Ekesodo 2 - BAEBELE e e Boitshepo

Botsalo jwa ga Moše

¹ Ga tloga monna mongwe wa kgotla ya ga Lefi, a ya a tsaya mosadi mo go bomorwadia Lefi.

² Mosadi a nna moimana, a bona ngwana wa mosimane; o rile a mmona fa e le ngwana yo montle a mo suba ka dikgwedi di le tharo.

³ E rile a palelwa ke go tlhola a mo subile, a mo tseela seroto sa koma, a se dila ka bitumena le ka boka; a tsenya ngwana mo go sone, a se baya mo motsitleng fa lotshitshing lwa noka.

⁴ Kgaitsadie a emela kgakala gore a tle a itse se o tlaa se dirwang.

⁵ Morwadia Faro a fologela kwa nokeng a ya go tlhapa; malata a gagwe a nna a tsamaya le lotshitshi lwa noka; mme ene a bona seroto mo motsitleng, a roma lelata la gagwe la ya go se tsaya.

⁶ A se khurumolola mme a bona ngwanyana; mme bonang, losea lwa lela. Mme a lo tlhomogela pelo, a re: “Yo ke ngwana mongwe wa Bahebere.”

⁷ Foo kgaitsadie a raya morwadia Faro a re: “A ke ke ye go go biletsa moamusi wa basadi ba Bahebere gore a go amusetse ngwana yo?”

⁸ Morwadia Faro a mo raya a re: “Ya go mmitsa.” Morweetsana a ya a bitsa mma ngwanyana.

⁹ Morwadia Faro a mo raya a re: “Tsaya ngwana yo o ye nae o mo nkamusetse; ke tlaa go naya tuelo ya gago.” Mosadi a tsaya ngwana, a mo amusa.

¹⁰ Ngwanyana a gola, mmaagwe a mo isa kwa go morwadia Faro, a nna morwawe. A mo raya leina a re Moše; a re: “Ka gobo ke mo ntshitse mo metsing.”

Moše o tshabela kwa Midiane

¹¹ Ga diragala ya re mo metlheng eo, Moše a sena go gola, a tswela kwa go ba ga gabo, a leba merwalo ya bone; a bona Moegepeto a itaya Mohebere mongwe wa ba ga gabo.

¹² A gadima kwa le kwa, ya re a bona fa go se na motho ope, a bolaya Moegepeto, a mo fitlha mo mošaweng.

¹³ A tswa ka letsatsi la bobedi, mme bonang, banna ba le babedi ba Behebere ba lwa; a raya yo o rumolanyeng a re: “O iteelang mogaeno?”

¹⁴ A re: “E mang yo o go tlhomileng go nna kgosana le moatlhodi mo go rona? A o gopola go mpolaya jaaka o bolaile Moegepeto?” Moše a boifa; a re: “E ntse jaana selo se se itsegile.”

¹⁵ Mme jaana e rile Faro a utlwa selo seo a senka go bolaya Moše. Moše a tshaba sefatlhogo sa ga Faro, a aga mo lefatsheng la Midiane, a dula fa sedibeng.

¹⁶ Moperesiti wa Midiane o ne a na le bana ba basetsana ba supa: ba tla go ga, ba gelelela letsomane la ga rraabo, ba le nosetsa mo mekorong.

¹⁷ Ga tla badisa, ba ba leleka. Moše a nanoga, a ba thusa, a nosa letsomane la bone.

¹⁸ E rile ba fitlha kwa go Reuele, rraabo a re: “Ana go ntse jang ka lo akofile gompieno?”

¹⁹ Ba re: “Moegepeto mongwe o re golotse mo seatleng sa badisa a ba a re gelelela, a nosa letsomane.”

²⁰ A raya bomorwadie a re: “Mme o fa kae? Ana lo mo tlogeletseng monna yoo? Mmitseng gore a tle go ja.”

²¹ Moše a aga le monna yo a thethebetse pelo; mme a tseisa Moše Sipora, morwadie.

²² A bona ngwana wa mosimane nae, a mo raya leina a re, Gerešome, gonne a re: “Ke ntse ke le mojaki mo lefatsheng la boeng.”

²³ Ga diragala ya re mo go feteng ga malatsi ao a mantsi, kgosi ya Egepeto ya a swa. Bana ba Iseraele ba fegelwa ka ntlha ya kgolego, mme ba lela; go lela ga bone ga tlhatlogela kwa Modimong ka ntlha ya kgolego.

²⁴ Modimo wa utlwa go lela ga bone mme wa gakologelwa kgolagano ya one le Aberahame le Isake le Jakobe.

²⁵ Modimo wa leba bana ba Iseraele, wa ba ngoka.