Nehemie 4 - BAEBELE e e Boitshepo

Nehemia o fenya baba ba ba kgatlhanong le kago

¹ Ga dirala e rile Sanebalate a utlwa fa re aga lorako, a nna bogale, a šakgala thata, a sotla Bajuta.

² A bua fa pele ga bomorwa rraagwe le ntwa ya Samaria, a re: “Bajutanyana ba ba seng thata ba, ba dirang? A ba tlaa ithatafatsa? A ba tlaa isa ditlhabelo? A ba tlaa swetsa ka tsatsi le le lengwe fela? A ba tlaa tsosolosa maje ba a ntsha mo mekoeng ya matlakala, jaaka go fisitswe jaana?”

³ Jaana Tobia wa Moamone o ne a le fa go ene, mme a re: “Le se ba se agang, fa phokoje a se palama, o ka thuba lorako lwa bone.”

⁴ A ko o utlwe, Modimo wa rona, gonne re a nyadiwa; o busetse dikgobo tsa bone mo tlhogong ya bone, o ba neele go thopiwa mo lefatsheng la botshwaro.

⁵ O se ka wa bipa boikepo jwa bone, a boleo jwa bone bo se phimolwe go tloga fa pele ga gago; gonne ba go tlhotlheleditse bogaleng fa pele ga baagi.

⁶ Jalo ra aga lorako; lorako lotlhe lwa kopanngwa, e seng bogodimo jotlhe, mme e leng fa gare ga lone; gonne batho ba ne ba na le pelo ya go dira.

⁷ Mme ga dirala e rile Sanebalate le Tobia le Baarabia le Baamone, le Baašetote ba utlwa fa mamatlelelo ya dithako tsa Jerusalema e tswelela kwa pele, le gore dithubego di simolola go thibala, ba nna bogale thata;

⁸ botlhe ba rera mmogo, gore ba tle ba ye go tlhasela Jerusalema, le go dira kgoberego gone.

⁹ Rona ra direla Modimo wa rona thapelo, ra ba beela ditlhola motshegare le bosigo, ka ntlha ya bone.

¹⁰ Mme Juta a re: “Thata ya barwadi ba merwalo e ngotlegile, mme go sa na le matlakala a le magolo; jalo ga re a nonofa go aga lorako.”

¹¹ Baganetsi ba rona ba re: “Ga ba ketla ba itse le fa e le go bona, re be re tle re fitlhe mo gare ga bone, mme re khutlise tiro.”

¹² Ga dirala ya re Bajuta ba ba agileng fa go bone ba tla, ba re raya gasome, ba bua ba tswa mafelong otlhe, ba re: “Lo tshwanetse go boela kwa go rona.”

¹³ Ke gone ka moo ya re mo mafelong a a kwa tlase a sebaka se se fa morago ga lorako, mo dipatlelong, ka baya batho ka fa ditshikeng tsa bone, ba tshotse ditšhaka tsa bone, le marumo a bone, le mara a bone.

¹⁴ Ka leba, ka nanoga, ka raya magosana, le balaodi, le batho ba bangwe ka re: “Lo se ka lwa ba boifa; gakologelwang Morena, yo mogolo, le yo o boitshegang, lo tlhabanele bana ba ga rraeno, le bana ba lona ba basimane le ba basetsana, le basadi ba lona, le matlo a lona.”

¹⁵ Ga dirala ya re baba ba rona ba utlwa fa go itsiwe ke rona, le go re Modimo o tsupueditse kgakololano ya bone, ra boela rotlhe kwa lorakong, mongwe le mongwe kwa tirong ya gagwe.

¹⁶ E sa le go tswa mo lobakeng loo, bontlhanngwe jwa batlhanka ba me ba dira mo tirong, bontlhanngwe jwa bone ba bo ba tshotse marumo, dithebe, mara le maitshomelo a phemelo, balaodi ba bo ba le fa morago ga botlhe ba ntlo ya Juta.

¹⁷ Ba ba agang lorako le ba ba rwalang merwalo ba ipelesa, mongwe le mongwe ka letsogo le lengwe a dira mo tirong, ka le lengwe a tshotse sebolao sa gagwe.

¹⁸ Le baagi, mongwe le mongwe a ikgatlhile ka tšhaka ka fa nokeng ya gagwe, mme a age jalo. Yo o letsang lonaka a bo a le fa go nna.

¹⁹ Ka raya magosana, le balaodi, le batho ba bangwe, ka re: “Tiro e kgolo, e bile a ntsintsi bobe, le rona re katoganye mo lorakong, mongwe o kgakala le yo mongwe.

²⁰ Kwa lo utlwang go lela ga lonaka teng, lo phuthegele teng kwa go rona; Modimo wa rona o tlaa re tlhabanela.”

²¹ Jalo ra dira mo tirong: bontlhanngwe jwa bone ba bo ba tshotse marumo go tswa lobakeng lwa mahube a moso go tsamaya dinaledi di bonala.

²² Le gone ka lobaka loo ka raya batho ka re: “A mongwe le mongwe le motlhanka wa gagwe a lale mo teng ga Jerusalema, gore e tle e re bosigo boo ba re lebelela, e re motshegare ba itse go nna kwa tirong.”

²³ Jalo go ne go le nna, go le bana ba ga rre, go le batlhanka ba me, go le banna ba tebelo ba ba ntshetseng morago, ga go a ka ga dira le ope wa rona yo o apolang diaparo, le gone mongwe le mongwe a ya nokeng a tshotse sebolao sa gagwe.