Lipesalema 8 - BAEBELE e e Boitshepo

Kgalalelo ya Modimo le tlotlo ya motho

Pesalema ya ga Dafite. Ya moopedi yo mogolo; e laeletswe Gitithe.

¹ Jehofa, Morena wa rona, a bo leina la gago le le lentle mo lefatsheng lotlhe! Wena yo o tlhomileng kgalalelo ya gago godimo ga magodimo.

² O theile nonofo ka a a tswang melomong ya banyana le ba ba anyang, ka ntlha ya baganetsi ba gago, gore o tle o didimatse mmaba le mmusolosi.

³ E a re fa ke akanya magodimo a gago, tiro ya menwana ya gago, kgwedi le dinaledi tse o di baakantseng;

⁴ kana motho e be e le eng, fa e bo ne ne o mo gopola, le morwa motho, fa e bo ne ne o mo lekola?

⁵ Gonne o mo fokoditse boemo go le gonnye fela mo Modimong, wa mo rwesa kgalalelo le tlotlo.

⁶ Wa mo naya taolo mo ditirong tsa diatla tsa gago; o beile dilo tsotlhe tlase ga dinao tsa gagwe;

⁷ dinku tsotlhe le dikgomo, ee, le tsone ditshedi tsa naga;

⁸ dinonyane tsa loapi le ditlhapi tsa lewatle, sengwe le sengwe se se ralalang mawatle ka ditsela tsa one.

⁹ Jehofa, Morena wa rona, ana leina la gago le lentle jang mo lefatsheng lotlhe fela!