Luke 23 - BAEBELE e e Boitshepo

Jesu o fa pele ga Pilato

¹ Lekoko lotlhe la bone la ema, mme ba mo isa fa pele ga Pilato.

² Ba simolola go mmaya molato ba re: “Re fitlhetse monna yo, a sokamisa morafe, a itsa gore Kaesare a se ka a newa lekgetho, a re le ene ka esi ke Keresete, Kgosi.”

³ Pilato a mmotsa a re: “A ke wena Kgosi ya Bajuta?” A mo fetola a re: “O a bolela.”

⁴ Pilato a raya ditlhogo tsa baperesiti le matshutitshuti a batho a re: “Ga ke bone molato mo monneng yo.”

⁵ Mme bone ba gakala bogolo ba re: “O fudua setšhaba, o simolotse kwa Galilea, a ruta mo Jutea yotlhe go tla go fitlha fano.”

Jesu o fa pele ga Herote

⁶ Ya re Pilato a utlwa ka ga Galilea, a botsa fa monna yo e le Mogalilea.

⁷ Ya re a sena go tlhaloganya fa a le wa puso ya ga Herote, a mo isa kwa go ene Herote, yo le ene ka esi o neng a le mo Jerusalema ka lobaka loo.

⁸ Jaana e rile Herote a bona Jesu, a itumela thata; ka a sa bolo go eletsa go mmona, ka a bile a utlwile dilo di le dintsi ka ga gagwe; le gone a solofela fa a tlaa bona tiro nngwe e e gakgamatsang e dirwa ke ene.

⁹ Mme a mmotsa ka mafoko a le mantsi; mme ene a se ka a mo fetola ka lepe.

¹⁰ Ditlhogo tsa baperesiti le bakwadi, ba ema ba mmaya molato, ba gaketse thata.

¹¹ Le Herote le batlhabani ba gagwe ba mo nyatsa, ba mo sotla, ba mo apesa seaparo se se manyedinyedi, ba mmusetsa gape kwa go Pilato.

¹² Herote le Pilato ba tloga ba tsalana fela ka letsatsi leo; ka e rile pele ba bo ba tlhoanye.

Jesu o atlholelwa loso

¹³ Pilato a phutha ditlhogo tsa baperesiti le balaodi, le batho, a ba raya a re:

¹⁴ “Lo tlisitse monna yo kwa go nna, jaaka mongwe yo o sokamisang setšhaba, bonang, ke mmoditse fa pele ga lona, mme ke se ka ka bona molato ope mo monneng yo, ka ga dilo tse lo reng o molato ka ga tsone;

¹⁵ nnyaa, le fa e le ene Herote; gonne o mmuseditse kwano go rona; mme bonang, ga go na sepe se o se dirileng se se tshwanetseng loso.

¹⁶ Ke gone ke tlaa mo kgwathisa, ke mo golole.”

¹⁷ (Le gale o ne a tshwanetse go ba gololela mongwe ka lobaka lwa modiro.)

¹⁸ Mme ba goeleletsa gongwe ba re: “Monna yo, a a tlosiwe, re gololelwe Barabase;”

¹⁹ e le motho yo o rileng ka ntlha ya pheretlho e o e dirileng mo motseng, le go bolaya batho, a bo a tsentswe mo ntlong ya kgolegelo.

²⁰ Pilato ka a eletsa go golola Jesu, a ba a bua nabo gape;

²¹ mme ba thela lošalaba ba re: “A a bapolwe, a a bapolwe.”

²² A ba a bua nabo lwa boraro a re: “Ka ntlha yang? Monna yo o dirile bosula bofe? Ga ke a bona molato ope o o tshwanetseng loso mo go ene; ke gone ke tlaa mo kgwathisang, ke itse go mo golola.”

²³ Ba mo kgaupetsa ka mantswe a magolo, ba lopa gore a bapolwe. Mme mantswe a bone a fenya.

²⁴ Mme Pilato a atlhola ka go re, go dirwe ka fa topong ya bone.

²⁵ A golola ene yo o tsenyeditsweng pheretlho le polao ya batho mo ntlong ya kgolegelo, ene yo ba mo eleditseng; mme Jesu ene a mo neela mo go rateng ga bone.

Papolo ya ga Jesu

²⁶ Ya re ba mo gogela koo, ba tshwara mongwe yo go tweng Simone wa Kurene, a tswa kwa nageng, mme ba baya mokgoro mo go ene, gore a o sikare fa morago ga Jesu.

²⁷ A salwa morago ke bontsi jo bogolo jwa batho, le jwa basadi, ba ba bileng ba gala, ba mo lelela.

²⁸ Jesu a retologela kwa go bone a re: “Bomorwadia Jerusalema, se nteleleng, lo itelele, lo bo lo lelele bana ba lona.

