Moreri 1 - BAEBELE e e Boitshepo

Tsa lefatshe ga di na tiro

¹ Mafoko a Moreri morwa Dafite, kgosi mo Jerusalema.

² Boithamako jwa maithamako, go bua Moreri; boithamako jwa maithamako, gotlhe fela ke boithamako.

³ Motho o bona thuso yang mo tirong yotlhe ya gagwe e o dirang mo go yone tlase ga letsatsi?

⁴ Kokomana nngwe e fetela koo, mme go tle e nngwe; mme lefatshe le nnetse ruri ka bosakhutleng.

⁵ Letsatsi le lone le tle le tlhabe, le tloge gape le phirime, mme le itlhaganelele felong kwa le tlhabang gone.

⁶ Phefo e ye ntlheng ya borwa mme e retologele ntlheng ya botsheka; e tlhole e ntse e retologa fela mo tsamaong ya yone, mme phefo e boele gape kwa dipotologong tsa yone.

⁷ Dinoka tsotlhe di thelegela mo lewatleng, le fa go ntse jalo lewatle ga le a tlala; felong kwa dinoka di yang gone, di be di ye gone gape.

⁸ Dilo tsotlhe di tletse letsapa; motho ga a kake a le bolela; leitlho ga le kgore ka go bona, le tsebe ga e tlale ka go utlwa.

⁹ Selo se se neng se ntse se leyo, ke sone se se tlaa nnang; le se se ntseng se dirilwe, ke se se tlaa dirwang; ga go na sepe se seša tlase ga letsatsi.

¹⁰ A go na le sengwe se batho ba buang ka ga sone, ba re: “Bonang, se ke se seša?” Se ne se ntse se le gone mo metlheng e e fetileng pele ga rona.

¹¹ Ga go na kgakologelo epe ya dikokomana tse di fetileng pele; le gone ga go ketla go nna kgakologelo epe ya dikokomana tsa morago tse di sa ntseng di tlaa tla, mo go bone ba ba tlaa tlang kwa morago.

Maitemogelo a Moreri

¹² Nna Moreri ke ne ke le kgosi ya Iseraele mo Jerusalema.

¹³ Mme ka ineela ka pelo go batla, le go tlhotlhomisa ka botlhale, ka ga tsotlhe tse di dirwang tlase ga legodimo; ke letsapa le le botlhoko le Modimo o le neileng bana ba batho go lekisiwa ka lone.

¹⁴ Ke bonye ditiro tsotlhe tse di dirwang tlase ga letsatsi; mme gotlhe fela ke boithamako le go belebetlela phefo fela.

¹⁵ Se se sokameng ga se kake sa siamisiwa; le se se tlhokafalang ga se kake sa balwa.

¹⁶ Ka bua le pelo ya me, ka re: “Bona, ke ipapaletse botlhale jo bogolo go feta botlhe ba ba neng ba le pele ga me mo Jerusalema; ee, pelo ya me e na le tlwaelano e kgolo le botlhale le kitso.”

¹⁷ Mme ka ineela ka pelo go itse botlhale, le go itse botsenwa le bosilo; ka lemoga fa mo, le gone e le go belebetlela phefo fela.

¹⁸ Gonne mo bogolong jwa botlhale go na le bogolo jwa mahumapelo; le gone yo o kokotletsang kitso o kokotletsa bohutsana.