Luke 1 - BAEBELE e e Boitshepo

Ketapele

¹ Go Motlotlegi Theofila: E re ka batho ba le bantsi ba ineetse go kwala ka thulaganyo polelo ya dilo tse di nang le tlhomamo ruri mo go rona,

² fela jaaka re di neilwe ke ba ba di bonyeng ka matlho, le ba e neng e le badiredi ba lefoko mo tshimologong;

³ le nna, ka ke tlhotlhomisitse ruri dilo tsotlhe le tsa tshimologo, ke ntse ke ikaeletse fa go ka nna molemo go go kwalela ka thulaganyo,

⁴ gore o itse tlhomamo ya dilo tse o rutilweng mo go tsone.

Kitsiso ya botsalo jwa ga Johane wa Mokolobetsi

⁵ E rile mo metlheng ya ga Herote kgosi ya Jutea, ga bo go le moperesiti mongwe go twe Sakaria, wa lekoko la phapaano ya ga Abija; mosadi wa gagwe le ene a bo a le wa bomorwadia Arone, leina la gagwe e le Elisabethe.

⁶ Ba bo ba le tshiamo fa pele ga Modimo ka bobedi jwa bone, ba tsamaya mo ditaolong tsotlhe le mo ditaong tsa Morena ba se na molato.

⁷ Ba bo ba se na ngwana, ka Elisabethe a le moopa, ba bile ba setse ba tsofetse thata boo babedi.

⁸ Jaana ga dirala ya re a dira tiro ya gagwe ya boperesiti fa pele ga Modimo ka fa phapaanong ya lekoko la gagwe,

⁹ ka fa tlwaelong ya boperesiti, ga bo go tla letsatsi la gagwe la go tsena mo tempeleng ya Modimo ka lone, a ya go fisa maswalo.

¹⁰ Bontsi jotlhe jwa batho ba bo ba rapela ba le ka fa ntle ka lobaka lwa go fisa maswalo.

¹¹ Mme ga bonala kwa go ene moengele wa Morena, a eme ka fa ntlheng ya letsogo le le siameng la sebeso sa maswalo.

¹² Ya re Sakaria a mmona a fuduega, le poifo ya mo wela.

¹³ Mme moengele a mo raya a re: “Sakaria, o se ka wa boifa gonne thapelo ya gago e utlwilwe; mme mosadi wa gago Elisabethe o tlaa bona ngwana wa mosimane nao; mme o tlaa mo raya leina o re, Johane.

¹⁴ O tlaa nna le boitumelo le boipelo; le batho ba le bantsi ba tlaa itumelela go tsalwa ga gagwe.

¹⁵ Gonne o tlaa nna mogolo mo ponong ya Morena; ga a ketla a nwa bojalwa jwa mofine, le fa e le bojalwa jo bo loileng; mme o tlaa tlala Mowa o o Boitshepo le a sa tswa sebopelong sa ga mmaagwe.

¹⁶ Bana ba le bantsi ba Iseraele o tlaa ba sokololela mo go Morena Modimo wa bone.

¹⁷ O tlaa mo etelela pele ka mowa le ka nonofo ya ga Elija, go sokololela dipelo tsa borara mo baneng, le ba ba sa utlweng go sepela mo botlhaleng jwa basiami; go baakanyetsa Morena sešaba se o se etleeleditsweng.”

¹⁸ Jalo Sakaria a raya moengele a re: “Golo mo ke tlaa go itse ka eng, ka ke le monnamogolo le mosadi wa me a tsofetse thata?”

¹⁹ Moengele a mo fetola a re: “Ke nna Gaberiele, yo ke emang fa pele ga Modimo; ke romilwe go tla ke bua nao, le go go bolelela mafoko a, a boitumelo.

²⁰ Bona, o tlaa nna semumu, o retelelwe ke go bua, go tle go tsamaye letsatsi le tle, le dilo tse di tlaa dirafalang ka lone, ka o sa dumele mafoko a me, a a tlaa dirafalang mo lobakeng lwa one.”

²¹ Mme batho ba bo ba lebeletse Sakaria; mme ba gakgamalela tiego ya gagwe e e kalo mo tempeleng.

²² Mme ya re a tswa, a retelewa ke go bua nabo; mme ba lemoga fa a bonye ponatshegelo mo tempeleng; mme a nna a ba gwetlha, mme a fela a ntse semumu fela.

²³ Ga dirala, ya re malatsi a tirelo ya gagwe a sena go feta, a tsamaya a ya kwa ga gagwe.

