Ekesodo 12 - BAEBELE e e Boitshepo

Moletlo wa tlolaganyo

¹ Jehofa a bua le Moše le Arone mo lefatsheng la Egepeto a re:

² “Kgwedi eno a e nne tshimologo ya dikgwedi mo go lona, a e nne kgwedi ya ntlha ya ngwaga mo go lona.

³ Buang le phuthego yotlhe ya Iseraele lo re: E re ka letsatsi la lesome la kgwedi eno, mongwe le mongwe a tseye kwanyana, a e tseele ba ntlo ya gagwe, go nne kwanyana ya ba ntlo nngwe le nngwe.

⁴ Fa ba ntlo ba le babotlana mo go jeng kwanayana, foo motho le wa ga gabo yo o bapileng nae a ba e pataganele ka fa palong ya batho; lo ipalele kwanyana ka fa go jeng ga motho mongwe le mongwe.

⁵ Kwanyana ya lona a e nne e e se nang bogole, e le e tonanyana ya ngwaga wa ntlha; lo e tseye mo dinkung le fa e le mo dipoding.

⁶ Lo e tlhatlhele go ya go fitlha mo tsatsing la 14 la kgwedi eo; foo kokoano yotlhe ya phuthego ya Iseraele e e tlhabe go le maitseboana.

⁷ A ba tseye madi ba a tshase ka fa ntlheng tsoo pedi tsa mojako le fa mophakong mo matlong a ba tlaa e jelang mo go one.

⁸ A ba je nama ya yone mo bosigong joo, e besitswe ka molelo, e na le senkgwe se se sa bedisiwang; ba e jele le merogo e e galakang.

⁹ Lo se ka lwa e ja e le tala le fa e le go e apaya ka metsi, fa e se go e besa ka molelo fela; tlhogo ya yone e na le ditlhako tsa yone, le diteng tsa yone.

¹⁰ Lo se ka lwa sadisa sepe sa fitlhelwa ke ka moso; mme se se setseng sa yone se fitlhelwa ke ka moso lo se fise ka molelo.

¹¹ Lo e je lo ntse jaana; lo itlamile mo dithekeng, lo rwele ditlhako, lo tshotse thobane; lo e je ka potlako; ke tlolaganyo ya ga Jehofa.

¹² “Gonne ke tlaa ralala lefatshe la Egepeto sigo joo, mme ke tlaa bolaya bana ba ntlha botlhe mo lefatsheng la Egepeto, motho le kgomo; medimo yotlhe ya Egepeto ke tlaa e atlhola; ke nna Jehofa.

¹³ Mme madi a tlaa nna sesupo sa lona mo matlong a lo mo go one; ke tlaa re ke bona madi ke lo tlolaganye, ga go ketla go nna petso epe mo go lona go lo senya, fa ke itaya lefatshe la Egepeto.

¹⁴ Letsatsi le e tlaa nna letsatsi la segopodiso mo go lona, lo tlaa le tshegeletsa Jehofa e le letsatsi la modiro; mo dikokomaneng tsa lona tsotlhe fela, lo tlaa le tshegetsa e le modiro o o laoletsweng bosakhutleng.”

Moletlo wa senkgwe se se sa bedisiwang

¹⁵ “Lo je senkgwe se se sa bedisiwang ka malatsi a supa; fela ka letsatsi la ntlha lo tlose sebediso mo matlong a lona; le fa e le mang yo o jang senkgwe se se bedisitsweng, go simolola ka tsatsi la ntlha le go ya kwa go la bosupa, motho yoo a kgaolwe mo go Iseraele.

¹⁶ E re ka letsatsi la ntlha a go opiwe mokgosi wa phuthego e e itshepileng, le ka letsatsi la bosupa go opiwe mokgosi wa phuthego e e itshepileng; a go se dirwe tiro epe mo malatsing ao, fa e se se motho o se jang fela, ke sone sosi se se ka dirwang ke lona.

