Mike 6 - BAEBELE e e Boitshepo

Jehofa o kgatlhanong le Iseraele

¹ Utlwang jaana se Jehofa o se buang; “Nanoga, o ganele fa pele ga dithaba, mme a makhubu a utlwe lentswe la gago.

² Utlwang, lona dithaba kgang ya ga Jehofa, le lona metheo ya lefatshe e e sa onaleng; gonne Jehofa o na le kgang le batho ba gagwe, mme o rata go ganetsanya le Iseraele.

³ Ao, lona batho ba me, ke lo dirileng? ke lo lapisitse ka eng? Supang ka ga me.

⁴ Gonne ke lo ntshitse kwa lefatsheng la Egepeto, ka lo rekolola mo ntlong ya botlhanka; ka roma Moše fa pele ga lona, le Arone, le Miriame.

⁵ Ao, lona batho ba me, a ko lo gakologelwe jaana se Balake kgosi ya Moabe o ne a se gopotse, le ka fa Balaame morwa Beore o ne a mo fetola ka teng; lo gakologelwe go tswa Shitime go ya Gilegale, gore lo itse ditiro tse di siameng tsa ga Jehofa.”

Se Jehofa o se batlang

⁶ Ke tlaa ya fa pele ga Jehofa ka eng, ke ikoba fa pele ga Modimo wa Bogodimo? A ke tlaa ya fa pele ga one ka ditshupelo tse di fisiwang, ka dinamane tse di ngwaga o le mongwe fela?

⁷ A Jehofa o tlaa itumelela dikete tsa diphelefu, kgotsa dinoka tsa lookwane di le dikete di le some? A ke tlaa ntshetsa tlolo ya me ngwana wa me yo mogolo, loungo lwa mmele wa me ka ga boleo jwa mowa wa me?

⁸ O go supeditse se se molemo motho ke wena; gape Jehofa o lopang mo go wena, fa e se gore o dire ka tshiamo, le go rata boutlwelobotlhoko, le go sepela ka boikokobetso le Modimo wa gago?

⁹ Lentswe la ga Jehofa le biletsa kwa motseng, mme motho yo o botlhale o tlaa boifa leina la gago. “Reetsang thupa le ene yo o e laotseng.

¹⁰ A go sa ntse go na le dikhumo tsa tshiamololo mo ntlong ya basiamolodi, le selekanyo se se tlhaelang, se se tlhoesegileng?

¹¹ A ke tlaa bo ke itshekile ke na le selekanyo sa pego sa tshiamololo, le kgetse ya makete a dilekanyo tsa bokete tsa tsietso?

¹² Gonne bahumi ba teng ba tletse thubakanyo, le banni ba teng ba buile maaka, le loleme lwa bone lo tsietso fela mo molomong wa bone.

¹³ Ke gone ka moo le nna ke go iteileng ka ntho e e botlhoko; ke go swafaditse ka ntlha ya maleo a gago.

¹⁴ O tlaa ja, mme ga o ketla o kgora; mme lolea lwa gago lo tlaa nna mo gare ga gago; mme o tlaa huduga, mme ga o ketla o rora sentle, le se o se rorang ke tlaa se neela tšhaka.

¹⁵ O tlaa jala mme ga o ketla o roba; o tlaa gata ditlhware, mme ga o ketla o tlola lookwane; o tlaa gata difine, mme ga o ketla o nwa bojalwa.

¹⁶ Gonne ditao tsa ga Omeri di a tshegediwa, le ditiro tsotlhe tsa ntlo ya ga Ahabe; lo bile lo sepela mo dikgakololong tsa bone, gore ke tle ke go dire tshwafalo, le banni ba gone kotso; mme lo tlaa belega kgobo ya batho ba me.”