Jakobe 1 - BAEBELE e e Boitshepo

Tumediso

¹ Ke nna Jakobe motlhanka wa Modimo le wa Morena Jesu Keresete; ke kwalela ditšhaba tse di 12, tse e leng tsa Phaladi, ka re: Dumelang.

Tumelo le botlhale

² Bagaetsho, lo kaye fa e lo boitumelo fela, mogang lo welang mo ditekong di le dintsi;

³ lo ntse lo itse fa go lekwa ga tumelo ya lona go tle go tsose bopelotelele.

⁴ Lo mme bopelotelele bo dire tiro ya jone e e tletseng, gore lo tle lo nne botlalo le boitekanelo, lo sa tlhaele mo go sepe.

⁵ Fa mongwe wa lona a tlhoka botlhale, a a lope Modimo o o nayang botlhe ka bogolo, mme o sa kgobe; mme o tlaa bo newa.

⁶ A a lope ka tumelo, a sa belaele sepe; gonne yo o belaelang o tshwana le makhubu a lewatle a a kgweediwang, a phailakwa ke phefo.

⁷ Ka gobo motho yoo a a se gopole gore o tlaa amogela sengwe mo Moreneng;

⁸ e le motho yo o maikutlo mabedi, yo o akgaakgegang mo mekgweng yotlhe ya gagwe.

Mohumi le mohumanegi

⁹ A mokaulengwe yo o leng mothonyana fela a itumele mo go godisiweng ga gagwe;

¹⁰ le mohumi a itumele mo go ngotlweng ga gagwe; gonne o tlaa feta fela jaaka sethunya sa bojang.

¹¹ Gonne letsatsi le tle le tlhatloge le na le phefo e e fisang, mme le swabise bojang; sethunya sa jone se we, le bontle jwa popego ya jone bo nyelele; mohumi le ene o tlaa nyelela fela jalo mo ditsamaong tsa gagwe.

Diteko le dithaelo

¹² Go sego motho yo o itshokelang diteko; gonne o tlaa re a sena go lekwa a lebogwe, a bone serwalo sa botshelo, se Morena o se solofeditseng ba ba mo ratang.

¹³ Motho ope a se ka a re a raelwa a re: “Ke raelwa ke Modimo,” gonne Modimo ga o ka ke wa raelwa wa dira bosula, le one ka osi ga o raele motho ope.

¹⁴ Motho mongwe le mongwe o a raelwa fa a faposiwa ke e e leng thato ya gagwe, mme a fepisiwa.

¹⁵ Foo thato, e re e sena go emera, e tsale boleo; mme boleo jo, bo re bo sena go gola, bo tsale loso.

¹⁶ Lo se ka lwa tsietsega, bagaetsho ba ba rategang.

¹⁷ Neo nngwe le nngwe e e molemo, le se se molemo sengwe le sengwe se se tletseng, se tswa kwa godimo, se fologa kwa go Rra masedi, yo go sa ka keng ga nna phetogo mo go ene, le fa e le moriti o o bewang ke go menoga.

¹⁸ O re tsetse ka fa go rateng ga gagwe ka lefoko la boammaaruri, gore re nne e kete re mabutswapele a dibopiwa tsa gagwe.

Go utlwa le go dira

¹⁹ Mo, lo a go itse, bagaetsho ba ba rategang. A motho mongwe le mongwe a nne bonako go utlwa, le bonya go bua, le bonya go tlala bogale;

²⁰ gonne bogale jwa motho ga bo dire tshiamo ya Modimo.

²¹ Ke gone ka re, latlhang bomaswe jotlhe, le go penologa ga boikepo, mme lo amogele ka bonolo lefoko le le tlhomilweng, le le nonofileng go boloka mewa ya lona.

²² Lo nne badiri ba lefoko, e seng bautlwi fela, lo iphora fela.

²³ Gonne fa motho mongwe a le moutlwi wa lefoko, mme a se modiri wa lone, o tshwana le motho yo o iponang sefatlhogo sa gagwe sa tlholego mo seiponing;

²⁴ gonne o a ipona, a tsamaye, a tloge a lebale ka bonako popego ya gagwe ka fa e ne e ntse ka gone.

²⁵ Mme motho yo o lebang mo molaong o o itekanetseng, e bong molao wa kgololego, fa a tswelela jalo, motho yoo o tlaa segofala mo go direng ga gagwe, ka e se moutlwi yo o lebalang, mme e le modiri yo o dirang.

²⁶ Fa motho mongwe a ithaya a re ke modumedi, mme a sa kganele loleme lwa gagwe, a itsietsa pelo, tumelo ya motho yo ke lefela.

²⁷ Tumelo e e itshekileng, e e sa leswefalang fa pele ga Modimo le Rraetsho, ke e, go lekola masiela le basadi ba batlholagadi mo pitlaganong ya bone, le motho go ikilela gore a se mathwe gope ke lefatshe.