²⁴ E rile morago ga malatsi ao, Elisabethe mosadi wa gagwe a nna moimana, mme a iphitlha ka dikgwedi di le tlhano, a re:

²⁵ “Morena o ntiretse jalo mo metlheng e o ntebileng ka yone go ntlosa kgobo mo bathong.”

Kitsiso ya botsalo jwa ga Jesu

²⁶ Jaana e rile ka kgwedi ya borataro, moengele Gaberiele a rongwa ke Modimo kwa motseng wa Galilea, o o bidiwang Nasaretha.

²⁷ A ya kwa kgarebaneng e e beeletsweng ke monna yo o bidiwang Josefe, wa ntlo ya ga Dafite; leina la kgarebane e ne e le Maria.

²⁸ Moengele a tsena kwa go ene, a mo raya a re: “Dumela wena yo o sego thata, Morena o na nao: (O sego mo basading).”

²⁹ Maria a fuduiwa thata ke lefoko la gagwe, mme a akanya tumediso e, gore e ka ne e le e e ntseng jang.

³⁰ Moengele a mo raya a re: “O se ka wa boifa Maria; gonne o bonye lesego mo Modimong.

³¹ Bona, o tlaa nna moimana, mme o tlaa bona ngwana wa mosimane, o tlaa mo raya leina o re, Jesu.

³² O tlaa nna mogolo, mme o tlaa bidiwa Morwa Mogodimodimo; Morena Modimo o tlaa mo naya setulo sa bogosi sa ga Dafite rraagwe.

³³ O tlaa busa ntlo ya ga Jakobe ka bosakhutleng; bogosi jwa gagwe ga bo ketla bo nna le bokhutlo.”

³⁴ Mme Maria a raya moengele a re: “Mo go tlaa nna jang, ka ke sa itse monna?”

³⁵ Mme moengele a mo fetola a re: “Mowa o o Boitshepo o tlaa tla mo go wena, le nonofo ya Mogodimodimo e tlaa go tshutifalela; ke gone le sone seo se se boitshepo se o tlaa se belegang, se tlaa bidiwa boitshepo, Morwa Modimo.

³⁶ Bona, Elisabethe wa losika lwa gago, le ene o ithwele ngwana wa mosimane mo botsofeng jwa gagwe; mme e, ke yone kgwedi ya borataro mo go ene yo o neng a bidiwa moopa.

³⁷ Gonne ga go na lefoko lepe le le tswang Modimong le le ka tlhokang nonofo.”

³⁸ Mme Maria a re: “Bona, lelata la Morena; a go ntirafalele jaaka lefoko la gago.” Mme moengele a mo tlogela.

Maria o etela Elisabethe

³⁹ E rile mo metlheng eo Maria a tloga, a itlhaganelela kwa lefatsheng la makgabana, kwa motseng mongwe wa Juta.

⁴⁰ Mme a tsena mo ntlong ya ga Sakaria, a dumedisa Elisabethe.

⁴¹ Ga dirala ya re Elisabethe a utlwa tumediso ya ga Maria, ngwana a tlola mo sebopelong sa gagwe; Elisabethe a tlala Mowa o o Boitshepo;

⁴² mme a bua ka lentswe le legolo a re: “O sego mo basading, go bile go sego loungo lwa sebopelo sa gago.

⁴³ Mme mo, go ntswela kae, fa e bo jaana mma Morena wa me a ka tla mo go nna jaana?

⁴⁴ Gonne bona, e re lentswe la tumediso ya gago le tsena fela mo ditsebeng tsa me, ngwana a bo a tlola ka boitumelo mo sebopelong sa me.

⁴⁵ Go sego ene mosadi, yo o dumetseng; gonne dilo tse o di boleletsweng ke Morena di tlaa dirafala.”

Sefela sa ga Maria sa kgalaletso

⁴⁶ Foo Maria a re: “Mowa wa me o godisa Morena,

⁴⁷ mowa wa me o bile o itumetse mo Modimong Mmoloki wa me.

⁴⁸ Gonne o lebile bobotlanyana jwa lelata la one; gonne bona, jaana ditshika tsotlhe di tlaa mpitsa mosegofadiwa.

⁴⁹ Gonne one o o leng thata o ntiretse dilo tse dikgolo; mme leina la one le boitshepo.

⁵⁰ Boutlwelobotlhoko jwa one bo mo go ba ba o boifang, mo tshikatshikeng.

⁵¹ O supile nonofo ka letsogo la one; o faladitse ba ba pelompe mo ditlhatlhanyong tsa dipelo tsa bone.

