Ekesodo 7 - BAEBELE e e Boitshepo

¹ Jehofa a raya Moše a re: “Bona, ke go dirile go nna modimo mo go Faro; mme Arone mogoloo, o tlaa nna mmueledi wa gago.

² O bue tsotlhe tse ke di go laolelang; Arone mogoloo, o tlaa bua le Faro gore a lese bana ba Iseraele ba tswe mo lefatsheng la gagwe,

³ mme ke tlaa thatafatsa pelo ya ga Faro, ke ntsifatsa ditshupo tsa me le dikgakgamatso tsa me mo lefatsheng la Egepeto.

⁴ Faro ga a ketla a lo reetsa, mme ke tlaa baya seatla sa me mo Egepeto, ke ntsha masomosomo a me, tšhaba ya me, e bong bana ba Iseraele, mo lefatsheng la Egepeto, ka ditshekiso tse dikgolo.

⁵ Baegepeto ba tlaa itse fa ke le Jehofa, motlhang ke otlololelang Egepeto letsogo la me, ke ntsha bana ba Iseraele mo gare ga bone.”

⁶ Moše le Arone ba dira jaaka Jehofa a ba laotse, ba dira fela jalo.

⁷ E rile ba bua le Faro, Moše a bo a le dinyaga di le 80, mme Arone a bo a le dinyaga di le 83.

Thobane ya ga Arone

⁸ Jehofa a bua le Moše le Arone a re:

⁹ “E re fa Faro a bua le lona a re lo itshupe ka kgakgamatso; foo o reye Arone o re: ‘Tsaya thobane ya gago, o e latlhele fa pele ga Faro, gore e fetoge noga.’ ”

¹⁰ Moše le Arone ba tsena kwa go Faro ba dira jaaka Jehofa a ne a laotse; Arone a latlhela thobane ya gagwe fa pele ga Faro le fa pele ga batlhanka ba gagwe, mme ya fetoga noga.

¹¹ Foo Faro le ene a bitsa matlhale le baloi; le bone ba dira fela jalo ka mereo ya bone, e le bone dingaka tsa Egepeto.

¹² Ka gobo monna mongwe le mongwe a latlhela thobane ya gagwe, mme tsa fetoga dinoga; mme thobane ya ga Arone ya kometsa dithobane tsa bone.

¹³ Pelo ya ga Faro ya thatafala, a se ka a ba reetsa; fela jaaka Jehofa a buile.

Petso ya metsi a fetoga madi

¹⁴ Jehofa a raya Moše a re: “Pelo ya ga Faro e logwadi fela, o gana go lesa batho ba tsamaya.

¹⁵ Ya kwa go Faro ka moso; bona, ene o tlaa tswa a ya kwa metsing; wena o eme fa lotshitshing lwa noka go mo kgatlhantsha gone; thobane e e neng e fetolwa noga, o e tshole mo seatleng sa gago.

¹⁶ O mo reye o re: ‘Jehofa, Modimo wa Bahebere o nthomile kwa go wena a re: Lesa batho ba me ba tsamaye, ba ye go ntirela kwa nageng; mme bona, aitse o a bo o ntse o sa reetsa le jaana.

¹⁷ Jehofa o bua jaana a re: O tlaa itse fa ke le Jehofa ka se: Bona, ke tlaa itaya metsi a a mo nokeng ka thobane e e mo seatleng sa me, mme a tlaa fetoga madi.

¹⁸ Ditlhapi tse di mo nokeng di tlaa swa, le noka e tlaa nkga sebodu; Baegepeto ba tlaa sulafalelwa ke go nwa metsi a noka.’ ”

¹⁹ Jehofa a raya Moše a re: “Raya Arone o re: ‘Tsaya thobane ya gago o otlolole letsogo la gago godimo ga metsi a Egepeto, godimo ga dinoka tsa bone, godimo ga dinokana tsa bone, le godimo ga makgelebe a bone, le godimo ga madutela a bone, gore a tle a fetoge madi; mme go tlaa nna madi mo lefatsheng lotlhe la Egepeto, mo dilwaneng tsa dikgong, le mo dilwaneng tsa maje.’ ”

²⁰ Moše le Arone ba dira jalo, jaaka Jehofa a laotse; a tsholetsa thobane, a itaya metsi a a mo nokeng mo ponong ya ga Faro, le mo ponong ya batlhanka ba gagwe; mme metsi otlhe fela a a mo nokeng a fetoga madi.

²¹ Ditlhapi tse di mo nokeng tsa a swa; noka ya nkga sebodu, Baegepeto ba retelelwa ke go nwa metsi a noka; madi a nna fela mo lefatsheng lotlhe la Egepeto.

²² Dingaka tsa Egepeto tsa dira fela jalo ka mereo ya tsone; pelo ya ga Faro ya thatafala, a se ka a ba reetsa; fela jaaka Jehofa a buile.

²³ Faro a menoga a ya a tsena mo ntlong ya gagwe, le gone golo mo a se ka a go baya mo pelong ya gagwe.

²⁴ Baegepeto botlhe ba nna ba epa fa thoko ga noka ba batla metsi a a ka nowang; gonne ba ne ba palelwa ke go nwa metsi a noka.

²⁵ Ga feta malatsi a supa Jehofa a sena go itaya noka.