Lipesalema 4 - BAEBELE e e Boitshepo

Thapelo ya maitseboa ya boikanyo mo Modimong

Pesalema ya ga Dafite. Ya moopedi yo mogolo; ka diletso tse di ditlhale.

¹ A e re ke bitsa o nkarabe Modimo wa tshiamo ya me; o nkatlhamoloseditse bonno ke le mo pitlaganong; nkutlwela botlhoko mme o utlwe morapelo wa me.

² Lona bomorwa batho, ana kgalalelo ya me e tlaa fetolwa tlotlologo goleele go le kaye? Lo tlaa rata dinyana lo latela maaka goleele go le kaye? Sela.

³ Itseng fa Jehofa a ipeetse ene yo e leng moetsa Modimo fa thoko; Jehofa o tlaa utlwa mogang ke tlhaeleletsang kwa go ene.

⁴ Emang ka poifo, mme lo se leofe; buabuang ka dipelo tsa lona mo malaong a lona, mme lo tuulale. Sela.

⁵ Isang ditlhabelo tsa tshiamo, lo ikanye Jehofa.

⁶ Go na le bantsi ba ba reng, e mang yo o tlaa re bontshang sengwe se se molemo? Jehofa, re tsholeletse lesedi la sefatlhogo sa gago.

⁷ O tsentse boitumelo mo pelong ya me, go gaisa jwa bone jwa motlha o mabele a bone le bojalwa jwa bone jwa mofine di totileng.

⁸ Ke tlaa rapama ke ba ke robala mo kagisong; gonne Jehofa ke wena wesi yo o nkagisang mo polokegong.