Yehoshue 13 - BAEBELE e e Boitshepo

Lefatshe le le santseng le na le go tsewa

¹ Jaana Jošua o ne a tsofetse, a le dinyaga di le dintsi; mme Jehofa a mo raya, a re: “O tsofetse, o dinyaga di dintsi, mme go sa na le lefatshe le letona le le nang le go ruiwa.

² Lefatshe le le sa ntseng le setse ke le: Lefatshe lotlhe la Bafilisitia, le la Bagešure lotlhe;

³ go tswa Shihore o o amanang le Egepeto, go ya fela kwa molelwaneng wa Ekerone ntlheng ya botsheka, o o balelwang Bakanana; barena ba batlhano ba Bafilisitia; Bagasa, le Baašetote, le Baašekelone, le Bagite le Baekerone;

⁴ le bone Baafime, ntlheng ya borwa; lefatshe lotlhe la Bakanana, le Meara o e leng wa Basitone, go fitlha kwa Afeke, kwa molelwaneng wa Baamore;

⁵ le lefatshe la Bagebale, le Lebanone otlhe ntlheng ya botlhabatsatsi, go tswa Baalagate fa tlase ga thaba ya Heremone go ya kwa botsenong jwa Hamathe:

⁶ Banni botlhe ba lefatshe la makgabana, go tswa Lebanone go ya Miserefothe-maime, e bong Basitone botlhe; bone, ke tlaa ba lelekela kwa ntle fa pele ga bana ba Iseraele; mme lefatshe o le abele Iseraele ka bola go nna boswa, jaaka ke go laotse.

⁷ Ke gone jaana, kgaoganya lefatshe boswa mo ditsong tse di ferang o le mongwe, le ntlha e nngwe ya lotso lwa ga Manase.”

Go kgaoganngwa ga lefatshe le le kwa botlhabatsatsi jwa Joretane

⁸ Barubene, le Bagate ba amogetse nae boswa, jo Moše o bo ba neileng kwa moseja ga Joretane, ntlheng ya botlhabatsatsi, fela jaaka Moše motlhanka wa ga Jehofa a ne a ba naya;

⁹ go tswa Aroere o o fa losing lwa molapo wa Arenone, le motse o o fa gare ga molapo, le lobala lotlhe lwa Meteba go ya Dibone;

¹⁰ le metse yotlhe ya ga Sihone kgosi ya Baamore, yo o ne a busa mo Hešebone, go ya molelwaneng wa bana ba ga Amone;

¹¹ le Gileate, le molelwane wa Bagešure, le Bamaaka, le thaba yotlhe ya Heremone, le lefatshe lotlhe la Bašane go ya Saleka;

¹² bogosi jotlhe jwa ga Oge mo Bašane, ene yo o ne a busa mo Ašetarothe le mo Eterei, (ke ene yo o ne a setse wa bosalela jwa Barefaime); gonne bao Moše o ne a ba kgemetha, a ba leleka.

¹³ Le fa go ntse jalo bana ba Iseraele ba se ka ba leleka Bagešure, le fa e le Bamaaka; Gešure le Maaka ba aga mo gare ga Iseraele, nako e sa le eno.

¹⁴ Lotso lwa ga Lefi ke lone losi lo o se kang a lo naya boswa; ditshupelo tsa ga Jehofa, Modimo wa Iseraele, tse di dirwang ka molelo, ke tsone boswa jwa gagwe, jaaka a buile nae.

Lefatshe le le neilweng Rubene

¹⁵ Moše a abela lotso lwa bana ba ga Rubene ka fa ditshikeng tsa bone.

¹⁶ Molelwane wa bone o le go tswa kwa Aroere, o o fa losing lwa molapo wa Arenone, le motse o o mo gare ga molapo, le lobala lotlhe lwa Meteba;

¹⁷ Hešebone, le metse yotlhe ya teng e e mo lobaleng; Dibone le Bamothe-baale, le Bethe-baalemeone;

¹⁸ le Jahase, le Ketemothe, le Mefaathe;

¹⁹ le Kiriathaime, le Sibema, le Serethe-šahare mo thoteng ya molapo;

²⁰ le Bethepeore, le meripo ya Pisega, le Bethe-ješimothe;

²¹ le metse yotlhe ya lobala, le bogosi jotlhe jwa ga Sihone, kgosi ya Baamore, yo o ne a busa mo Hešebone, yo Moše o ne a mo kgemetha le bagolwane ba Midiane, Efi, le Rekeme, le Sure, le Hure, le Reba, le dikgosana tsa ga Sihone, tse di ne di agile mo lefatsheng leo.

²² Le ene Balaame morwa Beore, wa moitseanape, bana ba Iseraele ba mmolaya ka tšhaka, mo gare ga ba bangwe ba ba bolailweng ke bone.

²³ Molelwane wa bana ba ga Rubene e ne e le Joretane, le mola wa one. Joo e ne e le jone boswa jwa bana ba ga Rubene ka fa ditshikeng tsa bone, metse le metsana ya gone.

Lefatshe le le neilweng Gate

²⁴ Moše a naya lotso lwa Gate, bana ba ga Gate ka fa ditshikeng tsa bone.

²⁵ Molelwane wa bone e le Jasere, le metse yotlhe ya Gileate, le bontlhanngwe jwa lefatshe la bana ba ga Amone, go ya kwa Aroere o o amanang le Raba;

²⁶ le go tswa Hešebone go ya Ramathe-misepe, le Betonime; le go tswa Mahanaime go ya molelwaneng wa Debire;

²⁷ le mo molapong, Betheharame, le Bethenimera, le Sukothe, le Safone, mo go setseng ga bogosi jwa ga Sihone kgosi ya Hešebone, Joretane le mola wa one go ya fela kwa bofelong jwa lewatle la Kinerethe kwa moseja ga Joretane, ntlheng ya botlhabatsatsi.

²⁸ Jo ke jone boswa jwa bana ba ga Gate ka fa ditshikeng tsa bone, metse le metsana ya teng.

Lefatshe le le kwa botlhaba jwa Manase

²⁹ Moše a abela bontlhanngwe jwa lotso lwa ga Manase boswa; ya bo e le jwa bontlhanngwe jwa lotso lwa bana ba ga Manase ka fa ditshikeng tsa bone.

³⁰ Molelwane wa bone o ne o tswa Mahanaime, lefatshe lotlhe la Bašane, bogosi jotlhe jwa ga Oge kgosi ya Bašane, le metse yotlhe ya Jaire e e mo Bašane, metse e le 30;

³¹ bontlhanngwe jwa Gileate, le Ašetarothe, le Eterei, metse ya bogosi jwa ga Oge mo Bašane, e ne e le ya bana ba ga Makire morwa Manase, e bong bontlhanngwe jwa bana ba ga Makire ka fa ditshikeng tsa bone.

³² Ke one maswa a Moše o ne a a aba mo dipaleng tsa Moabe, kwa moseja ga Joretane fa Jeriko, ntlheng ya botlhabatsatsi.

³³ Lotso lwa ga Lefi, Moše a se ka o lo naya boswa bope; Jehofa Modimo wa Iseraele ke ene boswa jwa bone, jaaka a buile nabo.