Ekesodo 15 - BAEBELE e e Boitshepo

Sefela sa ga Moše

¹ Foo Moše le bana ba Iseraele ba opelela Jehofa sefela se, ba re: “Ke tlaa opelela Jehofa gonne o fentse ka mo go gakgamatsang. O latlhetse pitse le mopagami wa yone mo lewatleng.

² Jehofa ke thata ya me le sefela, o bile o diregile poloka ya me; one ke Modimo wa me, ke tlaa o baka; Modimo wa ga rre, ke tlaa o godisa.

³ Jehofa ke monna wa ntwa; Jehofa ke leina la gagwe.

⁴ O thabueditse dikara tsa ga Faro mo lewatleng le ntwa ya gagwe; beng ba mephato ba gagwe ba ba tlhophegileng ba nwetse mo Lewatleng le Lehibidu;

⁵ Madiba a a boteng a ba khurumeditse; ba thabuegetse mo ditsibeng jaaka lentswe.

⁶ Jehofa, letsogo la gago le le siameng le tlotlometse mo thateng, Jehofa, letsogo la gago le legolo le tle le rabanye mmaba.

⁷ Mo bogolong jwa borena jwa gago o ribegetsa ba ba go tsogelang; o tle o ntshetse bogale jwa gago kwa ntle, bo ba laile jaaka dirite.

⁸ Metsi a nna a tlhatlaganngwa ke pudulo ya dinko tsa gago, merwalela ya ema e tsepaletse e le mekoakoa fela; madiba a a boteng a gatsela mo pelong ya lewatle.

⁹ Mmaba a re: ‘Ke tlaa ba konatelela ke ba tshwara, ke tlaa aba thopo: thato ya me e tlaa kgora mo go bone; ke tlaa somola tšhaka ya me, seatla sa me se tlaa ba senya.’

¹⁰ Wa budula ka phefo ya gago lewatle la ba khurumetsa; ba nwela jaaka lotwe mo metsing a a thata e kgolo.

¹¹ Jehofa, e mang yo o tshwanang nao mo medimong? E mang yo o tshwanang nao, o le kgalalelo mo boitshepong, o le poitshego mo dipakong, o dira dikgakgamatso?

¹² O otlolotse letsogo la gago le legolo lefatshe la ba kometsa.

¹³ Ka boutlwelo botlhoko jwa gago o gogile tšhaba e o e rekolotseng; o e gogetse kwa bonnong jwa gago jo bo itshepileng ka thata ya gago.

¹⁴ Ditšhaba di utlwile di a roroma; metlotsedi e tshwere banni ba Filisitia.

¹⁵ Foo dikgosana tsa Etome tsa tseanngwa, banna ba ba thata ba Moabe thoromo e ba tshwere; banni botlhe ba Kanana ba kaologile.

¹⁶ Therego ya ba wela le tlakaselo; ka bogolo jwa letsogo la gago ba tuuletse fela jaaka lentswe; go tsamaye tšhaba ya gago Jehofa, e kgabaganye, go tsamaye tšhaba e o e rekileng e kgabaganye.

¹⁷ O tlaa ba fitlhisa o ba tlhoma mo thabeng ya boswa jwa gago, e bong mo felong fa o go itiretseng go tla o a ga gone Jehofa, felo ga boitshepo fa diatla tsa gago di go tlhomamisitseng, wena Jehofa.

¹⁸ Jehofa o tlaa busa ka bosakhutleng le ka bosaengkae.”

Sefela sa ga Miriame

¹⁹ Ya re dipitse tsa ga Faro di tsena mo lewatleng le dikara tsa gagwe, di na le bapagami ba dipitse ba gagwe, Jehofa a busetsa metsi a lewatle mo go bone; bana ba Iseraele ba tsamaya lefatshe le le omeletseng fela mo gare ga lewatle.

²⁰ Miriame moperofeti wa sesadi, kgaitsadia Arone, a tsaya moropana, le basadi botlhe ba mo sala morago ka meropana le ka dipina.

²¹ Miriame a ba fetola a re: “Opelelang Jehofa gonne o fentse ka mo go gakgamatsang; o konopetse pitse le mopagami wa yone mo lewatleng.”

Metsi a a botlhoko

²² Jalo Moše a gogela Iseraele kwa pele, ba tswa Lewatleng le Lehibidu, ba tswela kwa nageng ya Shure; ba tsamaya malatsi a le mararo mo nageng, ba sa bone metsi.

²³ E rile ba tla mo Mara, ba retelelwa ke go nwa metsi a Mara ka a ne a le botlhoko; leina la gone la bidiwa Mara ka ntlha ya gone moo.

²⁴ Batho ba ngongoregela Moše ba re: “Re tlaa nwa eng?”

²⁵ A tlhaeleletsa kwa go Jehofa; Jehofa a mo supetsa setlhare, e rile a se latlhela mo metsing, metsi a nna monate fela. A ba tlhomela molao le tao gone foo, a ba leka,

²⁶ a re: “Fa o reetsa lentswe la ga Jehofa Modimo wa gago ka tlhoafalo, o ba o dira se se siameng mo matlhong a gagwe, o sekegela ditaolo tsa gagwe tsebe, ga nketla ke go baya bolwetse bope jwa malwetse a ke a beetseng Baegepeto; gonne ke nna Jehofa yo ke go fodisang.”

²⁷ Ba fitlha mo Elime kwa go neng go le metswedi e le 12 ya metsi, le ditlhare tsa makolane di le 70 gone; ba thibelela gone fa metsing.