Luke 24 - BAEBELE e e Boitshepo

Tsogo ya ga Jesu

¹ E rile ka letsatsi la ntlha la beke, go le ka maphakela, ba ya kwa phupung, ba tshotse malao a ba a baakantseng.

² Ba fitlhela lentswe le pitikolotswe le tlositswe fa phupung.

³ Mme ba tsena mo teng, mme ba se ka ba fitlhela mmele wa Morena Jesu.

⁴ Ga dirala, ya re ba sa ntse ba akabetse thata ka ga gone, bonang, banna ba le babedi ba ema fa go bone, ba apere diaparo tse di tsabakelang;

⁵ ka ba boifa, ba ikobela ditlhogo fa fatshe, ba ba raya ba re: “Lo batlelang motshedi mo baswing?

⁶ Ga a yo fa; o tsogile; gakologelwang ka fa o buileng le lona ka teng, a sa ntse a le kwa Galilea.

⁷ A re: ‘Morwa Motho o na le go neelwa mo diatleng tsa batho ba boleo, le go bapolwa, le go ba a tsoga ka letsatsi la boraro.’ ”

⁸ Ba gakologelwa mafoko a gagwe.

⁹ Ba boa kwa phupung, ba ya ba bolelela ba ba 11, le ba bangwe botlhe dilo tse tsotlhe fela.

¹⁰ Jaana e ne e le Maria Magetalene, le Johana, le Maria mma Jakobe; le basadi ba bangwe ba na nabo ba bolelela baaposetole dilo tse.

¹¹ Mafoko a, a nna jaaka ditlhamane fela mo go bone, ba se ka ba a dumela.

¹² Petere a nanoga a sianela kwa phupung; mme a inama, a okomela mo teng, a bona matsela a leloba a beilwe a le osi, mme a tsamaya a gakgamaletse se se dirafetseng.

Loeto kwa Emao

¹³ Bonang, ya re ka letsatsi leo fela, ba le babedi ba bone ba bo ba ya kwa motsaneng o o bidiwang Emao; bokgakala jwa teng go tswa Jerusalema, e ka ne e le dikilometara di le 11.

¹⁴ Ba bua mmogo ka ga dilo tsotlhe tse di dirafetseng.

¹⁵ Ga dirala ya re ba ntse ba bua mmogo ba botsanya, Jesu ka esi a atamela, a tsamaya nabo.

¹⁶ Matlho a bone a bo a siregile, gore ba tle ba se ka ba mo itse.

¹⁷ Mme a ba raya a re: “Dipolelano tse, ke dife tse lo di bolelanang fa lo ntse lo tsamaya?” Ba ema ba tlhontse difatlhogo.

¹⁸ Yo mongwe wa bone, yo leina la gagwe e leng Keleopase, a mo fetola a re: “A ke wena wesi o tlhotsetlhotseng mo Jerusalema o sa itse dilo tse di dirafetseng teng mo malatsing ano?”

¹⁹ A ba raya a re: “Dilo dife?” Ba mo raya ba re: “Dilo tsa ka ga Jesu wa Nasaretha, yo e neng e le moperofeti yo o nonofileng mo tirong le mo mafokong, fa pele ga Modimo le batho notlhe.

²⁰ Le jaaka ditlhogo tsa baperesiti le balaodi ba rona ba mo neetsa go sekisediwa losong, mme ba bile mmapotse.

²¹ Re ne re solofetse fa e tlaa bo e le ene yo o tlaa rekololang Iseraele. Bogolo go tsotlhe tse, gompieno ke letsatsi la boraro dilo tse di sena go dirafala.

²² Gape basadi bangwe ba lesomo la rona, le bone ba re gakgamaditse, ka ba ne ba ile ka maphakela kwa phupung;

²³ mme e rile ba sa fitlhele mmele wa gagwe, ba tla ba re, ba bile ba bonye ponatshegelo ya baengele ba ba rileng, o tshedile.

²⁴ Bangwe ba bone ba re neng re na nabo ba ya kwa phupung, ba fitlhela go ntse fela jaaka basadi ba boletse; mme ene ba se ka ba mmona.”

²⁵ Mme a ba raya a re: “A batho ba ba se nang tlhaloganyo ke lona, ba lo pelo di bonya go dumela tsotlhe tse baperofeti ba di buileng!