¹⁷ Lo tlhokomele modiro wa senkgwe se se sa bedisiwang; ka gobo ka tsatsi leo fela ke ntshitse masomosomo a lona mo lefatsheng la Egepeto; ke gone lo tlhokomele letsatsi leo mo dikokomaneng tsa lona, e le mo go laoletsweng bosakhutleng.

¹⁸ E re ka kgwedi ya ntlha, ka letsatsi la lesome le bone la kgwedi, go le maitseboana, lo je senkgwe se se sa bedisiwang go ya letsatsing la 21 la kgwedi, go le maitseboana.

¹⁹ A go se fitlhelwe sebediso mo matlong a lona ka malatsi a supa; gonne le fa e le mang yo o jang se se bedisitsweng, motho yoo a kgaolwe mo phuthegong ya Iseraele, le fa e ka ne e le mojaki, le fa e le mongwe yo o tsaletsweng mo lefatsheng leo.

²⁰ Lo se ka lwa a ja sepe se se bedisitsweng; lo je senkgwe se se sa bedisiwang mo maagong otlhe a lona.”

Moletlo wa ntlha wa tlolaganyo

²¹ Foo Moše a bitsa bagolwane botlhe ba Iseraele a ba raya a re: “Itebalebeleng dikwanyana, lo di tseye ka fa matlong a lona, lo tlhabe tlolaganyo.”

²² Lo tseye ngatana ya setlhatshana sa mosiama, lo e ine mo mading a a mo mogotšaneng, mme lo mathe mophako, le ntlha tsoo pedi tsa mojako ka madi a a mo mogotšaneng; ope wa lona a se ka a tswa ka mojako wa ntlo ya gagwe, bosigo bo tsamaye bo se.

²³ Gonne Jehofa o tlaa ralala go itaya Baegepeto; o tlaa re a bona madi mo mophakong le ka fa ntlheng tsoo pedi tsa mojako, Jehofa o tlaa tlolaganya mojako o, ga a ketla a leseletsa mosenyi go tsena mo matlong a lona go lo itaya.

²⁴ “Tlhokomelang selo se, e nne tayo mo go wena le mo go bomorwao ka bosakhutleng.

²⁵ Go tlaa diragala gore e re lo sena go tla mo lefatsheng le Jehofa o tlaa le lo nayang, jaaka a lo boleletse pele, lo tshegetse tirelo e.

²⁶ E re bana ba lona ba lo raya ba re: ‘Lo kayang ka tirelo e?’

²⁷ Lo tlaa re: ‘Ke tlhabelo ya tlolaganyo ya ga Jehofa, yo o ne a tlolaganya matlo a bana ba Iseraele kwa Egepeto, ka a itaya Baegepeto, mme a golola matlo a rona.’ ” Mme batho ba ikoba ditlhogo ba obamela Jehofa.

²⁸ Bana ba Iseraele ba ya ba dira jalo; jaaka Jehofa a ne a laotse Moše, ba dira fela jalo.

Loso lwa ngwana wa ntlha

²⁹ Ga diragala ya re bosigogare Jehofa a bolaya bana ba ntlha botlhe mo lefatsheng la Egepeto, go simolola ka ngwana wa ntlha wa ga Faro yo o dutseng mo setulong sa bogosi, go ya ngwaneng wa ntlha wa mogolegwi yo o mo moleteng, le maitibolo otlhe a dikgomo.

³⁰ Faro a tsoga bosigo, ene, le batlhanka botlhe ba gagwe le Baegepeto botlhe. Ga nna segajaja se segolo mo Egepeto; gonne go ne go se na ntlo epe e go nang moswi mo go yone.

³¹ A bitsa Moše le Arone bosigo a re: “Nanogang, lo tswe mo gare ga batho ba me, lona le bana ba Iseraele, lo ye lo direle Jehofa jaaka lo buile.

