Yeremie 4 - BAEBELE e e Boitshepo

Baiseraele ba lopiwa go ikwatlhaya

¹ “Fa o tlaa boa, wena Iseraele,” go bua Jehofa, “o tlaa boela mo go nna; mme fa o ka tlosa makgapha a gago fa pele ga me, foo ga o ketla o tlosiwa;

² o tlaa ikana, o re: ‘Jaaka Jehofa a tshedile,’ mo boammaaruring, mo tshiamisong le mo tshiamong; mme merafe e tlaa itshegofatsa, mo go ene, e tlaa ikgantsha ka ene.”

³ Gonne Jehofa o bua jaana le banna ba Juta le Jerusalema, a re: “Lemang lefatshe la lona thobu, mme lo se ka lwa jala mo mitlweng.

⁴ Ithupisetseng Jehofa, lo tlose bokgola ja pelo tsa lona, lona banna ba Juta le banni ba Jerusalema; tšarafalo ya me e ka tla ya tswa jaaka molelo, ya tuka mo go sa kakeng ga tingwa ke ope, ka ntlha ya bosula jwa ditiro tsa lona.”

Juta o gomagomelwa ke go tlhaselwa

⁵ Bolelang mo Juta, lo itsise mo Jerusalema; lo re: “Letsang lonaka mo lefatsheng; opang mokgosi thata, lo re: ‘Phuthegang, a re tseneng mo metseng e e thekeleditsweng.’

⁶ Tlhomang mokgele o lebe kwa Sione; tshabang, se diegeng, gonne ke tlaa lere bosula bo tswa ntlheng ya botsheka, le tshenyo e kgolo.”

⁷ Tau e tlhatlogile mo setswatsweng sa yone, le mosenyi wa merafe; o mo tseleng, o dule mo felong ga gagwe, go tla go swafatsa lefatshe la gago gore metse ya gago e tle e gokgolelwe e se na monni.

⁸ Ka ntlha ya moo lo itlamelele ka letsela la kgetse, lo hutsafale, lo bokolele; gonne bogale jo bo fisang jwa ga Jehofa ga bo a boa mo go rona.

⁹ “Mme go tlaa dirala mo motlheng oo,” go bua Jehofa, “go re pelo ya kgosi e tlaa rema, le pelo ya dikgosana; le baperesiti ba tlaa ja kgakge, le baperofeti ba tlaa gakgamala.”

¹⁰ Foo ka re: “Ao, Jehofa Modimo! Ruri o a bo o tsieditse tšhaba e thata, le Jerusalema, wa re: ‘Lo tlaa bona kagiso’; etswa tšhaka e tsenetse mo moweng.”

¹¹ E tlaa re mo motlheng oo go tlaa rewa tšhaba e, le ba Jerusalema, go twe: “Phefo e e molelo e e tswang kwa dithoteng tse di loforotlho kwa bogareng ga naga e tlaa e lebile morwadia batho ba me, e seng go olosa le fa e le go ntlafatsa;

¹² phefo e e thata e e tswang kwa go tseo e tlaa tla ka ga me; jaanong le gone ke tlaa bua ditshekiso ka ga bone.”

Juta o dikanyeditswe ke baba

¹³ Bonang o tlaa nyeloga jaaka maru, dikara tsa gagwe di tlaa nna jaaka setsuatsue; dipitse tsa gagwe di fefoga bogolo go bontswi, Ija! A bo re latlhegile, gonne re thopilwe!

¹⁴ Jerusalema, tlhapisa pelo ya gago boikepo, gore o tle o bolokwe. Ana megopolo ya gago e e bosula e tla tlhola nao ka lobaka lo lo kaye?

¹⁵ Gonne lentswe lengwe le bolela kwa ntlheng ya Dane, le kakanya bosula ntlheng ya makhujana a Eferaime.

¹⁶ Lomang merafe tsebe; bonang, kakanyang ka ga Jerusalema, lo re: “Ditlhola di tswa lefatsheng le le kgakala, di opela metse ya Juta mokgosi.

¹⁷ Jaaka baleti ba tshimo ba o dikile; ka a ne a ntse a ntsuololela;” go bua Jehofa.

¹⁸ “Mokgwa wa gago le ditiro tsa gago di go lereditse dilo tse; jo ke jone boikepo jwa gago; gonne bo bogalaka, ka go bo bo tsenela mo pelong ya gago.”

Jeremia o lelela batho ba gagwe

¹⁹ Mala a me we, mala a me we! Ke botlhoko le mo pelong ya me tota; pelo ya me e tlhobaela mo teng ga me; ke retelelwa ke go didimala; gonne wena mowa wa me, o utlwile modumo wa lonaka, le tshoso mokgosi wa dira.

²⁰ Go kuiwa tshenyego mo tshenyegong; gonne lefatshe lotlhe le thopilwe; megope ya me e thopilwe ka tshoganetso, matsela a dilepelelo a me ka ponyo ya leitlho.

²¹ Ke tlaa bona mokgele ka lobaka lo lo kaye, ke ba ke utlwa modumo wa lonaka?

²² “Gonne batho ba me ba boeleele, ga ba nkitse; ke bana ba sekamatagwa, ga ba na tlhaloganyo epe; ba botlhale go dira bosula, mme ga ba na kitso ya go dira molemo.”

Ponatshegelo ya ga Jeremia e e supang go senngwa ga lefatshe

²³ Ka leba lefatshe, mme bonang, la bo le tobekanye fela le sa itsege sepe; le magodimo, mme a ne a se na lesedi.

²⁴ Ka leba dithaba, mme bonang, tsa bo di roroma, le makhubu otlhe a golorela kwa le kwa.

²⁵ Ka leba, mme bonang, ga bo go se na motho, le dinonyane tsotlhe tsa loapi di ne di tshabile.

²⁶ Ka leba, mme bonang, leota le le emang loungo le ne le le naga fela, mme metse yotlhe ya teng e ne e rutlologile ka sebonalo sa ga Jehofa, le fa pele ga bogale jwa gagwe jo bo tukang.

²⁷ Gonne go bua jaana Jehofa, a re: “Lefatshe lotlhe le tlaa nna tshwafalo; le fa go ntse jalo ga nketla ke nyeleletsa ruri.

²⁸ Lefatshe le tlaa hutsafalela moo, le magodimo kwa godimo a tlaa nna mantsho; ka go bo ke se buile, ke se ikaeletse, mme ga ke a ikwatlhaya, le gone ga nketla ke boa mo go sone.”

²⁹ Motse otlhe o tshaba ka modumo wa bapalama dipitse, le wa bahudi ka bora; ba tsena mo ditswatsweng, ba palamela mo mafikeng; motse mongwe le mongwe o tlogetswe fela, mme ga go na motho yo o nnang mo go one.

³⁰ Wena o tlaa re o thopilwe, o tlaa dirang? Le fa o ka ikapesa ka bohibidu jo bo letlhololo, le fa o ka ikgabisa ka mekgabo ya gouta, le fa o ka itshasa matlho go a dira makalaba, wa bo o itirela bontle lefela fela; dinyatsi tsa gago di a go nyatsa, di senka botshelo jwa gago.

³¹ Gonne ke utlwile lentswe jaaka e kete la mosadi a le mo pelegong, tlalelo e e mahehe e kete ya mongwe yo e leng gone o bonang ngwana wa ntlha, lentswe la morwadia Sione, a hupetse mowa, mme a ntsha diatla, a re: “Jo we! Gonne mowa wa me o idibala fa pele ga babolai.”