Luke 2 - BAEBELE e e Boitshepo

Botsalo jwa ga Jesu

¹ Jaana e rile mo metlheng eo ga tswa taolo kwa go Kaesare Aguseto, gore lefatshe lotlhe le kwalwe.

² Go kwalwa mo ga ntlha, ke mo go dirilweng ka Kuirinio a le molaodi wa Siria.

³ Mme botlhe ba ya go kwalwa, mongwe le mongwe a ya kwa motseng wa ga gabo.

⁴ Josefe le ene a tlhatloga kwa Galilea, a tswa motseng wa Nasaretha, a ya kwa Jutea kwa motseng wa ga Dafite, o o bidiwang Bethelehema; ka a le wa kgotla le wa losika lwa ga Dafite;

⁵ a ya go kwalwa le Maria, mosadi yo o mmeeleditseng, a bile a le moimana.

⁶ Ga dirala ya re ba sa le gone, ga fitlha malatsi a o tlaa belegang ka one.

⁷ Mme a bona ngwana wa mosimane wa ntlha wa gagwe, mme a mo phuthela ka matsela, a mmaya mo bojelong jwa dipitse; gonne go ne go se na bonno mo ntlong ya baeti.

Badisa le baengele

⁸ Jaana ga bo go le badisa mo nageng, mo lefatsheng leo, ba disitse letsomane la bone bosigo.

⁹ Mme moengele wa Morena a ema fa go bone, le kgalalelo ya Morena ya phatsima ntlheng tsotlhe tsa bone; mme ba boifa ka poifo e kgolo.

¹⁰ Moengele a ba raya a re: “Se boifeng, gonne bonang, ke lo lereditse mafoko a a molemo, a boitumelo jo bogolo, jo bo tlaa dirafalelang batho botlhe.

¹¹ Gonne gompieno mo motseng wa ga Dafite lo tsaletswe Mmoloki, yo e leng Keresete Morena.

¹² Mme se, e tlaa nna sesupo mo go lona; lo tlaa fitlhela ngwanyana a phuthetswe ka matsela, a letse mo bojelong jwa dipitse.”

¹³ Mme ba tshogana ka moengele a bile a na le bontsintsi jwa lesomosomo la legodimo, ba baka Modimo ba re:

¹⁴ “Kgalalelo e nne go Modimo kwa bogodimodimong, le kagiso e nne mo lefatsheng, mo batho ba o kgatlhegang thata mo go bone.”

¹⁵ Ga dirala e rile baengele ba sena go ba tlogela ba ya legodimong, badisa ba raana ba re: “A re yeng fela jaana kwa Bethelehema, re bone selo se, se se dirafetseng se Morena o se re itsisitseng.”

¹⁶ Jalo ba tla ka potlako; ba fitlhela Maria le Josefe, le ngwanyana a letse mo bojelong jwa dipitse.

¹⁷ Ya re ba sena go bona, ba itsise mo ntlheng tsotlhe lefoko le ba le boleletsweng ka ga ngwana yo.

¹⁸ Mme botlhe ba ba utlwang ba gakgamadiwa ke dilo tse badisa ba di ba bolelelang.

¹⁹ Mme Maria a boloka dipolelo tsotlhe tse, a di akanya mo pelong ya gagwe.

²⁰ Badisa ba boa ba galaletsa Modimo, ba o baka ka ntlha ya dilo tsotlhe tse ba di utlwileng le tse ba di bonyeng, fela jaaka ba boleletswe.

Thupiso ya ga Jesu

²¹ E rile malatsi a a 8 a go rupisa ngwanyana a sena go feta, ya bo leina la gagwe le bidiwa JESU, le o le reilweng ke moengele gale a ise a ingwe mo sebopelong.

Jesu o isiwa kwa tempeleng

²² E rile malatsi a bontlafatso jwa bone a sena go feta, ka fa molaong wa ga Moše, ba mo isa kwa Jerusalema go mo neela Morena;

²³ jaaka go kwadilwe mo molaong wa Morena ga twe: “Mosimane mongwe le mongwe wa ntlha o tlaa bidiwa boitshepelo Morena;”

²⁴ le gore ba ise setlhabelo sa maphoi a le mabedi, le fa e le sa maebana a le mabedi, jaaka go builwe mo molaong wa Morena.

²⁵ Ga bo go le monna mongwe mo Jerusalema, leina la gagwe go twe, Simeone; monna yo a bo a siame, a le morapedi wa Modimo, a lebeletse kgomotso ya Iseraele; mme Mowa o o Boitshepo wa bo o le mo go ene.

