Mareko 5 - BAEBELE e e Boitshepo

Go fodisiwa monna yo o tsenyweng ke mowa o o maswe

¹ Ba fitlha kwa moseja ga lewatle, mo lefatsheng la Bagerasa.

² Ya re a sena go tswa mo mokorong, a akofa a kgatlhana le monna mongwe yo o nang le mowa o o maswe, a tswa mo diphupung;

³ yo boago jwa gagwe bo leng mo diphupung; mme ga bo go se ope yo o ka tlholang a mo golega, nnyaa, le fa e le ka ketane;

⁴ gonne o ne a kile a golegwa gantsi ka mefiri le diketane, mme diketane a di komaganye, le mefiri a e thubaganye. Go ne go se ope yo o nonofileng go mo kgwabofatsa.

⁵ Ka gale le gale, bosigo le motshegare, a le mo diphupung le mo dithabeng, a bo a ntse a goa, a itshegaka ka maje.

⁶ Mme ya re a bona Jesu a sa le kgakala, a taboga, a ya a mo obamela.

⁷ A goa ka lentswe le legolo a re: “Ke dirang ka wena, Jesu Morwa Modimo Mogodimodimo? Ke go ikanisa ka Modimo, o se ka wa ntlhokofatsa.”

⁸ Ka gobo o ne a o reile a re: “Tswa mo monneng yo, mowa o o maswe ke wena!”

⁹ Mme a mmotsa a re: “Leina la gago ga twe o mang?” A fetola a re: “Leina la me ke Mophato, gonne re bantsi.”

¹⁰ Mme a mo rapela thata gore a se ka a e leleka mo lefatsheng leo.

¹¹ Jaana ka fa mofapheng wa thaba ga bo go le serapa se segolo sa dikolobe, di fula.

¹² Mme ya mo rapela ya re: “Mma re ye mo dikolobeng gore re tsene mo go tsone.”

¹³ Mme a e leseletsa. Mewa e e maswe ya tswa, ya tsena mo dikolobeng; mme serapa sa kgokologela ka mapawa mo lewatleng, e ka ne e le di le 2 000; mme tsa betwa ke lewatle.

¹⁴ Ba ba di disitseng ba tshaba, ba ya ba bolela mo motseng, le mo lefatsheng. Batho ba ya go bona gore se se diretseng ke eng?

¹⁵ Mme ba tla mo go Jesu, ba fitlhela ene yo o neng a tsenywe ke mewa e e maswe a bile a dutse a apere, a ikutlwa sentle, e bong ene yo o neng a na le mophato; mme ba boifa.

¹⁶ Ba ba bonyeng ka matlho ba ba kakanyetsa ka fa go dirafaletseng ene yo o ne a tsenywe ke mewa e e maswe ka teng, le ka ga dikolobe.

¹⁷ Ba simolola go mo rapela gore a tswe mo lefatsheng la bone.

¹⁸ Mme ya re a tsena mo mokorong, yo o neng e tsenywe ke mewa e e maswe a mo rapela gore a nne nae.

¹⁹ Mme a se ka a mo leseletsa, a mo raya a re: “Ya kwa gaeno kwa ditsaleng tsa gago, o ba bolelele dilo tse dikgolo tse Morena o di go diretseng, le jaaka a go tlhomogetse pelo.”

²⁰ Mme a tsamaya, a ya a simolola go utlwatsa mo Dekapolise dilo tse dikgolo tse Jesu o di mo diretseng; mme batho botlhe ba gakgamala.

Morwadia Jairo le mosadi yo o amileng diaparo tsa ga Jesu

²¹ E rile Jesu a sena go ba a tshelela kwa moseja o mongwe ka mokoro, bontsi jo bogolo jwa batho jwa phuthegela kwa go ene, a le fa lewatleng.

²² Mme ga tla mongwe wa balaodi ba ntlo ya thuto, go twe Jairo; mme ya re a mmona a wela fa dinaong tsa gagwe.

²³ A mo rapela thata a re: “Morwadiake wa ngwanyana o fela mo losong, ke a go rapela, o tlo o tle, o beye diatla tsa gago mo go ene gore a fodisiwe, a tshele.”

²⁴ Jesu a ya nae; batho le bone ba le bantsi ba mo sala morago, ba mo kgotlhaganyetsa.

²⁵ Mme mosadi yo o sa leng a lwala ka go tshologa madi ka dinyaga di le 12,

²⁶ mme a bogile dilo di le dintsi ka dingaka di le dintsi, a bile a fedisitse dilo tsotlhe tsa gagwe, mme a sa bone thusego epe, bogolo bolwetse bo golela pele fela,

²⁷ ya re ka a utlwa ka ga Jesu, a tla a tsena mo bontsing fa morago, a ama seaparo sa gagwe,

²⁸ gonne o ne a re: “Fa nka ama le fa e ka bo e le diaparo tsa gagwe fela, ke tlaa fola.”

²⁹ Mme ka bonako go elela ga madi mo go ene ga khutla; a ikutlwa mo mmeleng wa gagwe fa a fodisitswe mo petsong ya gagwe.

³⁰ Ka bonako, ka Jesu a itemoga fa thata e dule mo go ene, a retologa mo kgotlhaganyong a re: “Yo o amileng diaparo tsa me e mang?”

³¹ Barutwa ba gagwe ba mo raya ba re: “O a bona fa bontsi bo go kgotlhaganyeditse, mme wa re o amilwe e mang?”

³² Mme a ba kobakoba go bona ene yo o dirileng selo se.

³³ Mme mosadi ka a ikitse se se dirilweng mo go ene, a boifa a roroma, a tla a wela fa pele ga gagwe, a mmolelela boammaaruri jotlhe fela.

³⁴ Mme a mo raya a re: “Morwadiaka, tumelo ya gago e go fodisitse; tsamaya ka kagiso, o fole mo petsong ya gago.”

³⁵ Ya re a sa ntse a bua, bangwe ba tla, ba tswa kwa ntlong ya molaodi wa ntlo ya thuto, ba re: “Morwadio o sule, ana o sa ntse o lapisetsang moruti?”

³⁶ Mme Jesu, a tlhokomologa lefoko le le buiweng, a raya molaodi wa ntlo ya thuto a re: “O se ka wa boifa, dumela fela.”

³⁷ Mme a se ka a leseletsa ope go ya nae, fa e se Petere, le Jakobe le Johane monnawe Jakobe.

³⁸ Ba fitlha kwa ntlong ya molaodi wa ntlo ya thuto; mme a fitlhela go le khuduego, batho ba le bantsi ba lela, ba kurueletsa godimo.

³⁹ Ya re a sena go tsena a ba raya a re: “Lo direlang khuduego jaana, lo lela? Ngwana ga a a swa, o robetse.”

⁴⁰ Mme ba mo tshega ka tshotlo. Ene ya re a sena go ba ntshetsa botlhe kwa ntle, a tsaya rrangwana le mmaagwe, le bone ba o nang nabo, a tsena kwa ngwana o leng teng.

⁴¹ A tshwara ngwana ka seatla, a mo raya a re: “Talitha kumi,” ke go re fa go phuthololwa: “Morweetsana ke a go raya, tsoga.”

⁴² Ka bonako morweetsana a tsoga, a tsamaya ka dinao, gonne o ne a le dinyaga di le some le bobedi. Ba gakgamala ka kgakgamalo e kgolo.

⁴³ Mme a ba laya thata gore go se itse ope selo se; mme a laola gore a fiwe dijo.