Bahebera 13 - BAEBELE e e Boitshepo

Tirelo e e itumedisang Modimo

¹ A go rata bakaulengwe go tswelele pele.

² Se lebaleng go itshupa lorato mo baennyeng; gonne bangwe ba kile ba tshogana ka ba tshotse baengele ka gone ba sa itse.

³ Gopolang ba ba mo dikgoleng, jaaka fa lo ka bo lo golegilwe nabo; le ba ba direlwang maswe, jaaka le lona lo sa ntse lo le mo mmeleng.

⁴ A nyalo e tlotlwe mo go botlhe, a bolao bo se leswefadiwe; gonne Modimo o tlaa sekisa bagokafadi le ba boaka.

⁵ Lo ikgolole mo go rateng khumo ya madi; lo nne boitumelo ka dilo tse lo nang natso; gonne go buile ene ka esi a re: “Ga nketla ke go tlhokafalela gope, le gone ga nketla ke go latlha gope.”

⁶ Jalo re bua ka go inametsa pelo re re: “Jehofa ke mothusi wa me, ga nketla ke boifa; ana motho o ka ntirang?”

⁷ Gopolang ba ba kileng ba lo laola, ba lo bolelela lefoko la Modimo; mme lo re lo akanya bofelelo jwa botshelo jwa bone, lo tle lo etse tumelo ya bone.

⁸ Jesu Keresete e ntse ke ene wa maabane le wa gompieno, ee, le wa ka bosakhutleng.

⁹ Lo se ka lwa utswiwa dipelo ke dithuto dingwe le dingwe le tsa seeng; gonne go molemo gore pelo e tlhomamisiwe ka tshegofatso, e seng ka dijo, tse e rileng batho ba itapisa ka tsone, ba se ka ba bona thuso mo go tsone.

¹⁰ Rona re na le sebeso se bone ba ba direlang motlaagana ba se nang tshiamelo ya go ja ga sone.

¹¹ Gonne ditoto tsa ditshedi tseo di tle di jewe ke molelo kwa ntle ga motse, e bong tse madi a tsone a isiwang mo Felong ga Boitshepo ke moperesiti yo mogolo, e le tshupelelo ya boleo.

¹² Ke gone ka moo, Jesu le ene a boga loso kwa ntle ga kgoro ya motse, gore a tle a itshepise batho ka madi a e leng a gagwe.

¹³ Ke gone, le rona a re tsweleng kwa go ene kwa ntle ga motse, re belege kgobo ya gagwe.

¹⁴ Gonne mono ga re na motse o o tlhomameng, re batla one motse o o tlaa tlang.

¹⁵ Jalo a re nneng re isetse Modimo tshupelo ya pako ka ene ka metlha yotlhe, e bong loungo lwa melomo e e ipolelang leina la gagwe.

¹⁶ Go dira molemo le go thusanya, lo se ka lwa go lebala, gonne Modimo o kgatlhwa ke ditlhabelo tse di ntseng jalo.

¹⁷ Utlwang ba ba lo laolang, lo ba ineele; gonne ba disitse mewa ya lona, jaaka ba ba tlaa ikarabelang, gore ba tle ba dire jalo ka boitumelo, e seng ka bohutsana, gonne mo go ka bo go se na thuso mo go lona.

¹⁸ Lo re rapelele, gonne re a tlhomamisa fa re na le segakolodi se se siameng; re eletsa go tshela ka go tlhoka matsoketsane mo dilong tsotlhe.

¹⁹ Bogolo ke lo laya thata gore lo dire jalo, gore ke tle ke bone go akofa ke lo rebolelwa.

Tshegofatso le ditumediso tsa bofelo

²⁰ Jaana Modimo wa kagiso, o o bileng o busitse Modisa yo Mogolo wa dinku mo baswing, ka madi a kgolagano e e sa khutleng, e bong Morena wa rona Jesu,

²¹ a o lo dire go nna boitekanelo mo go sengwe le sengwe se se molemo, go dira go rata ga one, ka go dira mo go rona se se kgatlhang mo matlhong a one, ka Jesu Keresete; yo kgalalelo e ka kang ya nna kwa go ene ka bosakhutleng le ka bosaengkae. Amen.

Molaetsa wa bofelo

²² Ke a lo laya bagaetsho ka re, a lo ke lo reetseng sentle lefoko la tao; gonne ke lo kwaletse ka mafoko a le makhutshwane.

²³ Itseng fa mokaulengwe Timotheo a golotswe, yo e tlaa reng fa a ka akofa a tla, ke be ke tla ke ya go lo bona ke na nae.

²⁴ Dumedisang botlhe ba ba lo laolang, le baitshepi botlhe. Bone ba Itale ba a lo dumedisa.

²⁵ A tshegofatso e nne le lona lotlhe. Amen.