²⁶ O ne a senoletswe ke Mowa o o Boitshepo fa a se ketla a swa a ise a bone Keresete wa Morena pele.

²⁷ Mme a tla ka Mowa mo tempeleng; ya re batsadi ba lere ngwana Jesu go mo direla ka fa temalong ya molao,

²⁸ foo a mo tshola ka mabogo a gagwe, a baka Modimo a re:

²⁹ “Morena, jaana o ka mma motlhanka wa gago a tsamaya ka kagiso jaaka lefoko la gago;

³⁰ gonne matlho a me a bonye poloka ya gago,

³¹ e o e baakantseng fa pele ga sefatlhogo sa ditšhaba tsotlhe;

³² lesedi le le bonesang Baditšhaba, le kgalalelo ya Iseraele batho ba gago.”

³³ Rraagwe le mmaagwe ba bo ba gakgamalela dilo tse di builweng ka ga gagwe;

³⁴ mme Simeone a ba segofatsa, a raya Maria mmaagwe a re: “Bona, ngwana yo o beetswe go wa le go tsoga gape ga batho ba le bantsi mo go Iseraele; le gore a nne sesupo se se tlaa ganediwang;

³⁵ ee, le tšhaka e tlaa phololela le one mowa wa gago, gore megopolo ya dipelo di le dintsi e senolwe.”

³⁶ Ga bo go le mongwe go twe, Ana, moperofeti wa sesadi, morwadia Fanuele wa lotso lwa Ašere, a bo a tsofetse thata, mme a kile a nna le monna ka dinyaga di supa go tloga mo bokgarebaneng jwa gagwe.

³⁷ A bo a ntse botlholagadi ka dinyaga e ka ne e le di le 84, yo o sa tlogeleng tempele, a direla Modimo ka go ikitsa go ja le ka mekokotlelo bosigo le motshegare.

³⁸ A tla fela ka lobaka loo, a leboga Modimo, a bua ka ga gagwe le batho botlhe ba ba lebeletseng thekololo ya Jerusalema.

Ba boela Nasaretha

³⁹ Ya re ba sena go dira dilo tsotlhe ka fa molaong wa Morena ba boela kwa Galilea, kwa Nasaretha, motse wa ga bone.

⁴⁰ Ngwana a gola, a nonofa a tlala botlhale; le tshegofatso ya Modimo ya nna mo go ene.

Mosimane Jesu mo tempeleng

⁴¹ Jaana, batsadi ba gagwe ba ne ba tle ba ya Jerusalema ka dinyaga tsotlhe, ba ya modirong wa Tlolaganyo.

⁴² E rile a le dinyaga di le 12 ba tlhatlogela kwa Jerusalema jaaka temalo ya modiro.

⁴³ Ya re ba sena go swetsa malatsi, ba boa, mme mosimane Jesu a sala mo Jerusalema, mme batsadi ba gagwe ba bo ba sa itse.

⁴⁴ Bone ya re ka ba gopotse gore o mo lekokong la bone, ba tsamaya fela ka letsatsi le le lengwe fela; mme ba mmatla mo go ba ga bone, le mo go ba ba itsanyeng nabo.

⁴⁵ Ya re ba sa mmone ba boela gape kwa Jerusalema ba ntse ba mmatla.

⁴⁶ Ga dirala ya re malatsi a le mararo a sena go feta, ba mo fitlhela mo tempeleng, a dutse fa gare ga baruti, a ba utlwa, a ba a ba botsa dipotso.

⁴⁷ Botlhe ba ba mo utlwang ba gakgamadiwa ke tlhaloganyo ya gagwe, le diphetolo tsa gagwe.

⁴⁸ Mme ya re ba mmona, ba gakgamala; mmaagwe a mo raya a re: “Morwaaka, o ne o re direlelang jalo? Bona, rraago le nna re go batlile ka bohutsana.”

⁴⁹ Ene a ba raya a re: “Lo ne lo mpatlelang? A lo ne lo sa itse fa ke tshwanetse go nna mo go tse e leng tsa ga Rre?”

⁵⁰ Mme ba se ka ba tlhaloganya lefoko le o le buang nabo.

⁵¹ Mme a fologa nabo, a fitlha mo Nasaretha, mme a nna a ba utlwa, mme mmaagwe ene a boloka dipolelo tsotlhe tse mo pelong ya gagwe.

⁵² Jesu a tswelela mo botlhaleng le mo go goleng, le mo go ratweng ke Modimo le batho.