Lipesalema 13 - BAEBELE e e Boitshepo

Thapelo ya go thusiwa mo dipatikegong

Pesalema ya ga Dafite. Ya moopedi yo mogolo.

¹ E tlaa nna lobaka lo lokae, Jehofa, a o tlaa ntebala ka bosakhutleng? O tlaa mphitlhela sefatlhogo sa gago ka lobaka lo lokae?

² Ke tlaa nna ke gakololana le mowa wa me ka lobaka lo lokae, ka ke tlhola letsatsi lotlhe fela ke ntse ke na le bohutsana mo pelong ya me? Mmaba wa me o tlaa nkgodisediwa ka lobaka lo lo kae?

³ O tle o akanye, o bo o mphetole Jehofa, Modimo wa me; bonesa matlho a me, nka tla ka robala boroko ja loso;

⁴ mmaba wa me o ka tla a re: “Ke mo fentse;” baganetsi ba me ba ka tla ba itumela mogang ke tshikinyegang.

⁵ Nna, ke ikantse mo boutlwelongbotlhoko jwa gago; pelo ya me e tlaa itumela mo polokeng ya gago;

⁶ ke tlaa opelela Jehofa ka a ntiretse sentle ka mo go tletseng.