²⁹ Gonne bonang, metlha e etla, e ba tlaa buang mo go yone ba re: ‘Go sego meopa le dipopelo tse di iseng di ke di belege, le mabele a a iseng a ke a amuse.’

³⁰ Foo ba tlaa simolola go raya dithaba ba re: ‘Re weleng godimo;’ le makgabana ba re: ‘Re khurumetseng!’

³¹ Gonne fa ba dira dilo tse mo setlhareng se setala, go tlaa dirwa eng mo go se se omeletseng?”

³² Le gone ga bo go le ba bangwe ba le babedi, e le basenyi, ba gogwa nae ba ya go bolawa.

³³ E rile ba sena go fitlha felong fa go bidiwang Logata, ba mmapolela teng, le basenyi, mongwe ka fa letsogong le le siameng, yo mongwe ka fa go la molema.

³⁴ Mme Jesu a re: “Rra, ba itshwarele; gonne ga ba itse se ba se dirang.” Mme ba kgaogana diaparo tsa gagwe, ba di laola ka bola.

³⁵ Batho ba ema ba leba. Le balaodi le bone ba mo gobolola ba re: “O ne a boloka ba bangwe; a jaana a ipoloke, fa e le ene Keresete wa Modimo, moitshenkedwi wa one.”

³⁶ Batlhabani le bone ba tla fa go ene, ba mo sotla, ba re ba mo nosa bojalwa jo bo botšarara,

³⁷ ba re: “Fa e le wena Kgosi ya Bajuta, ipoloke.”

³⁸ Le gone ga bo go le sekwalo fa godimo ga gagwe se se reng: “YO, KE KGOSI YA BAJUTA”.

³⁹ Mme mongwe wa basenyi ba ba pegilweng nae a mo kgala, a re: “A ga o ene Keresete? Ipoloke le rona o re boloke.”

⁴⁰ Yo mongwe a mo fetola, a mo kgalemela a re: “A le Modimo ga o o boife, e tswa le wena o le mo tshekisong e ka yosi?

⁴¹ Mme rona ruri, e re tshwanetse; ka re bona tuelo e e tshwanetseng ditiro tsa rona; mme monna yo, ga a a dira sepe se se sokameng.”

⁴² Mme a re: “Jesu, a ko o nkgopole mogang o tlang mo bogosing jwa gago.”

⁴³ Jesu a mo raya a re: “Ammaaruri, ke a go raya, o tlaa nna le nna kwa Parataise gompieno.”

Loso lwa ga Jesu

⁴⁴ Ya bo e setse e ka ne e le nako ya borataro ya motshegare o mogolo; mme ga nna lefifi mo lefatsheng lotlhe, go ya go fitlha mo nakong ya 9.

⁴⁵ Lesedi la letsatsi le ntse le fifala; mme sesiro sa tempele sa fatoga ka bogare.

⁴⁶ E rile Jesu a sena go goa ka lentswe le legolo a re: “Rra, ke neela mowa wa me mo diatleng tsa gago;” mme a re a sena go bua jalo a neela mowa.

⁴⁷ E rile molaodi wa mophato a bona se se dirafetseng a galaletsa Modimo a re: “Ruri motho yo e ne e le mosiami.”

⁴⁸ Matshutitshuti otlhe a batho ba ba phuthegetseng pono e, ba re ba bona dilo tse di dirafetseng, ba boa ba ititaya dihuba.

⁴⁹ Botlhe ba ba itsanyeng nae, le basadi ba ba mo setseng morago ba tswa Galilea, ba emela kgakala, ba bona dilo tse.

Phitlho ya ga Jesu

⁵⁰ Mme bonang, monna yo o bidiwang Josefe wa lekgotla, e le monna yo o molemo le tshiamo;

⁵¹ ene yo, ga a ka a dumalana le kgakololo le tiro ya bone, e le motho wa Arimathea, motse wa Bajuta, yo o bileng a ne a lebeletse bogosi jwa Modimo.

⁵² Monna yo, a ya kwa go Pilato a lopa setoto sa ga Jesu.

⁵³ A se pagolola, a se phutha ka letsela la leloba, mme a se baya mo phupung e e gabilweng mo lefikeng, e go iseng go ko go bewe motho ope mo go yone.

⁵⁴ Mme ya bo e le letsatsi la Iketleetso, mme Sabata o ne a atamela.

⁵⁵ Le basadi, ba ba duleng nae kwa Galilea, ba mo sala morago, ba bona phupu, le ka fa setoto se bewang ka teng.

⁵⁶ Mme ba boa, ba baakanya malao le ditlotso; mme ba ikhutsa ka letsatsi la Sabata, ka fa taolong.