Yeremie 9 - BAEBELE e e Boitshepo

¹ A bo tlhogo ya me e ka bo e le metsi, le matlho a me a ka bo a le motswedi wa dikeledi, gore ke tle ke lelele ba ba bolailweng ba morwadia batho ba me, motshegare le bosigo!

² A bo ke ka bo ke na le felo ga bolalo ga batsamai le tsela mo nageng; gore nka bo ke tlogela batho ba me ka tswa mo go bone! gonne ke bagokafadi botlhe, phuthego ya malotsana.

³ “Ba obe loleme lwa bone, jaaka e ka bo e le bora jwa bone go tla ba bua maaka; mme ba nonofetse mo lefatsheng, mme e seng ntlheng ya boammaaruri: gonne ba tle ba tswe mo bosuleng bongwe, ba ye mo bosuleng jo bongwe, mme ga ba nkitse,” go bua Jehofa.

⁴ “A mongwe le mongwe a itise mo go wa ga gabo, ope a se ka a ikanya ngwana a rraagwe; gonne ngwanaa rramotho mongwe le mongwe o tle a tlhalefeletse yo mongwe ruri, mme mongwe le mongwe wa ga gabo motho o tle a nne a tsamaye ka ditlabeletso.

⁵ Mongwe le mongwe o tlaa tsietsa wa ga gabo, ga ba ketla ba bua boammaaruri; ba rutile diteme tsa bone go bua maaka; ba inaya letsapa la go dira boikepo.

⁶ Bonno jwa gago bo mo gare ga tsietso; ka ntlha ya tsietso ba gana go nkitse,” go bua Jehofa.

⁷ Ke gone ka moo Jehofa wa masomosomo o buang jaana, a re: “Bonang, ke tlaa ba tlhapolosa, ke ba leka; gonne ke ka bo ke dira jang ka go sele, ka ntlha ya morwadia batho ba me?

⁸ Loleme lwa bone ke motswi o o tlisang loso; lo bua tsietso; motho o a tle a bue kagiso le wa ga gabo ka molomo, mme mo pelong a mo laletse.

⁹ A ga nketla ke ba kgopololela dilo tse?” go bua Jehofa; “a mowa wa me ga o ketla o itefetsa mo morafeng o o ntseng jaana?”

¹⁰ Ke tlaa tlhabeleletsa dithaba selelo le kuruetso, le mafulo a naga khutsafalelo, gonne a fisitswe, go bile ga go tle ope ka gona; le gone batho ga ba kake ba utlwa kodu ya dikgomo; go le dinonyane tsa loapi, le diphologolo di tshabile, di ile.

¹¹ “Ke tlaa dira Jerusalema mekoakoa, boago jwa diphokoje; ke tlaa dira metse ya Juta tshwafalo go se na monni.”

¹² Monna yo o botlhale ke mang, yo o ka tlhaloganyang se? Yo molomo wa ga Jehofa o buileng nae ke mang, gore a se bolele? Ke ka ntlha yang lefatshe le sule, le šele jaaka naga, go bile go sa tle ope ka teng?

¹³ Jehofa a re: “E re ka ba latlhile molao wa me o ke o beileng fa pele ga bone, mme ba se ka ba utlwa lentswe la me, le fa e le go sepela mo go lone;

¹⁴ mme ba sepetse ka fa logwading lwa pelo tsa bone, ba ile le boBaale, mo ba go rutilweng ke borraabo.”

¹⁵ Ke gone ka moo, go bua jaana Jehofa wa masomosomo, Modimo wa Iseraele, a re: “Bonang, ke tlaa ba jesa, e bong batho ba, ke ba jese longana, ke tlaa ba nosa santlhokwe.

¹⁶ Le gone ke tlaa ba falaletsa le merafe e ba iseng ba ke ba e itse le fa e le borraabo; mme ke tlaa ba latedisa tšhaka, go tsamaye ke ba nyeletse.”

Batho ba Jerusalema ba a lela ba kopa thuso mo Moreneng

¹⁷ Go bua jaana Jehofa wa masomosomo, a re: “Lo gopole, mme lo bitse basadi ba khutsafalelo gore ba tle; lo romele basadi ba ba matsetseleko gore ba tle:

¹⁸ A ba itlhaganele, mme ba re tlhabeleletse selelo, gore matlho a rona a tshologe dikeledi, le dintshi tsa matlho a rona di gorometse metsi.

¹⁹ Gonne modumo wa khutsafalelo o a utlwala o tswa Sione, o re: ‘Ana re thopilwe jang! Re sosobagantswe, ka re latlhile lefatshe, ka ba digile manno a rona.’ ”

²⁰ Le fa go ntse jalo utlwang tlheng lefoko la ga Jehofa, lona basadi, mme a ditsebe tsa lona di amogele lefoko la molomo wa gagwe, lo rute bomorwadia lona kuruetso, le mongwe le mongwe a rute wa ga gabo khutsafalo.

²¹ Gonne loso lo tlhatlogile lo tsenye ka diipone tsa rona, lo tsenye mo matlong a dikgosi tsa rona; go tla lo kgaola banyana kwa ntle, le makau mo mebileng.

²² Bua o re: Jehofa o bua jaana, a re: “Ditoto tsa batho di tlaa wela mo nageng e e lobala fela jaaka boloko, le jaaka mabelenyana a tle a we mo seatleng sa mosegi, mme go se na ope yo o tlaa a selang.”

²³ Jehofa o bua jaana, a re: “A motho yo o botlhale a se ipelafatse ka botlhale jwa gagwe, le motho yo o thata a se ipelafatse ka thata ya gagwe, a mohumi a se ipelafatse ka khumo ya gagwe;

²⁴ mme yo o ipelafatsang a a ipelafatse ka go re o a ntlhaloganya, o a nkitse fa ke le Jehofa yo ke dirang bopelonomi jwa lorato, le katlholo, le tshiamo, mo lefatsheng; gonne ke natefelwa ke dilo tseo,” go bua Jehofa.

²⁵ “Bonang, metlha e etla,” go bua Jehofa, “e ke tlaa betsang botlhe ba ba rupisitsweng mo bokgoleng jwa bone ka yone;

²⁶ Egepeto, le Juta, le Etome, le bana ba Amone, le Moabe, le botlhe ba ba sekotsweng ditlhogo, ba ba agileng mo nageng, gonne merafe yotlhe ga e a rupa, le ba ntlo ya Iseraele botlhe ga ba a rupa mo pelong.”