Luke 18 - BAEBELE e e Boitshepo

Setshwantsho sa motlholagadi le moatlhodi

¹ A bua setshwantsho nabo, sa gore batho ba tshwanetse go rapela ka metlha yotlhe, ba sa ngosele.

² A re: “E kile ya re mo motseng mongwe, ga bo go le moatlhodi yo o sa boifeng Modimo, le motho, a sena sepe nae.

³ Ga bo go le mosadi wa motlholagadi mo motseng oo; a nna a ya kwa go ene gantsi a re: ‘Ntsheka mo go yo o mpatikang.’

⁴ Mme a nna a gana ka lobaka; mme ya re kwa morago a ithaya a re: ‘Le fa ke sa boife Modimo, le motho ke sa mo re sepe;

⁵ le fa go ntse jalo, e re ka motlholagadi yo a ntshwenya, ke tlaa mo sekela, gore a se ka a mphatlola tlhogo ka go boaboa ga gagwe.’ ”

⁶ Morena a re: “Utlwang se moatlhodi yo o sa siamang o se buang.

⁷ Mme Modimo one, a ga o ketla o sekela ba e leng baitshenkedwi ba one, ba ba goelang kwa go one motshegare le bosigo, mme o bile o pelotelele ka ga bone.

⁸ Ke a lo bolelela, o tlaa ba sekela ka bonako. Le fa go ntse jalo e tlaa re Morwa Motho a tla, a o tlaa fitlhela tumelo mo lefatsheng?”

Setshwantsho sa Mofarisai le mokgethisi

⁹ Setshwantsho ke se, a se bua le bangwe ba ba ikayang fa e le bone basiami, ba nyatsa ba bangwe botlhe, a re:

¹⁰ “Banna ba le babedi ba kile ba ya tempeleng, ba ya go rapela; mongwe e le Mofarisai yo mongwe e le mokgethisi.

¹¹ “Mofarisai a ema a ithapelelela jaana a re: ‘Modimo, ke a go leboga ka gobo ke sa nna jaaka batho ba bangwe, ba le baikgagapeledi, le basiamolodi le ba boaka, kgotsa jaaka mokgethisi yo.

¹² Ke tle ke ikitse go ja gabedi ka beke nngwe le nngwe; le sa bosome sa tsotlhe tse ke di bapalang ke se ntshe.’

¹³ “Mme mokgethisi ene, a emela kwa kgakala, le e leng matlho a se ka a a lelaletsa legodimong, a ititaya sehuba a re: ‘Modimo, nkutlwela botlhoko, nna yo ke leng moleofi.’

¹⁴ Ke a lo bolelela, monna yo o fologetse kwa ntlong ya gagwe a siamisitswe bogolo go yo mongwe, gonne mongwe le mongwe yo o ikgodisang o tlaa ngotlafadiwa; mme yo o ingotlafatsang o tlaa godisiwa.”

Jesu o segofatsa banyana

¹⁵ Le gone ba lere kwa go ene banyana ba bone ba bannyennyane, gore a ba ame. Ya re barutwa ba bona jalo, ba ba kgalemela.

¹⁶ Mme Jesu a ba bitsa gore ba ye kwa go ene, a re: “Lesang banyana, ba tle mo go nna; lo se ka lwa ba itsa; gonne bogosi jwa legodimo ke jwa ba ba ntseng jalo.

¹⁷ Ammaaruri ke a lo raya, le fa e le mang yo o se ketlang a tshola bogosi jwa Modimo jaaka ngwanyana, ga a ketla a tsena mo go jone ka gope.”

Molaodi wa mohumi

¹⁸ Molaodi mongwe a mmotsa a re: “Moruti yo o molemo, ke tlaa dirang gore ke rue botshelo jo bo sa khutleng?”

¹⁹ Jesu a mo raya a re: “O mpiletsang molemo? Ga go ope yo o molemo, fa e se yo mongwe fela, e bong Modimo.

