Lipesalema 26 - BAEBELE e e Boitshepo

Thapelo ya mokopa thuso yo o senang molato

Pesalema ya ga Dafite.

¹ Nkatlhola, Jehofa, gonne ke ntse ke tsamaya mo go tlhokeng molato ga me; ke bile ke ikantse Jehofa, ke sa kabakanye.

² Nkeleka, Jehofa o mphukutse; leka diphilo tsa me, le pelo ya me.

³ Gonne bopelonomi jwa gago jwa lorato bo fa pele ga matlho a me; mme ke ntse ke tsamaya mo boammaaruring jwa gago.

⁴ Ke ntse ke sa dule le batho ba boithamako; le gone ga nketla ke tsenatsena le baitimokanyi.

⁵ Ke ila phuthego ya badira dibe, ke gana go dula le baikepi.

⁶ Ke tlaa tlhapa diatla tsa me mo bophepeng fela; jalo ke tlaa dikanyeletsa sebeso sa gago, Jehofa.

⁷ Gore ke tle ke utlwatse lentswe la tebogo, ke be ke bolele ka ga ditiro tsotlhe tsa gago tse di gakgamatsang.

⁸ Jehofa, ke rata boago jwa ntlo ya gago le felo fa kgalalelo ya gago, e agileng gone.

⁹ O se ka wa gogobela mowa wa me le baleofi, le fa e le botshelo jwa me le batsholodi ba madi;

¹⁰ ba bosenyi bo mo diatleng tsa bone, le ba seatla sa bone se segolo se tletseng dituelo tsa phaposo.

¹¹ Ka ga me ke tlaa nna ke tsamaya mo go tlhokeng molato ga me; nthekolola, mme o nne kutlwelobotlhoko mo go nna.

¹² Lonao lwa me lo eme fa go papannweng; ke tlaa baka Jehofa mo diphuthegong.