

⁹ A dinaledi tsa lotlatlana lwa lone di nne lefifi, a bo batle lesedi, mme a bo se le bone; le gone a bo se bone dintshi tsa matlho a moso,

¹⁰ ka bo se ka jwa tswala sebopelo sa ga mme, le gone bo se ka jwa subela matlho a me khuduego.

¹¹ Ana ke ne ke sa sweleng ke sa tswa mo sebopelong, ke ne ke sa gonogeleng ke tswa mo mpeng fela?

¹² Ana mangole a ne a nkamogelelang, le mabele, fa e bo ne ne ke ne ka bona go anya?

¹³ Gonne e ne e ka bo ne ne gompieno ke rapame ke iketlile, nka bo ke robetse; foo nka bo ne ne ke le mo boikhutsong;

¹⁴ nka bo ke na le dikgosi le bagakolodi ba lefatshe, ba ba neng ba ikagela difikantswe tse di emeng di le tsosi.

¹⁵ Kgotsa nka bo ke na le magosana a a neng a na le gouta, a a neng a tlatsa mantlo a one ka selefera;

¹⁶ kgotsa nka bo ke ne ke seyo jaaka tshenyegelelo e e subegileng, jaaka banyana ba ba se kang ba buduloga gope.

¹⁷ Baikepi ba khutla go tshwenya teng; le balapi ba bona boikhutso teng.

¹⁸ Bagolegwi ba lapologa mmogo gone; ga ba utlwe lentswe la mogobagobetsi gone.

¹⁹ Ba bannye ba teng le ba bagolo; motlhanka o gololesegile mo go mong wa gagwe teng.

²⁰ Ana lesedi le newa ene yo o mo matladikeng ka ntlha yang, le botshelo, ene yo o galakegang mo moeng;

²¹ ba ba eletsang loso, mme lo sa tle; ba lo epa bogolo go dikhumo tse di fitlhilweng;

²² e le ba ba ipelang mo gogolo thata, ba ba ba itumela fa ba ka bona phupu?

²³ Ana lesedi le neelwang motho yo tsela ya gagwe e fitlhegileng, le yo Modimo o mmeetseng ka matlhaku?

²⁴ Gonne phegelo ya me e tle e tle ke ise ke je, le dipokolelo tsa me di tshologe fela jaaka metsi.

²⁵ Gonne selo se ke se boifang se tla mo go nna, le selo se ke se tshabang se a ntlela.

²⁶ Ga ke a iketla, le gone ga ke a kgaotsa, le gone ga ke na boikhutso: mme khuduego e tla fela.”