²⁶ A ga e ne e le tshwanelo gore Keresete a boge dilo tse, le go tsena mo kgalalelong ya gagwe?”

²⁷ Mme a simolola ka Moše, le ka baperofeti botlhe, a ba phuthololela mo dikwalong tsotlhe, dilo tse di kwadilweng ka ga gagwe.

²⁸ Ba atamela motsana o ba yang kwa go one; mme ene a dira jaaka e kete o fetela pele.

²⁹ Mme ba mo patelela ba re: “Nna le rona; gonne go maitseboa, le letsatsi le ngotlegile thata.” A tsena a ya go nna nabo.

³⁰ Ga dirala ya re a dutse a ja nabo, a tsaya senkgwe, a se segofatsa, a se ngathoganya, a se ba naya.

³¹ Mme matlho a bone a sirologa, mme ba mo itse; mme a nyelela a tswa mo ponong ya bone.

³² Ba raana ba re: “A dipelo tsa rona, a ga di a ka tsa tuka mo teng ga rona, fa a ntse a bua le rona mo tseleng, le fa a re rarabololela dikwalo?”

³³ Ba nanoga ka nako eo fela, ba boela kwa Jerusalema, mme ba fitlhela ba ba 11 ba phuthegile mmogo, le ba ba nang nabo,

³⁴ ba re: “Ruri Morena o tsogile, mme o bonywe ke Simone.”

³⁵ Mme ba bolela dilo tse di dirafetseng mo tseleng, le ka fa ba mo lemogileng ka teng ka go ngathoganngwa ga senkgwe.

Jesu o iponatsha mo barutweng ba gagwe

³⁶ Ya re ba sa ntse ba bua dilo tse, ene ka esi a ema fa gare ga bone a ba raya a re: “Kagiso e nne le lona.”

³⁷ Ba rerega, ba tshoga, ba itlhoma ba bona mowa.

³⁸ A ba raya a re: “Lo huduegelang, le dikabakanyo di tsogelang mo dipelong tsa lona?

³⁹ Lebang diatla tsa me, le dinao tsa me, fa e le nna ka nosi; nkapaapang, lo bone; gonne mowa ga o na nama le marapo, jaaka lo mpona ke na le one.”

⁴⁰ Ya re a sena go bua jalo, a ba bontsha diatla tsa gagwe le dinao tsa gagwe.

⁴¹ Ya re ba sa ntse ba belaetse ka boitumelo, mme ba gakgametse, a ba raya a re: “A lo na le se se jewang fano?”

⁴² Ba mo naya sebeka sa tlhapi e e besitsweng.

⁴³ A se tshola, a se ja fa pele ga bone.

⁴⁴ A ba raya a re: “Mafoko a, ke one a nkileng ka a bua le lona fa ke sa na le lona, fa dilo tsotlhe di na le go dirafala, e bong tse di kwadilweng mo molaong wa ga Moše, le mo baperofeting, le mo dipesalemeng, ka ga me.”

⁴⁵ Foo a rarabolola tlhaloganyo ya bone gore ba tlhaloganye dikwalo;

⁴⁶ a ba raya a re: “Go kwadilwe jaana, fa ene Keresete a tlaa swa jalo, mme a ba a tsoge mo baswing ka letsatsi la boraro;

⁴⁷ le gore go rerelwe merafe yotlhe boikwatlhao, le boitshwarelo jwa dibe ka leina la gagwe, go simolola mo Jerusalema.

⁴⁸ Lona lo basupi ba dilo tse.

⁴⁹ Bonang, ke tlisa polelo ya tsholofetso ya ga Rre mo go lona; lo name lo sa diegile mo motseng wa Jerusalema, go tle go tsamaye lo apesiwe nonofo e e tswang kwa godimo.”

Tlhatlogo ya ga Jesu

⁵⁰ Mme a ba gogela kwa ntle, ba ya go fitlha go lebagana le Bethania; mme a tsholetsa mabogo a gagwe, a ba segofatsa.

⁵¹ Ga dirala, ya re a sa ntse a ba segofatsa, a kgaogana nabo, a isiwa kwa legodimong.

⁵² Mme ba mo obamela; ba boela kwa Jerusalema ka boitumelo jo bogolo;

⁵³ ba tlhola ba ntse ba le mo tempeleng ka gale, ba baka Modimo.