⁵² O digile dikgosana mo ditulong tsa tsone tsa bogosi; mme o godisitse ba ba leng babotlana fela.

⁵³ Ba ba bolawang ke tlala o ba kgorisitse ka dilo tse di molemo; bahumi o ba tsamaisitse ba iphotlhere fela.

⁵⁴ O thusitse Iseraele motlhanka wa one, gore a gakologelwe boutlwelobotlhoko jwa one.

⁵⁵ Jaaka o buile le borraetsho, ka ga Aberahame le losika lwa gagwe ka bosakhutleng.”

⁵⁶ Maria a nna nae e ka ne e le ka dikgwedi di le tharo, a ba a boela kwa ga gagwe.

Botsalo jwa ga Johane wa Mokolobetsi

⁵⁷ Jaana lobaka lwa ga Elisabethe lwa fitlha, lo o tlaa belegang ka lone; mme a bona mosimane.

⁵⁸ Bankane le ba ga gabo ba utlwa jaaka Morena a mo godiseditse boutlwelobotlhoko jo bogolo; ba itumela nae.

⁵⁹ Ga dirala ya re ka letsatsi la bo 8 ba tla go rupisa ngwana, ba bo ba re ba mo raya leina, ba re, Sakaria, leina la ga rraagwe.

⁶⁰ Mme mmaagwe a ba fetola, a re: “Nnyaa, ga go a nna jalo; o tlaa bidiwa Johane.”

⁶¹ Ba mo raya ba re: “Ga go na ope wa losika lwa gago yo o bidiwang ka leina leo.”

⁶² Jalo ba gwetlha rraagwe, go itse ka fa o ratang a bidiwa ka teng.

⁶³ Mme a lopa sematla se se kwalelang, mme a kwala a re: “Leina la gagwe ke Johane.” Ba gakgamala botlhe.

⁶⁴ Molomo wa gagwe wa momologa ka bonako, le loleme lwa gagwe lwa hunologa, mme a bua, a baka Modimo.

⁶⁵ Poifo ya wela botlhe ba ba agileng mo tikologong ya bone; dipolelo tse tsotlhe, tsa bolelwa thata mo lefatsheng lotlhe la makgabana la Jutea.

⁶⁶ Botlhe ba ba utlwang, dilo tse, ba di tsaya ka pelo ba re: “Kana ngwana yo, e tlaa nna yo o ntseng jang!” Gonne seatla sa Morena sa bo se nna nae.

Leboko la ga Sakaria

⁶⁷ Foo Sakaria, rraagwe, a tlala Mowa o o Boitshepo, mme a perofesa, a re:

⁶⁸ “A go bakwe Morena Modimo wa Iseraele, gonne o lekotse batho ba one, o bile o ba diretse thekololo.

⁶⁹ O re emiseditse lonaka lwa poloka mo ntlong ya ga Dafite motlhanka wa one.

⁷⁰ Jaaka o buile ka melomo ya baperofeti ba one ba ba boitshepo, ba ba ntseng ba le yo e sa le ka tshimologo ya lefatshe;

⁷¹ gore re gololwe mo babeng ba rona, le mo diatleng tsa botlhe ba ba re ilang;

⁷² gore o dirafaletse borraetsho boutlwelobotlhoko, le gore o gakologelwe kgolagano e e boitshepo ya one;

⁷³ le maikano a o ikanetseng rraetsho Aberahame ka one.

⁷⁴ Fa o tlaa re naya gore e tle e re re golotswe mo diatleng tsa baba ba rona, re o direle re se na poifo,

⁷⁵ mo boitshepong le mo tshiamong fa pele ga one, ka malatsi otlhe a botshelo jwa rona.

⁷⁶ Ee, le wena ngwana, o tlaa bidiwa moperofeti wa Mogodimodimo; gonne o tlaa tsamaya fa pele ga sefatlhogo sa Morena go baakanya ditsela tsa gagwe;

⁷⁷ go naya batho ba gagwe kitso ya poloko ka boitshwarelo jwa dibe tsa bone.

⁷⁸ Ka ntlha ya boutlwelobotlhoko jo bonana jwa Modimo wa rona; jo bophepa jwa moso jo bo tswang godimong bo re lekotseng ka jone,

⁷⁹ go phatsimela ba ba dutseng mo lefifing le mo moriting wa loso, go siamisetsa dinao tsa rona mo tseleng ya kagiso.”

⁸⁰ Jalo ngwana a gola, a nonofa mo moweng; mme a nna mo dinageng go ya go fitlha mo lobakeng lwa go itshupa ga gagwe mo go Iseraele.