Lipesalema 105 - BAEBELE e e Boitshepo

Dikgakgamatso tsa Modimo ka ga Iseraele

¹ A ko lo ntshetseng Jehofa malebogo, bitsang leina la gagwe; madiro a gagwe lo a itsefatse mo ditšhabeng.

² Mo opeleleng, mo opeleleng dipako; buang ka ga ditiro tsa gagwe tsotlhe tse di gakgamatsang.

³ Kgantshang ka leina la gagwe le le boitshepo; a dipelo tsa ba ba batlang Jehofa di itumele.

⁴ Batlang Jehofa le thata ya gagwe; batlang sefatlhogo sa gagwe ka bosakhutleng.

⁵ Gakologelwang ditiro tsa gagwe tse di gakgamatsang tse o di dirileng; dikgakgamatso tsa gagwe, le dikatlholo tsa molomo wa gagwe;

⁶ lona losika lwa ga Aberahame, motlhanka wa gagwe; lona bana ba ga Jakobe, baitshenkedwi ba gagwe.

⁷ Ke ene Jehofa Modimo wa rona; dikatlholo tsa gagwe di mo lefatsheng lotlhe fela.

⁸ O ntse a gakologetswe kgolagano ya gagwe ka bosakhutleng, e bong lefoko le o le laoletseng dikokomana di le makgolo a some;

⁹ e bong kgolagano e o neng a e dira le Aberahame, le ikano ya gagwe le Isake;

¹⁰ mme ikano e, a e tlhomamisetsa Jakobe gore e nne molao o o emeng, le mo go Iseraele gore e nne kgolagano e e sa khutleng.

¹¹ Ka a re: “Ke tlaa go naya lefatshe la Kanana, go nna kabelo ya boswa jwa lona.”

¹² E le jale ba sa ntse ba se kaye mo palong; ee, ba se kayenyana, ba bile ba le bajaki fela mo go lone;

¹³ ba kgarakgatshega ka go nna ba tlhomaganya merafe fela, ba tswe mo bogosing bongwe ba ye mo tšhabeng e nngwe.

¹⁴ Ga a ka a leseletsa motho ope go ba direla tshiamololo; ee, o ne a kgalemela dikgosi ka ntlha ya bone;

¹⁵ a re: “Se ameng batlodiwa ba me, lo se ka lwa utlwisa baperofeti ba me botlhoko bope.”

¹⁶ A biletsa leuba mo lefatsheng; a roba seikokotlelo sotlhe sa senkgwe.

¹⁷ A roma monna yo o neng a ba etelela pele; Josefe a rekisiwa, a nna motlhanka;

¹⁸ dinao tsa gagwe ba di utlwisa botlhoko ka tse di golegang; a tsenngwa mo diketaneng tsa tshipi;

¹⁹ ga ba ga tla ga fitlha motlha wa go dirafala ga lefoko la gagwe; lefoko la ga Jehofa la mo leka.

²⁰ Kgosi ya roma, ya mo hunolola dikgole; e bong molaodi wa ditšhaba, mme a mo lesa a tswa fela.

²¹ A mo dira morena wa ntlo ya gagwe, le molaodi wa dithoto tsotlhe tsa gagwe;

²² gore a golege dikgosana tsa gagwe ka fa o ratang ka gone, le gore a rute bagolwane ba gagwe botlhale.

²³ Iseraele le ene a tla mo Egepeto; Jakobe a jaka mo lefatsheng la ga Hame.

²⁴ Mme Jehofa a atisa ba gagwe thata, a ba baya go nna thata bogolo go feta baganetsi ba bone.

²⁵ A sokolola pelo ya bone gore ba ile batho ba gagwe, go direla batlhanka ba gagwe ka boferefere.

²⁶ A roma Moše, motlhanka wa gagwe, le ene Arone yo o mo itshenketseng.

²⁷ Ba tlhoma ditshupo tsa gagwe fa gare ga bone, le dikgakgamatso tsa gagwe mo lefatsheng la ga Hame.

²⁸ A tlhoma lefifi, mme a le fifatsa; mme ga ba a ka ba tsuololela mafoko a gagwe.

²⁹ A fetola metsi a bone a nna madi, a bolaya ditlhapi tsa bone.

³⁰ Lefatshe la bone la nna le lesaisai la digwagwa, le mo matlwaneng a dikgosi.

³¹ A bua, mme ga tla metshitshi ya dintshi le dinta mo melelwaneng yotlhe ya bone.

³² A ba naya sefako mo boemong jwa pula, le molelo o o tutumang mo lefatsheng la bone.

³³ A kgemetha mafine a bone le one, le ditlhare tsa mafeige tsa bone; a robakanya ditlhare tsa melelwane ya bone.

³⁴ A bua, mme tsie ya tla le seboko, mme ya bo e le mo go se nang palo,

³⁵ mme tsa ja tsa swetsa merogo yotlhe mo lefatsheng la bone, tsa ba tsa ja tsa bilatsa loungo lwa mmu wa bone.

³⁶ Le gone a gaila batsalwapele botlhe mo lefatsheng la bone, tshimologo ya thata yotlhe ya bone.

³⁷ Mme a ba ntsha ba tswa ba na le selefera le gouta; mme go ne go se na motho ope yo o sekoa mo ditšhabeng tsa gagwe.

³⁸ E rile ba bothologa, Egepeto a itumela; gonne poifo ya bone e ne e ba wetse.

³⁹ A tsharolola leru go nna sesiro; le molelo go sedifatsa bosigo.

⁴⁰ Ba lopa, mme a lere makwetekwio, a ba kgorisa ka senkgwe sa legodimo.

⁴¹ A arola lefika, metsi a tšhabanyetsega; a elela mo mafelong a a lokgere jaaka noka.

⁴² Gonne a gakologelwa lefoko la gagwe le le boitshepo le ene Aberahame motlhanka wa gagwe.

⁴³ A ntsha batho ba gagwe, ba tswa ka boitumelo, le baitshenkedwi ba gagwe ka go opela;

⁴⁴ a ba naya mafatshe a merafe; ba tsaya mohuhutso wa ditšhaba; ba o rua;

⁴⁵ gore ba tle ba boloke ditao tsa gagwe, ba tlhokomele melao ya gagwe. Bakang Jehofa.