²⁰ Ditaolo o a di itse, di a re: “ ‘O se ka wa dira boaka, o se ka wa bolaya motho, o se ka wa utswa, o se ka wa supa tshupo ya kako, tlotla rraago le mmaago.’ ”

²¹ Mme a re: “Tsotlhe tse ke sa le ke di tshegetsa le mo bokaung jwa me, nako ke eno.”

²² Ya re Jesu a utlwa, a mo raya a re: “O sa ntse o tlhoka sengwe: Rekisa tsotlhe tse o nang natso, o abele bahumanegi; mme o tlaa nna le lohumo kwa legodimong; mme o tle o ntshale morago.”

²³ Ya re a utlwa jalo, a hutsafala thata; ka a ne a humile thata.

²⁴ Jesu ya re a mmona (fa a hutsafetse thata) a re: “Ana go thata jang mo go ba ba nang le mahumo go tsena mo bogosing jwa Modimo!

²⁵ Gonne go ka nna bofefo kamela go tsena ka letshofa la lomao, bogolo go mohumi go tsena mo bogosing jwa Modimo.”

²⁶ Ba ba utlwang jalo ba re: “Fa e le jalo go a bo go ka bolokwa mang?”

²⁷ Ene a re: “Dilo tse di retetseng mo bathong, di ka dirafala mo Modimong.”

²⁸ Petere a re: “Bona, rona re tlogetse magarona, re go setse morago.”

²⁹ A ba raya a re: “Ammaaruri ke a lo raya, ga go ope yo o tlogetseng ntlo, kgotsa mosadi, kgotsa bana ba ga rraagwe, kgotsa batsadi, kgotsa bana, ka ntlha ya bogosi jwa Modimo,

³⁰ yo o se ketlang a bona bogolo jo bo feteletseng mo motlheng ono, le botshelo jo bo sa khutleng mo lefatsheng le le tlang.”

Jesu o bolelela pele lwa boraro loso lwa gagwe

³¹ A tsaya ba ba some le bobedi, a ba raya a re: “Bonang, re ya kwa Jerusalema, mme dilo tsotlhe tse di kwadilweng ke baperofeti di tlaa dirafalela Morwa Motho.

³² Gonne o tlaa neelwa Baditšhaba, mme o tlaa sotlwa, a gagautlwa ka mo go tlhabisang ditlhong, a ba a kgwelwa mathe.

³³ Ba tlaa mo seola, ba mmolaya; mme o tlaa ba a tsoga ka letsatsi la boraro.”

³⁴ Mme ba se ka ba tlhaloganya sepe sa dilo tse; polelo e, ya bo e ba subegetse; ba se ka ba lemoga dilo tse di buiwang.

Phodiso ya sefofu sa Jeriko

³⁵ Ga dirafala, e rile a setse a atametse Jeriko, monna mongwe wa sefofu a bo a dutse fa tseleng, a kopa.

³⁶ Ya re a utlwa go feta ga bontsi jwa batho, a botsa a re: “Selo se ke eng?”

³⁷ Ba mmolelela ba re: “Jesu wa Nasaretha o a feta.”

³⁸ Mme a goa a re: “Jesu Morwa Dafite, nkutlwela botlhoko!”

³⁹ Ba ba eteletseng pele ba mo kgalemela ba re a didimale, mme a nna a goa segolo bogolo a re: “Morwa Dafite, nkutlwela botlhoko!”

⁴⁰ Jesu a ema, a laola gore a tlisiwe fa go ene; ya re a sena go mo atamela, a mmotsa a re:

⁴¹ “O rata ka go direlang?” Mme a re: “Morena, a ke foufologe.”

⁴² Jesu a mo raya a re: “Foufologa; tumelo ya gago e go fodisitse.”

⁴³ Mme a foufologa fela ka bonako, mme a mo sala morago, a galaletsa Modimo; batho botlhe ba re ba bona jalo ba baka Modimo.