Tshenolo 21 - BAEBELE e e Boitshepo

Legodimo le leša le lefatshe le leša

¹ Ka bona legodimo le leša le lefatshe le leša; gonne legodimo la ntlha le fetile, le lefatshe la pele; le lewatle ga le tlhole le le yo.

² Ka bona motse o o boitshepo, Jerusalema o moša, o fologa mo legodimong o tswa kwa Modimong, o etleeditswe jaaka monyadwi yo o kgabetseng monna wa gagwe.

³ Ka utlwa lentswe le legolo le tswa mo setulong sa bogosi le re: “Bonang, boago jwa Modimo bo mo bathong, o tlaa aga nabo, ba tlaa nna batho ba one, le Modimo ka osi o tlaa nna nabo, o tlaa nna Modimo wa bone.

⁴ O tlaa phimola dikeledi tsotlhe mo matlhong a bone; ga go ketla go tlhola go le loso; le gone ga go ketla go tlhola go le bohutsana, le fa e le selelo, le fa e le botlhoko; dilo tsa pele di fetetse ruri.”

⁵ Yo o dutseng mo setulong sa bogosi a re: “Bonang, dilo tsotlhe ke di dira seša.” Mme a re: “Kwala! Gonne mafoko a, a boikanngo le boammaaruri.”

⁶ A nthaya a re: “A dirafetse. Ke nna Alefa le Omega, tshimologo le bokhutlo. Yo o nyorilweng ke tlaa mo nosa fela metsi a motswedi wa metsi a botshelo, a se na theko.

⁷ Yo o fenyang o tlaa rua dilo tse, mme ke tlaa nna Modimo wa gagwe, le ene o tlaa nna morwaake.

⁸ Ka ga ba ba magatlapa, le ba ba sa dumelang, le ba ba maswe, le babolai, le bagokafadi, le baloi, le ba ba direlang medimo ya disetwa, le baaki botlhe, kabelo ya bone e tlaa nna mo bodibeng jo bo šang ka molelo wa sulefura; mo e leng loso lwa bobedi.”

Jerusalema yo moša

⁹ Ga tla mongwe wa baengele ba supa, ba ba neng ba tshotse megotšana e supa, ba ba rweleng dipetso di supa tsa bofelo; mme a nthaya a re: “Tla kwano, ke tlaa go bontsha monyadwi, mosadi wa ga Kwana.”

¹⁰ Mme a ntsaya ke le mo Moweng, a nkisa mo thabeng e kgolo e e godileng, a mpontsha motse o o boitshepo, Jerusalema, o fologa mo legodimong kwa Modimong.

¹¹ O na le kgalalelo ya Modimo; go phatsima ga one ga bo go tshwana le lentswe le le tlhokegang thata, e kete lentswe la jasepere, le le phepa jaaka legakwa.

¹² O na le lorako lo logolo lo lo godileng; o na le dikgoro di le 12, go le baengele ba le 12 fa dikgorong; tsone tsa bo di kwadilwe maina, a e leng maina a ditso tse 12 tsa bana ba Iseraele.

¹³ Ka fa ntlheng ya botlhabatsatsi ga bo go le dikgoro di le tharo; ka fa ntlheng ya botsheka go le dikgoro di le tharo; ka fa ntlheng ya borwa go le dikgoro di le tharo; ka fa ntlheng ya bophirimatsatsi go le dikgoro di le tharo.

¹⁴ Lorako lwa motse lwa bo lo na le metheo e le 12, mo go lone go le maina a le 12 a baaposetole ba ba 12 ba Kwana.

¹⁵ Yo o buang le nna a bo a tshotse lotlhaka lwa gouta, e le selekanyo sa go lekanya motse, le mejako ya one, le lorako lwa one.

¹⁶ Motse wa bo a agilwe o le dintlha di le nne di lekalekanye fela, mme boleele jwa one bo le kana ka boatlhamo. Mme a lekanya motse ka lotlhaka, wa fitlhelwa o le dikilometara di le 2 400, go le boleele, le boatlhamo, le bogodimo jwa one, ga bo go lekalekanye fela.

¹⁷ A lekanya lorako lwa one, lwa fitlhelwa lo le bogodimo jwa dimetara di le 60 ka fa selekanyong sa motho, ke go re, sa moengele.

¹⁸ Mo go agiweng, lorako lwa one lo ne lo agilwe ka jasepere; motse o le gouta fela e e itshekileng, e tshwana le galase e e itshekileng.

¹⁹ Metheo ya lorako lwa motse e ne e kgabisitswe ka majana mangwe le mangwe a a tlhokegang. Motheo wa ntlha e le jasepere; wa bobedi, safire; wa boraro, kalesetone; wa bone emerelete;

²⁰ wa botlhano, saretonikese; wa borataro saredio; wa bosupa kerisolete; wa bo 8, berile; wa bo 9, topase; wa bosome, kerisoperase; wa bo 11, jasinthe; wa bo 12, amethesete.

²¹ Ditswalo tsa dikgoro tse di 12 e ne e le diperela di le 12; setswalo sengwe le sengwe e le perela e le nngwe fela; mmila wa motse e le gouta fela e e itshekileng, e kete galase e e phepa gotlhe fela.

²² Ga ke a ka ka bona tempele mo go one, gonne Morena Modimo Mothatayotlhe, le Kwana, ke tempele ya one.

²³ Mme motse ga o batle gore letsatsi le o phatsimele, le fa e le kgwedi; gonne kgalalelo ya Modimo e ne e o bonesa, le lampa ya one ke Kwana.

²⁴ Merafe e tlaa tsamaya mo gare ga lesedi la one; le dikgosi tsa lefatshe di tlisa kgalalelo ya tsone mo go one.

²⁵ Dikgoro tsa one ga di ketla di tswalwa gope go le motshegare, gonne ga go ketla go nna bosigo teng.

²⁶ Mme ba tlaa tlisa kgalalelo le tlotlo ya merafe mo go one.

²⁷ Ga go ketla go tsena mo go one sepe se se itshekologileng gope, le fa e le ene yo o dirang se se makgapha le maaka; fa e se ba ba kwadilweng mo lokwalong lwa botshelo lwa ga Kwana fela.