Sehela 1 - BAEBELE e e Boitshepo

¹ Sefela sa difela, se e leng sa ga Solomone.

SEFELA SA NTLHA Sa Mosadi

² A a nkatle ka dikatlo tsa molomo wa gagwe; gonne lorato lwa gago lo molemo bogolo go bojalwa jwa mofine.

³ Ditlolo tsa gago di na le monko o o monate; leina la gago le ntse jaaka setlolo se se itshelwang; ke gone ka moo makgarebane a go ratang.

⁴ Nkgoga, re tlaa siana re go setse morago; kgosi e nkisitse mo matlwaneng a yone; re tlaa itumela re ipela mo go wena, re tlaa umaka lorato lwa gago bogolo go bojalwa jwa mofine; ba go rata ka tshiamo.

⁵ Ke montsho, mme ke montle, lona bomorwadia Jerusalema, jaaka megope ya Ketare, jaaka disiro tse di lepelelang tsa ga Solomone.

⁶ Lo se ka lwa nteba, ka gobo ke le montsho, ka gobo letsatsi le mpabotse. Bomorwa mme ba ne ba nkgakaletse, ba ntira molebedi wa masimo a mafine; mme e leng tshimo ya me ya mafine ga ke a e lebela.

⁷ Mpolelela, wena yo mowa wa me o go ratang, kwa o hudisang letsomane la gago gone, kwa o le bothisang gone go le motshegare; gonne ke tlaa bo ke nnelang jaaka mongwe yo o kailang mo matsomaneng a bankane ba gago?

Sa Monna

⁸ Fa o sa itse, wena yo montlentle bogolo mo basading, tswa le motlhala wa matsomane, mme o hudise dipotsane tsa gago fa megopeng ya badisa.

⁹ Moratwa wa me, ke go tshwantshitse le pitse mo dikareng tsa ga Faro.

¹⁰ Marama a gago a mantle ka metshopho ya moriri, le thamo ya gago ka majana a a tlhokegang a a fololetsweng.

¹¹ Re tlaa go direla metsila ya gouta e na le kgotlwana tsa selefera.

Sa Mosadi

¹² E rile kgosi e dutse fa bojelong jwa yone, bolao jwa me jwa nareto jwa utlwatsa monko wa jone.

¹³ Mo go nna moratwa wa me o ntse jaaka ngatana ya mera, e e lalang fa gare ga mabele ame.

¹⁴ Mo go nna moratwa wa me o ntse jaaka lerose la dithunya tsa motlhatswameno mo masimong a mafine a Enegedi.

Sa Monna

¹⁵ Bona, o montle, moratwa wa me; bona, o montle; matlho a gago a ntse jaaka matseba.

Sa Mosadi

¹⁶ Bona o montle, moratwa wa me, ee, o natefo; bolao jwa rona bo bile bo botala.

¹⁷ Mesipuri ya ntlo ya rona ke masetara, le ditlhomeso tsa rona ke marukuru.