Basiamisi 2 - BAEBELE e e Boitshepo

Moengele wa ga Jehofa kwa Bokime

¹ Moengele wa ga Jehofa a tswa kwa Gilegale a tla mo Bokime. A re: “Ke ne ka lo ntsha mo Egepeto, ke lo lerile mo lefatsheng le ke le ikanetseng borraeno; ke rile: ‘Ga nketla ke kgaogana le kgolagano ya me le lona ka gope;’

² ka ba ka re, ‘lo se ka lwa dira kgolagano epe le banni ba lefatshe leno; lo rutle dibeso tsa bone;’ mme ga lo a ka lwa reetsa lentswe la me; ana lo dirile jalo ka ntlha yang?

³ Ke gone gape ka moo ke buileng ka re: ‘Ga nketla ke ba leleka fa pele ga lona; mme ba tlaa nna jaaka mmitlwa mo ditlhakoreng tsa lona, medimo ya bone le yone e tlaa nna seru go lona.’ ”

⁴ Mme ga dirala ya re moengele a bua mafoko a le bana botlhe ba Iseraele, batho ba tsholetsa lentswe la bone ba lela.

⁵ Mme felo foo ba go raya leina ba re, Bokime; ba isetsa Jehofa setlhabelo gone.

Loso lwa ga Jošua

⁶ E rile Jošua a sena go naya batho tsela, bana ba Iseraele ba ya mongwe le mongwe kwa bosweng jwa gagwe, ba ya go rua lefatshe.

⁷ Batho ba direla Jehofa ka malatsi otlhe a ga Jošua, le ka malatsi otlhe a bagolwane ba ba tlogetsweng ke Jošua, ba ba bonyeng tiro e kgolo yotlhe ya ga Jehofa, e o ne a e direla Iseraele.

⁸ Mme Jošua morwa Nune motlhanka wa ga Jehofa a swa, a le botsofe jwa dinyaga di le 110.

⁹ Ba mo fitlha mo molelwaneng wa boswa jwa gagwe mo Timenathe-herese, mo lefatsheng la makgabana la Eferaime, bopota thaba ya Gaaše ntlheng ya botsheka.

¹⁰ Botlhe ba kokomana eo ba phuthelwa kwa go borraabo; mme ga tsoga kokomana e nngwe morago ga bone, e e se kang ya itse Jehofa, le fa e le yone tiro e o e diretseng Iseraele.

Baiseraele ba khutla go obamela Jehofa

¹¹ Bana ba Iseraele ba dira se se bosula mo matlhong a ga Jehofa, ba direla Bobaale.

¹² Ba latlha Jehofa Modimo wa borraabo, yo o ba ntshitseng mo lefatsheng la Egepeto, ba latela medimo e sele, ya medimo ya ditšhaba tse di mo tikologong ya bone, ba e ikobela; mme ba gakatsa Jehofa.

¹³ Ba latlha Jehofa ba direla Baale le Ašetarothe.

¹⁴ Bogale jwa ga Jehofa jwa tukela Iseraele, a ba tsenya mo diatleng tsa bathukhuthi ba ba ba thukhuthang, a ba rekisetsa mo diatleng tsa baba ba bone tikologong, mme ba ne ba sa tlhole ba nonofela go ema fa pele ga baba ba bone.

¹⁵ Gongwe le gongwe kwa ba yang gone, letsogo la ga Jehofa le nne le ganele nabo go ba direla bosula, jaaka Jehofa a ne a buile, le jaaka Jehofa a ba ikanetse; mme ba nne mo pitlaganong e e botlhoko.

¹⁶ Jehofa o ne a tle a tsose baatlhodi, ba ba ba gololang mo diatleng tsa ba ba ba thukhuthang.

¹⁷ Le fa go ntse jalo ba ne ba se ke ba reetsa baatlhodi ba bone, gonne ba ne ba tle ba ye ba akafalele medimo e sele, ba e ikobele; ba fapoge ka bonako tsela e borraabo ba ne ba sepela mo go yone, ka ba ne ba utlwa ditaolo tsa ga Jehofa; mme bao ga ba a ka ba dira jalo.

¹⁸ E ne e re Jehofa a ba tsosetsa baatlhodi, foo Jehofa a nne le moatlhodi, a ba golole mo seatleng sa baba ba bone ka malatsi otlhe a moatlhodi yoo; gonne Jehofa o ne a ikwatlhaya ka ntlha ya go ona ga bone, ka ba onisiwa ke ba ba ba patikang ba ba tshwenya.

¹⁹ Mme e re moatlhodi a sule, ba boele kwa morago, ba dire boleo bogolo go borraabo, ka go latela medimo e sele go e direla, le go e ikobela; ga ba a ka ba bakela ditiro tsa bone, le fa e le mokgwa wa bone wa botlhogoethata.

²⁰ Mme bogale jwa ga Jehofa jwa tukela Iseraele; mme a re: “E re ka morafe o, o tlodile kgolagano ya me e ke e laoletseng borraabo, le gone ba se ka ba reetsa lentswe la me;

²¹ le nna, ga nketla ke tlhola ke leleka fa pele ga bone ope wa merafe e e rileng Jošua a a swa a e tlogela;

²² gore ke tle ke leke Iseraele ka yone, boo ba tlaa tshegetsa tsela ya Jehofa go sepela mo go yone, jaaka borraabo ba ne ba e tshegetsa, kgotsa nnyaa.”

²³ Mme Jehofa a tlogela merafe eo jalo, a se ka a e leleka ka bonako; le gone ga a ka a e tsenya mo seatleng sa ga Jošua.