Lipesalema 3 - BAEBELE e e Boitshepo

Thapelo ya moso ya boikanyo mo Modimong

Pesalema ya ga Dafite ya jale ka a tshaba Abesalome morwawe.

¹ Jehofa, ana baganetsi ba me ba ntsifetse jang! Bone ba ba ntsogologelang ba bantsi.

² Ba bantsi ba ba buang ka ga mowa wa me ba re: “Ga a na go thusiwa gope ke Modimo.” Sela.

³ Wena Jehofa, o thebe ka ntlha tsotlhe tsa me; o kgalalelo ya me le motsholetsa tlhogo ya me.

⁴ Ke tle ke bitse Jehofa ka lentswe la me, mme a nkarabe a le mo thabaneng ya gagwe e e boitshepo. Sela.

⁵ Ka rapama, mme ka robala; ka tsoga; ka go bo Jehofa o a nkokotletsa.

⁶ Ga nketla ke boifa makgolokgolo a batho ba ba inkemiseditseng ka ntlha tsotlhe.

⁷ Tloga o eme, Jehofa; o mpoloke, Modimo wa me; gonne o iteile baba ba me botlhe lesama; o robile meno a baikepi.

⁸ Poloka ke ya ga Jehofa; tshegofatso ya gago a e nne mo bathong ba gago. Sela.