³² Tsayang matsomane a lona le matlhape a lona jaaka lo buile, lo yeng koo; le nna lo ntshegofatse.”

³³ Baegepeto ba potlakisa batho go ba ntsha mo lefatsheng ka bofefo; gonne ba re: “Re baswi rotlhe fela.”

³⁴ Batho ba tsaya mo go dubilweng ga bone go ise go bedisiwe, megopo ya bone ya bodubelo e bofilwe le diaparo tsa bone di beilwe mo maruding a bone.

³⁵ Bana ba Iseraele ba dira jaaka lefoko la ga Moše; ba lopa Baegepeto mekgabo ya selefera le mekgabo ya gouta le diaparo.

³⁶ Jehofa a naya batho tsalano mo matlhong a Baegepeto, ba ba naya fela se ba se lopang. Mme ba amoga Baegepeto.

Baiseraele ba tlogela Egepeto

³⁷ Bana ba Iseraele ba bolola mo Ramesese ba ya Sukothe, ba ka ne ba le batho ba le 600 000 ba ba tsamayang ka dinao, e le banna kwa ntle ga banyana.

³⁸ Ga tlhatloga nabo gape bontsi jwa batho jo bo tlhakanyeng; le matsomane, le matlhape, e le matlhape a le mantsi thata.

³⁹ Ba besa dipapetla tsa mo go dubilweng, mo ba duleng nago kwa Egepeto, gonne go ne go sa bedisiwa; ka ba dule kwa Egepeto ka go kgoromediwa, ba ne ba sa kake ba diega, le gone ba ne ba sa kake ba ipaakanyetsa mofago.

⁴⁰ Go jaka ga bana ba Iseraele mo ba go jakileng mo Egepeto e ne e le dinyaga di le 430.

⁴¹ Ga diragala ya re kwa bofelong jwa dinyaga tse di 430, ya re ka letsatsi leo fela masomosomo otlhe a ga Jehofa a tswa mo lefatsheng la Egepeto.

⁴² Ke bosigo jwa go tlhokomelelwa Jehofa thata, ka a ba ntshitse mo lefatsheng la Egepeto; jo, ke jone bosigo jwa ga Jehofa jwa go tlhokomelwa ke bana botlhe ba Iseraele go ya le dikokomana tsa bone.

Melawana ka ga tlolaganyo

⁴³ Jehofa a raya Moše le Arone a re: “E ke yone tayo ya tlolaganyo: A e se jewe ke ope wa tšhaba e sele.

⁴⁴ Motlhanka wa mongwe le mongwe yo o rekilweng ka madi, o sena go mo rupisa, e dire gone ene o ka e jang.

⁴⁵ Mojaki le motlhanka yo o thapilweng ka tuelo ba se ka ba e ja.

⁴⁶ A e jelwe mo ntlong e le nngwe fela; o se ka wa ntshetsa nama epe ya yone kwa ntle ga ntlo; le gone o se ka wa roba lesapo lepe la yone.

⁴⁷ A phuthego yotlhe ya Iseraele e go dire.

⁴⁸ E tlaa re fa moeng a jakile mo go lona, fa a rata go ja tlolaganyo ya ga Jehofa, lonna lwa gagwe lotlhe lo rupisiwe, foo a a atamele a tle go e dira; mme o tlaa nna jaaka mongwe yo o tsaletsweng mo lefatsheng leo; motho yo o sa rupang a se ka a e ja.

⁴⁹ Molao o nne mongwe fela mo go yo o tsaletsweng mo gae le yo e leng moeng yo o jakileng mo go lona.”

⁵⁰ Bana botlhe ba Iseraele ba ne ba dira jalo, fela jaaka Jehofa a laotse Moše le Arone, ba dira fela jalo.

⁵¹ Ya re ka tsatsi leo fela Jehofa a ntsha bana ba Iseraele mo lefatsheng la Egepeto ka masomosomo a bone.