Lipesalema 99 - BAEBELE e e Boitshepo

Modimo ke kgosi e e busang gotlhe

¹ Jehofa o a busa; a ditšhaba di rorome; o ntse mo ditšherubeng; a lefatshe le tshikinyege.

² Jehofa o mogolo mo Sione; mme o kwa godimo, godimo ga ditšhaba tsotlhe.

³ A ba bake leina la gago le legolo, le le boitshegang; go boitshepo ene.

⁴ Nonofo ya kgosi le yone e rata katlholo; o tle o tlhomamise tekatekanyo, o dirafatse katlholo le tshiamo mo go Jakobe.

⁵ Lona, goletsang Jehofa, Modimo wa rona, lo obame fa sebeong sa dinao tsa gagwe; go boitshepo ene.

⁶ Moše le Arone mo baperesiting ba gagwe, le Samuele mo go ba ba bitsang leina la gagwe; bone ba ba neng ba bitsa Jehofa, mme a ba araba.

⁷ A bua nabo a le mo mosepuring wa leru; ba ne ba boloka ditshupo tsa gagwe, le molao o o emeng, o o o ba neileng.

⁸ O ne wa ba araba Jehofa, Modimo wa rona: O ne o le Modimo o o ba itshwarelang, le fa o tsaya tefetso mo madirong a bone.

⁹ Goletsang Jehofa, Modimo wa rona, mme lo obame kwa thabaneng ya gagwe e e boitshepo; gonne Jehofa Modimo wa rona o boitshepo.